قىرعىزدار ورىس تىلىنەن باس تارتۋدا

استانا. 26 ناۋرىز. بۇگىندە قىرعىزستاندا ورىس ءتىلى مەن رەسەي ءبىلىمىنىڭ اپتالىعى وتۋدە. ەلدىڭ ءبىلىم جانە عىلىم مينيسترلىگى مۇرىندىق بولعان شارا بارىسىندا ورىس ءتىلى ءپانىنىڭ مۇعالىمدەرى بىلىكتىلىگىن ارتتىرۋدا. سونداي-اق, مەكتەپ وقۋشىلارى مەن ستۋدەنتتەر ارنايى بايقاۋعا قاتىسۋدا. فينالعا دەيىن جەتكەن قاتىسۋشىلار الداعى كۇزدە ماسكەۋگە بارىپ, تاجىريبە جيناپ قايتادى. بۇل تۋرالى news-asia.ru حابارلادى. مۇنداي كەڭ كولەمدەگى شارا قىرعىزستاندا العاش رەت وتكىزىلۋدە جانە سوڭعىسى بولۋى دا عاجاپ ەمەس. سەبەبى, مەملەكەتتىك ءتىل بويىنشا ۇلتتىق كوميسسيانىڭ مۇشەلەرى ەل ءۇشىن ورىس ءتىلىنىڭ قاجەتى شامالى دەپ سانايدى. سونداي-اق, اتا زاڭدارىندا جازىلعان ورىس ءتىلىنىڭ رەسمي دەگەن مارتەبەسىن الىپ تاستاۋدى ۇسىنۋدا. الايدا, قىرعىزدار جاقىن ارادا مۇنداي قادامعا بارا المايدى. ويتكەنى, كونستيتۋتسياعا تۇزەتۋ ەنگىزۋگە 2020 جىلعا دەيىن موراتوري جاريالانعان. سوڭعى جىلدارى ەل ىشىندە مەملەكەتتىك ءتىل ماسەلەسى قىزۋ تالقىلانىپ, «ءبىر ەل – ءبىر ءتىل» دەگەن ۇران پايدا بولدى. ءبىلىم جانە عىلىم سالاسىندا جۇرگەن ماماندار مەن باق وكىلدەرى وسى ماسەلەنى ءجيى كوتەرىپ, ەل اراسىندا ەلەڭ ەتكىزەرلىكتەي پىكىرتالاس تۋدىردى. سوڭىندا تۇيتكىلدى ماسەلەنىڭ نۇكتەسىن ەل پرەزيدەنتى المازبەك اتامباەۆ قويىپ: «قىرعىزستاندا تۇرىپ قىرعىز ءتىلىن بىلمەۋ – ارسىزدىق جانە ناداندىق», – دەدى. وسىدان كەيىن ەلدە مەملەكەتتىك ءتىلدىڭ قولدانىس اياسىن كەڭەيتىپ, مارتەبەسىن ارتتىرۋعا نەگىزدەلگەن ۇلتتىق باعدارلاما دايىندالىپ, 2020 جىلعا دەيىن ارنايى جوسپار جاسالدى. سوعان سايكەس, قىرعىز ءتىلىن وقىتۋ ءتاسىلى تۇبىرىمەن وزگەرىپ, بالاباقشاداعى بالادان بيلىك باسىنداعى شەنەۋنىكتەرگە دەيىن مەملەكەتتىك ءتىلدى ءبىلۋ مىندەتتەلدى. بۇگىندە قىرعىز ءتىلىن قاجەت دەڭگەيدە بىلمەيتىن شەنەۋنىكتەر زاڭ بويىنشا قىزمەتىنەن الاستاتىلادى. ەلامان قوڭىر. دەرەك, سۋرەت: news-asia.ru.