ششششقازىر ءوز ءىسىمدى اشامىن دەگەن ادامعا مۇمكىندىك مول. تەك تاۋەكەلىڭ تۇرسىن دە. مارتوك اۋداندىق اۋىل شارۋاشىلىعى ءبولىمىنىڭ باسشىسى شاميل ساريەۆ اڭگىمە بارىسىندا تاۋەكەلگە بارىپ, شارۋا قوجالىعىن اشىپ, كاسىپكەرلىگىنىڭ كوكجيەگىن كەڭەيتە باستاعان ازاماتپەن تانىستىرۋعا ۋادە ەتتى. اۋدان ورتالىعىنداعى جۇمىسىمىز اياقتالا كەلە, ەلەك وزەنىنىڭ بويىنداعى وسى مالدى اۋىلعا باستادى. مارتوك سەلوسىنان شىعا جول جيەگىندە تۇرعان ماشيناعا كوزىمىز ءتۇستى.
مىنە, ءوزى دە كۇتىپ تۇر ەكەن, دەپ شاكەڭ اۋىز جيعانشا, اشاڭ ءجۇزدى, قاپساعاي دەنەلى, يىقتى جىگىت كەلىپ امانداستى. ءبىز كەلە جاتقان «ەسبول» شارۋا قوجالىعىنىڭ جەتەكشىسى مۇحاممەتحان قارساقوۆ ەكەن. شارۋا قوجالىعى مال باعىپ وتىرعان جايلاۋ دا ونشا قاشىق بولمادى, كۇرە جولدان سولعا بۇرىلىپ, قىردان تۇسكەن بويدا ەتەكتە قوجالىقتىڭ جايلاۋى جامىراي كورىندى. جاڭادان اشىلعان شارۋا قوجالىعىندا 100-دەن استام ءىرى قارا, 300-دەن استام قوي ۇستالۋدا. ءبىرىنشى كوزگە تۇسكەنى ەكى پالاتكا مەن مال قامايتىن اشىق اۋلا عانا. ارىرەكتە قوي مەن ءىرى قارا جايىلىپ جاتىر. جەر ءىرىپ تۇر, كوك مايسا. ءبىزدىڭ كوڭىلىمىزدىڭ قوڭىلتاقسىعانىن بايقادى ما, مۇحاممەتحان قارساقوۆتىڭ ءوزى اڭگىمە تىزگىنىن قولعا الدى. – العاشقى كەزدەگى قيىندىقتار عوي. ازىرگە مالشىلارىمىز پالاتادا تۇرادى, گەولوگتار سياقتى. ەسەسىنە ەلەكتىڭ سۋى جاقىن. بۇل جايلاۋدى اكىمدىك ۋاقىتشا بەرىپ وتىر. كەيىن ءوز جەرىمىز بولادى, – دەدى شارۋا قوجالىعىنىڭ باسشىسى. شىندىعىندا دا, ونىڭ شارۋا قوجالىعىن قۇرعانىنا كوپ بولا قويماپتى. ءبارىن جاڭادان باستاپتى. 2012 جىلى ءوزىنىڭ اۋلاسىنداعى 20 ءىرى قاراسىمەن «ەسبول» شارۋا قوجالىعىن قۇرىپ, ءبىر جىلدان كەيىن «جۇمىسپەن قامتۋدىڭ جول كارتاسى-2020» مەملەكەتتىك باعدارلاماسى بويىنشا 3 ميلليون تەڭگە جەڭىلدەتىلگەن نەسيە الىپ, وعان اۋدانداعى اسىل تۇقىمدى قىردىڭ قىزىل سيىرىن وسىرەتىن «قىزىلجار» شارۋاشىلىعىنان 20 قاشار ساتىپ الىپ, تابىنعا قوسىپتى. سول جولعى العان نەسيەنى ىرعالىپ-جىرعالماي وتەپ تە تاستاپتى. ودان كەيىن بانكتەن شاعىن نەسيە بويىنشا 18 ميلليون تەڭگە الىپ, 300 قوي ساتىپ العان. قازىر ءىرى قارا 100-دەن اسقان. بيىل تاعى دا 70 بۇزاۋ تابىنعا قوسىلىپتى. اسىل تۇقىمدى ون بۇقا ساتىپ العان. ولاردىڭ ارقايسىسىنا مەملەكەتتەن 104 تەڭگە سۋبسيديا الادى. – بولاشاقتا ساۋىن سيىر سانىن كوبەيتىپ, كەڭساحارا اۋىلىنان تاۋارلى-ءسۇت فەرماسىن اشساق دەپ وتىرمىز. اسىل تۇقىمدى قىردىڭ قىزىل سيىرلارىنىڭ بارلىق مالدارىگەرلىك-زووتەحنيكالىق عىلىمي جۇمىستارى جۇرگىزىلۋدە. قازىر ءۇش ەلەكترمەن ءسۇت ساۋاتىن اپپاراتىمىز بار, 60 سيىر ساۋامىز, – دەيدى مۇقاممەتحان. شارۋا ادامى جايىلىمدا كۇن باتارەياسىن پايدالانىپ وتىر. بۇل جولى دا «جۇمىسپەن قامتۋدىڭ جول كارتاسى-2020» باعدارلاماسى قولداۋ كورسەتكەن. ونى بىلتىر الىپتى. قازىر يگىلىگىن كورىپ وتىر. ءسۇت ساۋادى, تارتادى. ال, جايلاۋداعى مالدىڭ جاۋاپكەرشىلىگى جەرگىلىكتى ءتورت مالشىنىڭ موينىندا. ازىرگە قىسقى كەزەڭگە قاجەتتى جەمشوپتى ساتىپ الۋدا. بولاشاقتا تەحنيكا ساتىپ الۋدىڭ قامىن جاساۋدا. ول ءوزى 2008 جىلى قاراقالپاقستاننان اتباسىن اتامەكەنە بۇرعان ەكەن, وسى مارتوككە تابان تىرەپتى. قاتەلەسپەگەنى كورىنىپ تۇر. ەجەلدەن وسىندا تۇرىپ جاتقان قانداستارىمىز جۇرەكسىنىپ جۇرگەندە ءوز كۇشىنە, بىلىمىنە سەنگەن ول قولعا العان ءىسىن دوڭگەلەتىپ كەلەدى. جوعارى ءبىلىمدى ەكونوميست بولعاندىقتان شىعار, ىشكى ەسەبى دە جوق ەمەس, زيانعا قالمايمىز, ايتەۋىر, دەپ ك ۇلىمسىرەيدى.
ساتىبالدى ءساۋىرباي, «ەگەمەن قازاقستان».
اقتوبە وبلىسى. مارتوك اۋدانى.
