«اقش نوكاۋتشىلارى» vs «استانا ارلاندارى». قارسىلاستار بەلگىلى

استانا. 26 ناۋرىز. بۇكىلالەمدىك بوكس سەرياسى اياسىندا «استانا ارلاندارى» كەلەسى كەزدەسۋىن «اقش نوكاۋتشىلارىنا» قارسى وتكىزەدى. اقش-تىڭ مايامي قالاسىندا وتەتىن ايقاستا شارشى الاڭعا شىعاتىن قارسىلاستار بەلگىلى بولدى. بۇل تۋرالى astanaarlans.kz حابارلادى. سونىمەن الداعى سەنبىدە مىنا بوكسشىلاردىڭ جەكپە-جەكتەرىنە كۋا بولامىز: 49 كگ. دجوشۋا فرانكو – تەمىرتاس ءجۇسىپوۆ; 56 كگ. فرانتسيسكو مارتينەس – مەيىربولات تويىتوۆ; 64 كگ. تايرەك يربي – سامات باشەنوۆ; 75 كگ. كەلۆين حەندەرسون – مەيىرىم نۇرسۇلتانوۆ; 91 كگ. ەدريان تەيلور – ۆاسيلي لەۆيت. قوس كوماندا اراسىنداعى تارتىس 28 ناۋرىز كۇنى استانا ۋاقىتىمەن تاڭعى 06:00-دە باستالادى. كەزدەسۋدىڭ جازباسى «حابار» تەلەارناسىنان 29 ناۋرىز كۇنى ساعات 23:40-تا كورسەتىلەدى دەپ جوسپارلانۋدا. دەسەك تە, ايقاستى aibaboxingtv.com سايتىنان تىكەلەي ەفيردە كورۋگە بولادى. بۇل - ءبىزدىڭ كوماندانىڭ ماۋسىمداعى 11-كەزدەسۋى. وسىعان دەيىنگى 10 ماتچتا جەڭىسكە جەتكەن «ارلاندار» بۇگىندە 30 ۇپايمەن «ۆ» توبىندا كوش باستاپ تۇر. ال «نوكاۋتشىلار» 3-ساتىدا كەلەدى (18 ۇپاي). العاشقى اينالىمدا بوكسشىلارىمىز امەريكالىقتاردى 5:0 ەسەبىمەن جەڭگەنى ەسىمىزدە. وسى كەزدەسۋدەن كەيىن مارات جاكيەۆ باستاعان «ارلاندار» لاس-ۆەگاسقا ات باسىن بۇرادى. ول جاقتا كوماندامىز روي دجونستىڭ سپورت كەشەنىندە وقۋ-جاتتىعۋ جيىنىن وتكىزۋدى جوسپارلاپ وتىر. ەلامان قوڭىر. دەرەك, سۋرەت: astanaarlans.kz.