Airbus A320: اپات كەزىندە پيلوتتىڭ ءبىرى كابينادا بولماعان

استانا. 26 ناۋرىز. نەمىستىڭ Germanwings كومپانياسىنىڭ Airbus A320 ۇشاعى فرانتسۋزدىڭ ءالپى تاۋلارى ەتەگىنە بارىپ سوعىپ, اپاتقا ۇشىراعان كەزىندە پيلوتتاردىڭ ءبىرى كابينادا بولماعان. بۇل تۋرالى Euronews تەلەارناسى حابارلادى. New York Times گازەتىنىڭ حابارلاۋىنشا, Airbus A320 پيلوتتارىنىڭ ءبىرى اپاتقا ساناۋلى ۋاقىت قالعان شامادا كابينادان شىعىپ كەتكەن. «قارا جاشىكتەگى» جازبادان ونىڭ سودان كەيىن قايتىپ كابيناعا كىرە الماعانى انىق بايقالادى. پيلوت الدىمەن ەسىكتى اقىرىن قاعادى, سوسىن قاتتىراق ۇرادى, ال سوڭىنان بۇزىپ كىرمەكشى بولادى. بىراق سول كۇيى ىشكە ەنە المايدى. «Germanwings اۆياكومپانياسىنىڭ اەروبۋسى اپاتقا ۇشىراعان ماۋرىتتە كابينادا ەكى پيلوتتىڭ بىرەۋى عانا بولعان. ەكىنشىسى قايعىلى وقيعادان بىرنەشە مينۋت بۇرىن سالونعا شىعىپ كەتىپ, شتۋرۆالعا قايتادان كەلە الماي قالعان. كابينادا قالعان ارىپەسى وعان ەسىكتى اشپاعان. پيلوت سوسىن ەسىكتى بۇزىپ كىرمەك بولعان, بىراق قولىنان كەلمەگەن. بۇعان لاينەر اپاتقا ۇشىراعان جەردەن تابىلعان بورت جازبالارى مالىمەتى ايعاق بولا الادى. سونىمەن ءبىر مەزگىلدە وسى اقپاردى تاراتۋشى New York Times گازەتى اتىن اتاماعان تەرگەۋ وكىلىنىڭ سوزىنە سىلتەمە جاساي وتىرىپ, ينتسيدەنت الدىندا پيلوتتاردىڭ اڭگىمەلەرىندە دابىل قاعارلىقتاي ەشتەڭە بايقالماعانىن, ولاردىڭ ادەتتەگىدەي سويلەسىپ وتىرعاندارىن مالىمدەيدى», - دەپ باياندايدى Euronews ءجۋرناليسى. بورت جازبالارى جازىلعان ەكىنشى «قارا جاشىك» تە تابىلعان. ول قاتتى ب ۇلىنگەن ەكەن. وندا جاد كارتاسى جوق. قازىر سونى ىزدەستىرۋ جالعاسىپ جاتىر. قايعىلى وقيعا بولعان ماڭايعا كەشە, سارسەنبى كۇنى گەرمانيا كانتسلەرى انگەلا مەركەل فرانتسيا پرەزيدەنتى فرانسۋا وللاندپەن بىرگە بارىپ قايتتى. ولار سەن-لەز-الپ ەلدى مەكەنى جانىنداعى الاڭقايدا بولدى. Bild باسىلىمىنىڭ مالىمەتى بويىنشا, ۇشاقتىڭ اپات الدىنداعى قوزعالىسى تۋرالى ەسەپ جاريالانعان. قۇجاتقا قاراعاندا, پيلوتتار جەرگىلىكتى ۋاقىت بويىنشا 10:30 ساعاتتا ديسپەتچەرلەردەن العان سوڭعى تاپسىرمالارىن ماقۇلداعان. ال 10:31:02-دە رۇقساتسىز سەكۋندىنا 17,8 مەترگە جۋىق جىلدامدىقپەن تومەن تۇسە باستاعان. ديسپەتچەرلەر سول كەزدە ەكيپاجبەن حابارلاسۋعا ارەكەت جاساعان, بىراق كەرى بايلانىس بولماعان, ياعني ۇشقىشتار جاۋاپ بەرمەي قويعان. 10:35-تە بۇل جاعداي ۇلتتىق شۇعىل قىزمەتكە حابارلانعان. ديسپەتچەرلەر 10:40-قا دەيىن ەكيپاجبەن بايلانىستى قايتا قالپىنا كەلتىرۋگە تىرىسىپ باققان. سودان كەيىن ۇشاق راداردان كورىنبەي كەتكەن. لاينەردىڭ ەڭ سوڭعى جىلدامدىعى 1,890 مەتر بولعان. ازىرگە ىزدەۋشىلەر توپتارى ءالپىنىڭ ادام اياعى باسا الاتىن جەرلەرىنەن ادام قاڭقالارىن ىزدەستىرۋدى جالعاستىرىپ جاتىر. مۇرات ايتقوجا.