ءىس-شاراعا ءماجىلىس دەپۋتاتتارى, ورتالىق مەملەكەتتىك ورگانداردىڭ وكىلدەرى, پارتيا قىزمەتكەرلەرى جانە بەينەكونفەرەنتس-بايلانىس رەجىمى ارقىلى وڭىرلەردەگى باسقارما باسشىلارى قاتىستى.
ءسوز باسىندا «Amanat» پارتياسىنىڭ حاتشىسى شولپان كارينوۆا ەلىمىزدە جاڭا كونستيتۋتسيا جوباسى ازىرلەنگەنىن, وسى جۇمىس اشىق ءارى جاريا تۇردە جۇرگىزىلگەنىن اتاپ ءوتتى.
ء«ار ازاماتتىڭ قازاقستاننىڭ بولاشاعىنا ءوز ۇلەسىن قوسۋعا بەلسەندى ازاماتتىق ۇستانىمىن ۇسىنىستار مەن سانالى قاتىسۋى ارقىلى بىلدىرۋگە تولىق مۇمكىندىگى بار. اتا زاڭ جوباسى قوعامدا جۇزەگە اسىرىلىپ جاتقان جۇيەلى ساياسي جانە ەكونوميكالىق وزگەرىستەردى كورسەتىپ, ەل دامۋىنىڭ جاڭا باعدارىن, ونىڭ ىشىندە ءبىلىم, عىلىم, يننوۆاتسيالار سالاسىنداعى باسىمدىقتاردى ايقىنداپ, ادام كاپيتالىن دامىتۋدى ەڭ باستى ورىنعا قويعان قۇجات سانالادى», دەدى پارتيا حاتشىسى.
ءوز كەزەگىندە, ءماجىلىس دەپۋتاتى, كەڭەس توراعاسىنىڭ ورىنباسارى ەرلان ابديەۆ جاڭا كونستيتۋتسيا جوباسى – بولاشاققا باعىتتالعان, پروگرەسسيۆتى قۇجات ەكەنىن اتاپ ءوتىپ, ونىڭ ىرگەتاسىندا ادامعا باعدارلانعان ۇستانىم ەكەنىن مالىمدەدى. ونىڭ ايتۋىنشا, بۇل قوعامدا ينكليۋزيۆتى ورتانى دامىتۋدا, سونىڭ ىشىندە قازاقستاننىڭ ءبىلىم بەرۋ جۇيەسىن ىلگەرىلەتۋدە ەرەكشە ماڭىزدى.
«بۇگىندە ۇلتتىق دەڭگەيدە «مۇمكىندىگى شەكتەۋلى بالالاردى (تۇلعالاردى) كەشەندى قولداۋ تۋرالى» جاڭا زاڭ جوباسى ازىرلەنىپ جاتىر. قۇجات مەملەكەت باسشىسىنىڭ ۇلتتىق قۇرىلتايدىڭ IV وتىرىسىندا بەرگەن تاپسىرماسى اياسىندا ءماجىلىس پەن سەنات دەپۋتاتتارىنىڭ باستاماسى نەگىزىندە دايىندالدى. ماجىلىستە تالقىلانىپ جاتقان بۇل زاڭ جوباسى بالالاردىڭ مەديتسيناعا, بىلىمگە جانە الەۋمەتتىك قىزمەتتەرگە ۇزدىكسىز قولجەتىمدىلىگىن قامتاماسىز ەتۋگە مۇمكىندىك بەرەدى», دەدى ەرلان ابديەۆ.
بۇل رەتتە وقۋ-اعارتۋ ءبىرىنشى ۆيتسە-ءمينيسترى مايرا مەلدەبەكوۆا ەلىمىزدە ەرەكشە ءبىلىم بەرۋدى قاجەت ەتەتىن 237 مىڭ بالا بار ەكەنىن ايتتى.
«ونىڭ ىشىندە, مەكتەپكە دەيىنگى جاستا – 71 مىڭ, مەكتەپ جاسىندا – 166 مىڭ. مۇمكىندىگى شەكتەۋلى بالالاردىڭ باسىم كوپشىلىگى – پسيحيكالىق دامۋى تەجەلگەن بالالار. ولاردىڭ ۇلەسى – 34,3% بولسا, سويلەۋ ءتىلىنىڭ بۇزىلىسى بار بالالار 32%-دى قۇرايدى. بۇگىندە ينكليۋزيۆتى ءبىلىم بەرۋ جاعدايىندا بالاباقشالاردا – 49200, مەكتەپتەردە – 138700, كوللەدجدەردە 5400 بالا ءبىلىم الۋدا. ءار بالانىڭ ءبىلىم الۋ قاجەتتىلىگى پسيحولوگيالىق مەديتسينالىق پەداگوگيكالىق كونسۋلتاتسيالاردا (پمپك) باعالانادى. ول ءۇشىن ەلىمىزدە 124 پمپك قىزمەت ەتەدى. وسى جىلى تاعى 8 پمپك اشۋ جوسپارلانىپ وتىر», دەدى ۆيتسە-مينيستر.
سونداي-اق جيىن بارىسىندا قاراعاندى مەن اقمولا وبلىسىنداعى جانە شىمكەنت قالاسىنداعى ءبىلىم باسقارمالارىنىڭ باسشىلارى بايانداما جاسادى.
ءىس-شارانى قورىتىندىلاي كەلە, «Amanat» پارتياسىنىڭ حاتشىسى شولپان كارينوۆا الداعى ۋاقىتتا قابىلداناتىن بارلىق شەشىم مەن شارانىڭ وزەگىندە بالالار تۇرۋعا ءتيىس ەكەنىن اتاپ ءوتتى. ال تۇپكى ماقسات – ناعىز ينكليۋزيۆتى ورتا قۇرۋ.
«سانيتارلىق جانە قۇرىلىس نورمالارى دا نازاردان تىس قالماۋعا ءتيىس. پمپك-عا, وڭالتۋ كابينەتتەرىنە جانە رەسۋرستىق ورتالىقتارعا قاتىستى ءتيىستى قۇرىلىس نورمالارى قاجەت. وسى ماسەلە ءالى دە تولىق شەشىمىن تاپپاي وتىر. سوندىقتان جيىن بارىسىندا كوتەرىلگەن بارلىق ماسەلەنى الداعى ۋاقىتتا دا ءجىتى نازاردا ۇستايمىز», دەپ تۇيىندەدى شولپان كارينوۆا.
