قازاق كاسىپكەرى مولدوۆا زاۋىتىنىڭ باس ديرەكتورى بولدى

استانا. 26 ناۋرىز. قازاقستان كاسىپكەرى تالعات بايتازيەۆ مولدوۆا مەتاللۋرگيا زاۋىتىنىڭ باس ديرەكتورى بولىپ تاعايىندالدى. بۇل تۋرالى «اق جايىق» گازەتى حابارلادى. مولدوۆا اۋماعىنداعى مويىندالماعان پريدنەستروۆە رەسپۋبليكاسىنىڭ پرەزيدەنتى ەۆگەني شەۆچۋكتىڭ سوزىنە قاراعاندا, مولدوۆا مەتاللۋرگيا زاۋىتى ۇستىمىزدەگى جىلدىڭ اقپانىندا مەملەكەت مەنشىگىنە قايتارىلعان. قازىر زاۋىت 4 ملن. دوللارعا شىعىندا تۇر. ەۆگەني شەۆچۋك: «نەگىزگى مىندەت – ءبىرىنشى ءوندىرىس شىعىنىن ازايتۋ, ەكىنشى – پايداعا جۇمىس ىستەۋ», دەدى. پريدنەستروۆە باسشىسى اقپان ايىندا زاۋىتقا جاڭا ينۆەستور تارتىلاتىنىن, ول زاۋىتقا 40 ملن. دوللار قارجى قۇياتىنىن مالىمدەگەن. بىراق الگى ينۆەستوردىڭ كىم ەكەنىن اشىپ ايتپاعان ەدى. ەندى, مىنە, ونىڭ ەسىمى بەلگىلى بولىپ وتىر. كاسىپورىننىڭ ينۆەستورى ءارى باس ديرەكتورى تالعات بايتازيەۆ 49 جاستا. اتىراۋ مۇناي جانە گاز ينستيتۋتىنىڭ تۇلەگى. ول 2004-2012 جىلدار ارالىعىندا اتىراۋ مۇناي وڭدەۋ زاۋىتىن باسقارعان. ال 2012 جىلدىڭ جەلتوقسانىندا «قازترانسويل» اكتسيونەرلىك قوعامىمەن ەنشىلەس Batumi Industrial Holdings Ltd كومپانياسىنىڭ باس ديرەكتورى بولىپ تاعايىندالعان. جولدىباي بازار. دەرەك, سۋرەت: «اق جايىق» گازەتى.