سۋرەت: facebook.com/akimatlsk/
القالى كەڭەستە اتا زاڭ جوباسىندا كورىنىس تاپقان نەگىزگى ەرەجەلەردىڭ مەملەكەتتىگىمىزدى نىعايتۋعا, ازاماتتاردىڭ قۇقىعى مەن ەركىندىگىن قورعاۋعا, ەكونوميكا, ءبىلىم, عىلىم, يننوۆاتسيانىڭ دامۋىنا, سونداي-اق ەلىمىزدەگى ساياسي ينستيتۋتتاردى جەتىلدىرۋگە باعىتتالعانى تۋرالى ءسوز بولدى.
ءوڭىر باسشىسى كونستيتۋتسيالىق رەفورما ەلىمىزدىڭ دامۋىنداعى جاڭا تاريحي بەلەس, ماڭىزدى قادام ەكەنىن اتاپ ءوتىپ, الدا جاڭا كونستيتۋتسيا جوباسىنىڭ ءجون-جوسىعىن حالىققا جان-جاقتى ءتۇسىندىرۋ مىندەتى تۇرعانىن ايتتى.
«وبلىس تۇرعىندارىمەن اتا زاڭداعى وزگەرىستەردىڭ ءمان-ماڭىزى تۋرالى اڭگىمەلەسىپ, تاريحي ماڭىزى بار رەفورمانى كوپشىلىككە ۇعىنىقتى ەتىپ جەتكىزۋىمىز قاجەت. ءاربىر تۇرعىن كونستيتۋتسيا جوباسىندا ۇسىنىلعان وزگەرىستەردىڭ ءمان-ماقساتىنا كوز جەتكىزىپ, تۇسىنگەنى ماڭىزدى», دەگەن ءوڭىر باسشىسى ق.اقساقالوۆ وسى ماقساتتا وتەتىن كەزدەسۋلەر, وي-پىكىر الماسۋلار ازاماتتاردىڭ بارىنە بىردەي ۇعىنىقتى بولعانى ءجون ەكەنىن ايتتى.
سونداي-اق ول بۇل ىسكە ءوڭىردىڭ زيالى قاۋىم وكىلدەرى, قوعام بەلسەندىلەرى دە اتسالىسۋى قاجەتتىگىن جەتكىزدى.
كونستيتۋتسيالىق رەفورما جونىندەگى كوميسسيا قۇرامىندا بولعان وبلىستىق ءماسليحات توراعاسى سايلاۋبەك ەسجانوۆتىڭ ايتۋىنشا, اتا زاڭ جوباسىندا «ادىلەتتى قازاقستان» تۇجىرىمداماسى, «زاڭ مەن ءتارتىپ» قاعيداتى سياقتى نەگىزگى باعدارلار بەكىتىلگەن. وسىلايشا, جاڭا جوبا مەملەكەتتى ءادىل باسقارۋ, زاڭ ۇستەمدىگىن نىعايتۋ جانە قوعامنىڭ مەملەكەتتىك ينستيتۋتتارعا دەگەن سەنىمىن ارتتىرۋدىڭ ناقتى قۇقتىق تەتىكتەرىن ايقىنداپ بەرىپ وتىر.
وبلىستىق قوعامدىق كەڭەستىڭ توراعاسى سەرىك بەكتۇرعانوۆتىڭ سوزىنشە, ەل كولەمىندە جارتى جىلدان بەرى ءجۇرىپ جاتقان كونستيتۋتسيالىق رەفورما اياسىندا كۇن تارتىبىنە ءتۇرلى ۇسىنىستاردى ەنگىزۋ, ونى تالقىلاۋ, اتا زاڭنىڭ ءماتىنىن وزگەرتۋ ءتارىزدى ۇلى ۇدەرىستەردىڭ تىكەلەي ەفير ارقىلى كوپشىلىكتىڭ كوز الدىندا وتكەنى بيلىكتىڭ حالىققا مەيلىنشە اشىق ەكەنىن كورسەتىپ بەرىپ وتىر.
«كونستيتۋتسيالىق رەفورما ۇدەرىسىنە حالىقتىڭ دا بەلسەندى اتسالىسىپ جاتقانىن بايقاپ وتىرمىز. ارينە, الدا ءالى دە تالاي ۇسىنىس ايتىلار, كونستيتۋتسيا جوباسى قىزۋ تالقىعا ءتۇسۋى مۇمكىن. ەل ومىرىندەگى ەلەۋلى وقيعا بولعان سوڭ, ول – دۇرىس. بىراق اشىق, سىندارلى ديالوگ بولۋ قاجەت», دەدى قوعامدىق كەڭەس توراعاسى.
جيىندا كونستيتۋتسيالىق رەفورمانىڭ ءمان-ماڭىزىنا حالىققا قاراپايىم تىلدە جەتكىزىپ, تۇسىندىرە ءبىلۋ ماڭىزدى ەكەنى ايتىلدى. اكتيۆ وتىرىسىنان كەيىن اتا زاڭ جوباسى وبلىستىق, اۋداندىق دەڭگەيدەگى ءماسليحات دەپۋتاتتارىنىڭ جينالىسىندا تالقىلاندى.
قوستاناي وبلىسى
