كونتسەرت باعدارلاماسىنا حح عاسىر مۋزىكاسىنىڭ كورنەكتى وكىلدەرى – دميتري شوستاكوۆيچ, سەرگەي راحمانينوۆ, الەكساندر سكريابيننىڭ شىعارمالارى ەندى. اتاپ ايتقاندا, د.شوستاكوۆيچتىڭ №2 فورتەپيانو كونتسەرتى, س.ءراحمانينوۆتىڭ 23 جانە 32-وپۋستارىنان تاڭدامالى پرەليۋديالار, سونداي-اق ا.سكريابيننىڭ 2, 8 جانە 42-وپۋستارىنان ەتيۋدتەر ورىندالدى.
مۋزىكا كەشىنىڭ باستى ەرەكشەلىگى – الەمگە ايگىلى پيانيست-سوليستەردىڭ ونەر كورسەتۋى بولدى. ساحنادا رەسەي مەن باشقۇرتستاننىڭ حالىق ءارتىسى, پ.چايكوۆسكي اتىنداعى جانە ليدس ( ۇلىبريتانيا) حالىقارالىق بايقاۋلارىنىڭ لاۋرەاتى ۆلاديمير وۆچيننيكوۆ ونەر كورسەتتى. ونىڭ ورىنداۋىنداعى كلاسسيكالىق ءھام رومانتيكالىق تۋىندىلار تەرەڭ ينتەرپرەتاتسياسىمەن كورەرمەننىڭ ىستىق ىقىلاسىنا بولەندى.
سونداي-اق فورتەپيانو كەشىندە رەسەيدىڭ ەڭبەك سىڭىرگەن ءارتىسى, گنەسيندەر اتىنداعى رەسەي مۋزىكا اكادەمياسىنىڭ پروفەسسورى, بەدەلدى حالىقارالىق بايقاۋلاردىڭ جەڭىمپازى ءارى مارتەبەلى «Steinway Artist» اتاعىنىڭ يەگەرى يۋري بوگدانوۆ ساحناعا شىقتى. ورىنداۋشىلىق ەركىندىگىمەن, ايرىقشا تەمپەرامەنتىمەن ەرەكشەلەنەتىن پيانيست ا.سكريابين شىعارمالارىن وزىندىك قولتاڭبامەن جەتكىزدى.
قازاق مەملەكەتتىك سيمفونيالىق وركەسترى – ەلىمىزدىڭ جەتەكشى مۋزىكالىق ۇجىمدارىنىڭ ءبىرى. وركەستر 1991 جىلى الەمگە ايگىلى سكريپكاشى, قازاقستاننىڭ حالىق ءارتىسى, ەڭبەك ەرى, پروفەسسور, ۇجىمنىڭ كوركەمدىك جەتەكشىسى ايمان مۇساقوجاەۆانىڭ باستاماسىمەن قۇرىلعان.
