استانا. 25 ناۋرىز. مولدوۆا مەملەكەتىنىڭ قۇرامىنداعى گاگاۋزيا اۆتونوميالى قۇرىلىمى باشكانىن سايلاۋدىڭ رەسمي قورىتىندىسى شىعارىلدى. ول ءوزىن ءوزى ۇسىنعان يرينا ۆلاحتىڭ 50 پايىزدان جوعارى داۋىس الىپ, اكىمشىلىك-تەرريتوريالىق ايماقتىڭ باسشىسى بولعانىن ءمالىم ەتتى. بۇل تۋرالى ريا «نوۆوستي» حابارلادى. جەرگىلىكتى ورتالىق سايلاۋ كوميسسياسىنىڭ باسشىسى ۆالەنتين كارا جاڭا باسشىنىڭ ءسوزسىز جەڭىسكە جەتكەنىن حابارلادى. «حاتتامالاردى 100 پايىزدىق وڭدەۋدەن وتكىزگەننەن كەيىن يرينا ۆلاح 53,21% (35 مىڭ 343 ادام) داۋىس جينادى. ونىڭ باسەكەلەسى نيكولاي دۋدوگلو بار بولعانى 18,20% (12 مىڭ 86 ادام) داۋىس الدى. ءۇشىنشى ورىنداعىە ۆالەري يانيوگلو 7,65% (5 مىڭ 80 ادام) داۋىسقا يە بولدى», - دەدى ۆ.كارا. بۇعان دەيىن باشكان بولىپ كەلگەن ميحايل فورمۋزال جەڭىمپازعا قۇتتىقتاۋ جولدادى. گاگاۋزيانىڭ ورتالىق سايلاۋ كوميسسياسى مۇنىڭ الدىندا سايلاۋعا قاتىسقان سايلاۋشىلار ناتيجەلەرىن جاريالاعان ەدى. ول 58,10 %-دى قۇرايدى. سايلاۋ جەكسەنبى كۇنى وتكەن ەدى. اۆتونوميانىڭ باشكانى لاۋازىمىنا مۇندا 10 ۇمىتكەر تالاستى. اتاپ ءوتۋ كەرەك, مولدوۆا بيلىگى گاگاۋزياداعى سايلاۋدىڭ قورىتىندىسىنا الاڭداپ وتىر. ونداعىلار جاڭا باسشىلىقتىڭ مولدوۆا ارقىلى باتىسقا يەك ارتۋدىڭ ورنىنا رەسەيمەن قارىم-قاتىناستى جاقسارتۋعا كۇش سالماقشى بولىپ وتىرعانىن ونشالىقتى قولداي قويمايدى. مۇرات ايتقوجا.
