كەڭەسكە جەتىسۋ وبلىسىنىڭ اكىمى بەيبىت يساباەۆ, سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ, اۋىل شارۋاشىلىعى ۆيتسە-ءمينيسترى ازات سۇلتانوۆ قاتىستى. جيىندا سۋ تاپشىلىعى قاۋپىن ازايتۋعا سۋ ۇنەمدەۋ تەحنولوگيالارىن جەدەل ەنگىزۋ مەن ىلعالدى كوپ قاجەت ەتەتىن داقىلداردىڭ ەگىس كولەمىن كەزەڭ-كەزەڭىمەن قىسقارتۋ قاجەت ەكەنى ايتىلدى.
جەتىسۋ وبلىسىنىڭ اۋىل شارۋاشىلىعى قاجەتتىلىگىنە بيىلعا بەلگىلەنگەن سۋ پايدالانۋ ءليميتى 1,877 ملرد تەكشە مەتردى قۇرايدى. ونىڭ 1,837 ملرد تەكشە مەترى ەگىستىكتى سۋارۋعا باعىتتالعان. وبلىس اكىمدىگىنىڭ مالىمەتىنشە, وڭىردە جوسپارلانعان ەگىس القابى 147 مىڭ گەكتار, ال قازىرگى ۋاقىتتا بارلىق سۋ قويماسى سۋ جيناۋ رەجىمىندە جۇمىس ىستەپ تۇر.
زاماناۋي سۋارۋ جۇيەلەرىن ەنگىزۋدى ىنتالاندىرۋ ماقساتىندا ۇڭعىما بۇرعىلاۋ, ينفراقۇرىلىم تارتۋ مەن سۋ ۇنەمدەيتىن جابدىقتاردى ساتىپ الۋ شىعىندارىن وتەۋ ۇلەسى 50%-دان 80%-عا دەيىن ارتتى. بۇعان قوسا ەگىنگە قاجەتتى سۋعا سارالانعان تاريف ەنگىزىلىپ, سۋ ۇنەمدەۋ تەحنولوگيالارىن پايدالاناتىن شارۋالارعا سۋ قۇنىن سۋبسيديالاۋ 60%-دان 85%-عا دەيىن ۇلعايتىلدى. ال مۇنداي تەحنولوگيالاردى قولدانبايتىن شارۋاشىلىقتارعا سۋبسيديا مولشەرى جىل سايىن 10%-عا قىسقارتىلىپ وتىرادى.
قابىلدانعان شارالار ناتيجەسىندە سۋ ۇنەمدەۋ تەحنولوگيالارى ەنگىزىلەتىن القاپتاردىڭ كولەمى جىل سايىن 150 مىڭ گەكتارعا ۇلعايدى. بۇل مەملەكەت باسشىسىنىڭ تاپسىرماسىنا تولىق سايكەس كەلەدى. جالپى, ەل بويىنشا مۇنداي تەحنولوگيالار 543,5 مىڭ گەكتار سۋارمالى جەردە قولدانىلىپ, 874 ملن تەكشە مەتر سۋ ۇنەمدەلگەن. جەتىسۋ وبلىسىندا سۋ ۇنەمدەۋ جۇيەلەرى 33,7 مىڭ گەكتار القاپتا ەنگىزىلگەن.
قانات بوزىمباەۆ وبلىس اكىمدىگىنە 2030 جىلعا دەيىن سۋارمالى جەرلەردە سۋ ۇنەمدەۋ تەحنولوگيالارىن كەزەڭ-كەزەڭىمەن 100 پايىز ەنگىزۋدى قامتاماسىز ەتۋدى تاپسىردى. ونىڭ ايتۋىنشا, كەڭەس داۋىرىندە پايدالانۋعا بەرىلگەن سۋارمالى جەرلەردى قالپىنا كەلتىرۋگە ءارى مەليوراتيۆتىك جاعدايىن جاقسارتۋعا ەرەكشە كوڭىل ءبولۋ قاجەت. بۇرىن توزعان القاپتاردى اينالىمعا ەنگىزۋ ارقىلى سۋارمالى جەرلەردىڭ اۋماعىن كەڭەيتۋ ماڭىزدى. بۇعان قوسا سۋ سالاسىنداعى «قارا نارىقتى» تولىق جويىپ, بارلىق زاڭبۇزۋشىلىقتى قۇقىق قورعاۋ ورگاندارىنىڭ قاتىسۋىمەن قاتاڭ تۇردە توقتاتۋ قاجەت ەكەنى ايتىلدى.
ەگىنگە قاجەتتى سۋدى اشىق ءارى ءادىل ءبولۋ ماقساتىندا پيلوتتىق رەجىمدە جاڭا بيللينگ جۇيەسى ەنگىزىلىپ جاتىر. بۇل جۇيە ارقىلى سۋ پايدالانۋشىلار مەن «قازسۋشار» رمك اراسىنداعى ءوتىنىم بەرۋ, كەلىسىمشارت جاساۋ مەن تولەم جۇرگىزۋ ۇدەرىستەرى تولىق تسيفرلاندىرىلعان. فەرمەرلەرگە ءتۇسىندىرۋ جۇمىستارىن جۇرگىزۋگە ارنايى جۇمىس توبى قۇرىلىپ, وبلىستىڭ التى اۋدانىندا شامامەن 450 شارۋامەن كەزدەسۋ ءوتتى.
2028 جىلعا دەيىنگى سۋ شارۋاشىلىعىن كەشەندى دامىتۋ جوسپارى اياسىندا ءۇش سۋ قويماسىن, ەكى گيدروتوراپتى, ءبىر ماگيسترالدى كانالدى رەكونسترۋكتسيالاۋعا ارنالعان جوبالاۋ-سمەتالىق قۇجات ازىرلەنىپ جاتىر. سونداي-اق جەكە ينۆەستيتسيالار ەسەبىنەن سىيىمدىلىعى 80 ملن تەكشە مەتر بولاتىن ءبىر سۋ قويماسىن سالۋ مەن تاعى جەتى سۋ قويماسىنىڭ قۇرىلىسىنا تەحنيكالىق-ەكونوميكالىق نەگىزدەمە دايىنداۋ جوسپارلانعان. بۇدان بولەك 2 مىڭ شاقىرىمنان استام سۋارۋ كانالىن قالپىنا كەلتىرۋ مەن 400 شاقىرىمعا جۋىق كانالعا اۆتوماتتاندىرۋ جۇيەسىن ەنگىزۋ كوزدەلگەن.
يسلام دامۋ بانكىمەن بىرلەسىپ, وڭىردە سۋارۋ جەلىلەرىن رەكونسترۋكتسيالاۋ بويىنشا التى جوبا ىسكە اسىرىلىپ جاتىر. ونىڭ بىرەۋى اياقتالعان, ال جالپى ۇزىندىعى 400 شاقىرىمنان اساتىن تاعى ەكى جوبا بيىل پايدالانۋعا بەرىلەدى. ۆيتسە-پرەمەر وبلىس اكىمدىگى مەن سۋ رەسۋرستارى جانە يرريگاتسيا مينيسترلىگىنە بارلىق جوبانىڭ ۋاقتىلى ءارى ساپالى ورىندالۋىن قامتاماسىز ەتۋدى تاپسىردى.
بۇعان قوسا ساپار بارىسىندا اۋىلدىق اۋماقتاردىڭ تۇراقتى دامۋىنا باعىتتالعان «اۋىل اماناتى» باعدارلاماسىنىڭ جۇزەگە اسىرىلۋ بارىسى تالقىلاندى. باعدارلاما اۋىل تۇرعىندارىنىڭ ءومىر ساپاسىن بيۋدجەتتىك ميكرونەسيەلەر بەرۋ ارقىلى ارتتىرۋدى كوزدەيدى. 2026–2028 جىلدارى رەسپۋبليكا بويىنشا بۇل ماقساتقا 450 ملرد تەڭگە ءبولىنۋ جوسپارلانعان, ونىڭ 22,6 ملرد تەڭگەسى – جەتىسۋ وبلىسىنا تيەسىلى. بيىل وڭىردە اۋىل كاسىپكەرلىگى مەن كووپەراتسيانى دامىتۋعا باعىتتالعان شامامەن 400 جوبانى ىسكە اسىرۋ كوزدەلىپ وتىر. وبلىس اكىمدىگى مەن ۇلتتىق ەكونوميكا مينيسترلىگىنە باعدارلامانىڭ ساپالى ورىندالۋىن ەرەكشە باقىلاۋدا ۇستاۋ تاپسىرىلدى.
