سۋرەت: baq.kz
بۇگىندە ۇلتتىق جوباعا قاتىسۋعا كوممۋنالدىق كاسىپورىندار تاراپىنان جوعارى قىزىعۋشىلىق بايقالادى. وسى كۇنگە دەيىن 101 كاسىپورىن 439 جوبانى جۇزەگە اسىرۋعا ءوتىنىم بەرسە, 34 جوبا جۇزەگە اسىرىلىپ جاتىر, تاعى 65 جوبا باستالماق. ۆيتسە-پرەمەر ءساۋىر-مامىر ايلارىندا جوندەۋ جۇمىستارىنىڭ بەلسەندى كەزەڭىنە وتۋىنە بايلانىستى تەحنيكالىق وپەراتورمەن بىرلەسىپ, ۇلتتىق جوبانىڭ جوسپار-كەستەسىنىڭ ورىندالۋىنا مونيتورينگ جۇرگىزىپ, باقىلاۋدى كۇشەيتۋدى تاپسىردى.
«جوسپار-كەستەدە جەلىلەردىڭ پارامەترلەرىن, ءار وڭىردە ينفراقۇرىلىم باعىتىمەن قارجىلاندىرۋ مولشەرى, ناقتى مىندەتتەر مەن كورسەتكىشتەر جازىلعان. بيىل ءبىز جىلۋمەن جابدىقتاۋدا توزۋ دەڭگەيىن 48%-عا دەيىن, ەلەكترمەن جابدىقتاۋدا 62%-عا دەيىن, سۋمەن جابدىقتاۋدا 37%-عا دەيىن, سۋ بۇرۋدا 49%-عا دەيىن تومەندەتۋگە قول جەتكىزۋىمىز كەرەك. سونداي-اق جاڭا ەنەرگەتيكالىق قۋاتتاردى ىسكە قوسۋ دا ماڭىزدى. سوندىقتان جوسپار-كەستەنى قاتاڭ ساقتاۋعا ءتيىسپىز», دەدى قانات بوزىمباەۆ.
ءوڭىر اكىمدىكتەرىنە «قىزىل ايماقتا» تۇرعان كاسىپورىندارمەن جۇمىستى جەدەلدەتۋدى تاپسىردى. قازىر ۇلتتىق جوباعا شامامەن 54 وسىنداي سۋبەكت كىرەدى.
وتىرىس بارىسىندا كارىزدىك-تازارتۋ قۇرىلىستارىن (كتق) جاڭعىرتۋعا ەرەكشە نازار اۋدارىلدى. ۇلتتىق جوبا اياسىندا 36 كتق قامتىلعان. ولاردى قارجىلاندىرۋ تەتىكتەرى تالقىلاندى. جەرگىلىكتى اتقارۋشى ورگانداردىڭ مەملەكەتتىك باعالى قاعازدارى ەسەبىنەن دە, حالىقارالىق قارجى ينستيتۋتتارىنىڭ قاراجاتىن تارتۋ ارقىلى دا تۇيتكىلدى شەشۋ ماڭىزدى. كتق جوبالارىن جۇزەگە اسىرۋ ءۇشىن, ونىڭ ىشىندە دۇنيەجۇزىلىك بانكپەن جۇمىس باعىتتارىن قامتيتىن جول كارتاسى بەكىتىلەدى. اكىمدىكتەرگە, تەحنيكالىق جانە قارجىلىق وپەراتورلارعا ءتيىستى تاپسىرمالار بەرىلدى.
قانات بوزىمباەۆ ەنەرگەتيكالىق جانە كوممۋنالدىق سەكتورلاردى جاڭعىرتۋ جونىندەگى ۇلتتىق جوبا شەڭبەرىندە جۇزەگە اسىرىلاتىن بارلىق شارۋانى ۋاقتىلى قارجىلاندىرۋدى قامتاماسىز ەتۋدىڭ ماڭىزدىلىعىن اتاپ ءوتتى. «بايتەرەك» ۇلتتىق ينۆەستيتسيالىق حولدينگىنىڭ دەرەگىنشە جالپى قۇنى 148 ملرد تەڭگە بولاتىن 76 جوبا قارالدى.
ۇلتتىق جوبا اياسىنداعى نەگىزگى كرەديتورلاردىڭ ءبىرى – قازاقستاننىڭ دامۋ بانكى. بانكتىك ساراپتامانىڭ ءارتۇرلى كەزەڭدەرىندە 14 كوممۋنالدىق كاسىپورىننىڭ جالپى جوبالىق قۇنى شامامەن 375 ملرد تەڭگەنى قۇرايتىن كرەديتتىك وتىنىمدەرى قارالۋدا. قارجىلاندىرۋدىڭ تاعى ءبىر كوزى – مەملەكەتتىك باعالى قاعازدار. بىلتىر 15 جوبانى جۇزەگە اسىرۋ ءۇشىن 29,3 ملرد تەڭگەگە جەرگىلىكتى اتقارۋشى ورگانداردىڭ مەملەكەتتىك باعالى قاعازدارى ساتىپ الىندى. بيىل وسى جوبالاردى اياقتاۋعا قوسىمشا 26 ملرد تەڭگە باعىتتاۋ جوسپارلانىپ وتىر.
ۇلتتىق جوبانى ۇزدىكسىز جۇزەگە اسىرۋدى قامتاماسىز ەتۋ ماقساتىندا ۆيتسە-پرەمەر ساتىپ الۋلار بويىنشا ەلەكتروندىق پلاتفورمانى جەتىلدىرۋدى تاپسىردى. سونداي-اق سالالىق ۆەدومستۆولارعا ەسەپكە الۋ قۇرىلعىلارىنا قاتىستى بىرىڭعاي ستاندارتتاردى قابىلداۋدى جەدەلدەتۋدى جۇكتەدى. سونىمەن قاتار بيىل جازدا ىسكە قوسىلادى دەپ جوسپارلانعان «Smart Turmys» اقپاراتتىق جۇيەسىن ۋاقىتىندا ەنگىزۋدى تاپسىردى.
