كۇنى كەشە ول الماتىعا جەتتى. رەسپۋبليكا سارايىندا ۇيىمداستىرىلعان ءىس-شاراعا يتاليانىڭ ايگىلى فۋتبولشىسى, 2006 جىلعى الەم چەمپيونى, 2010 جىلعى كلۋبتىق الەم بىرىنشىلىگى مەن ۋەفا چەمپيوندار ليگاسىنىڭ جەڭىمپازى, باسقا دا كوپتەگەن اتاقتىڭ يەگەرى ماركو ماتەراتستسي قاتىستى. اپەننين تۇبەگىنەن كەلگەن تاسقامال قورعاۋشى «Trophy Tour» تۋرى تۋرالى اڭگىمەلەپ, وسى ءىستىڭ ءمان-ماڭىزىنا كەڭىنەن توقتالدى, جۋرناليستەر مەن جينالعان قاۋىمنىڭ سان الۋان سۇراقتارىنا جاۋاپ قايتاردى.
جيىنعا ماركو ماتەراتستسيدەن بولەك, فيفا دەلەگاتسياسى, الماتى قالاسى اكىمدىگى, فۋتبول فەدەراتسياسىنىڭ وكىلدەرى, وسى تۋردىڭ ۇيىمداسترۋشىسى «Coca-Cola» مەن «CCI» كومپانيالارىنىڭ باس ديرەكتورلارى – سەركان ديلەك پەن ۆەلي دينچەل قاتىستى. سالتاناتتى ءراسىم اياقتالعان سوڭ باق وكىلدەرى مەن باسقا دا قاتىسۋشىلار الەم كۋبوگىمەن ەستەلىك فوتوعا ءتۇستى.
الەم كۋبوگىنىڭ سالماعى – 6,142 كگ. ءمۇسىن 18 كاراتتى تازا التىننان جاسالعان. بۇل كۋبوكتى كەزىندە دۇنيەجۇزىلىك دوپ دوداسىندا تەڭدەسسىز دەپ تانىلعان كوماندالاردىڭ اتى اڭىزعا اينالعان اياق دوپ شەبەرلەرى توبەسىنە كوتەردى. سوڭعى رەت 2022 جىلى قاتاردا ۇيىمداستىرىلعان جارىستا ارگەنتينا قۇراماسى توپ جاردى. سول كەزدە التىن ءمۇسىن ءجۇزى بال-بۇل جايناعان داڭقتى ليونەل مەسسيدىڭ قولىندا بولدى. نەگىزى ول شۆەيتساريانىڭ فيفا مۋزەيىندە ساقتالىپ, تەك الەم چەمپيوناتى وتەتىن جىلى عانا سىرتقا شىعارىلادى. الدىمەن الەمدى شارلايدى, سودان كەيىن چەمپيوناتتى قابىلدايتىن مەملەكەتكە جەتكىزىلەدى. فينالدىق ماتچتان سوڭ كۋبوك باس جۇلدەنى ولجالاعان كومانداعا تابىس ەتىلەدى. سالتاناتتى ءراسىم اياقتالعاننان كەيىن تۇپنۇسقا قايتا مۋزەيگە قايتارىلىپ, جەڭىمپازدارعا كۋبوكتىڭ كوشىرمەسى تابىس ەتىلەدى.
