قازاق قىزى شاڭعى اكروباتيكاسىنان الەمدىك دودادا ولجا سالدى

استانا. 25 ناۋرىز. فريستايلدان جاسوسپىرىمدەر اراسىنداعى الەم چەمپيوناتىندا قازاق قىزى جانبوتا الدابەرگەنوۆا شاڭعى اكروباتيكاسى بويىنشا سىنعا ءتۇسىپ, كۇمىس جۇلدەنى قورجىنعا سالدى. بۇل تۋرالى egemen.kz حابارلادى. جارىس يتاليانىڭ كەزا-ين-ۆالمالەنكو قالاسىندا وتۋدە. بارلىق جاتتىعۋىن ءساتتى ورىنداعان جانبوتانى تورەشىلەر 163,11 ۇپايمەن باعالادى. ءبىزدىڭ قىز الەم چەمپيونى اتانعان الەكساندرا رومانوۆسكايادان (بەلارۋس) ەكى-اق ۇپايعا قالىپ قويدى. بەلورۋس قىزىنىڭ كورسەتكىشى 165,19 ۇپاي. بۇل سىندا ۇزدىك ۇشتىكتى اقش سپورتشىسى ەللە گاۋدەتت تۇيىندەدى (146,59 ۇپاي). جانبوتا الدابەرگەنوۆا شاڭعى اكروباتيكاسى بويىنشا ەل نامىسىن ابىرويمەن قورعاپ جۇرگەن سپورتشى. 2014 جىلى سوچي وليمپياداسىندا 6-ورىنعا تابان تىرەدى. بۇل كورسەتكىش ازىرگە قازاق قىزدارى ءۇشىن اق وليمپياداداعى ەڭ جوعارى مەجە. ودان بولەك, وتكەن جىلى ەۋروپا كۋبوگىنىڭ كەزەڭىندە جەڭىمپاز اتاندى. ال سول سايىستىڭ جالپى ەسەبىندە 350 ۇپايمەن كۇمىس جۇلدەنى قانجىعاسىنا بايلاعانى ەسىمىزدە. ەلامان قوڭىر. دەرەك: egemen.kz. سۋرەت: vesti.kz.