ەكى ەل تەحنولوگيالار ترانسفەرى ماسەلەلەرى مەن ەكى ەلدىڭ سالالىق ۆەدومستۆولارى مەن ىسكەر توپتارى اراسىنداعى پراكتيكالىق ىنتىماقتاستىقتى كەڭەيتپەك. ساپار اياسىندا ەكى ەلدىڭ سىرتقى ساياسي ۆەدومستۆولارى اراسىندا ساياسي كونسۋلتاتسيالاردىڭ 12-راۋندى ءوتتى. وندا حالىقارالىق جانە وڭىرلىك كۇن تارتىبىندەگى ماسەلەلەر ءسوز بولدى, سونىڭ ىشىندە تاياۋ شىعىستاعى جاعدايدى بەيبىت جولمەن شەشۋگە جاردەمدەسۋ تەتىكتەرى قارالدى. وسى تۇرعىدا ەلىمىزدىڭ گازاداعى بەيبىتشىلىك كەڭەسىنىڭ قىزمەتىنە قاتىسۋى, سونداي-اق يبراھيم كەلىسىمدەرى اياسىنداعى ءوزارا ءىس-قيمىل ماسەلەلەرى تالقىلاندى.
«1992 جىلدىڭ ساۋىرىندە ديپلوماتيالىق قاتىناستار ورناعان ساتتەن باستاپ ءبىز ءوزارا قۇرمەت پەن سەنىمگە نەگىزدەلگەن جان-جاقتى ىنتىماقتاستىقتى قالىپتاستىرا وتىرىپ, ساياسي, ەكونوميكالىق جانە مادەني سالادا ەلەۋلى ناتيجەلەرگە قول جەتكىزدىك. ءسىزدىڭ استاناعا ساپارىڭىز – سەرىكتەستىگىمىزدى جاڭا دەڭگەيگە كوتەرۋگە دەگەن ورتاق مۇددەمىزدىڭ ايقىن دالەلى», دەپ اتاپ ءوتتى ە.كوشەرباەۆ يزرايلدىك ارىپتەسىمەن كەزدەسۋ بارىسىندا.
ءسىم باسشىسى قازىرگى كەزەڭدەگى ەكىجاقتى ىنتىماقتاستىققا ءتان ديالوگتىڭ جاندانۋىنا توقتالا كەلە, بۇل ۇدەرىستە ەكى مەملەكەتتىڭ باسشىلارى ماڭىزدى ءرول اتقاراتىنىن اتاپ ءوتتى. قۇقىقتىق نەگىزدىڭ بەرىك ەكەنىنە توقتالعان ە.كوشەرباەۆ ساۋدا, ينۆەستيتسيالىق جانە تەحنولوگيالىق ىنتىماقتاستىقتى كەڭەيتۋ ءۇشىن جوعارى الەۋەت بار ەكەنىن, سونداي-اق اگروتەحنولوگيالار مەن تاماق ونەركاسىبى, دەنساۋلىق ساقتاۋ, فارماتسەۆتيكا مەن مەديتسينالىق تەحنولوگيالار, ينفراقۇرىلىم مەن لوگيستيكا, ەنەرگيا تيىمدىلىگى مەن جاڭارتىلاتىن ەنەرگيا كوزدەرى سياقتى سالالاردا جوعارى قوسىلعان قۇنى بار بىرلەسكەن جوبالاردى ىسكە اسىرۋعا ەلىمىزدىڭ مۇددەلى ەكەنىن جەتكىزدى. سونىمەن قاتار ول قازاقستاننىڭ بۇۇ-نىڭ ونلاين-قىزمەتتەر يندەكسى مەن دۇنيەجۇزىلىك بانكتىڭ GovTech جەتىلۋ يندەكسى بويىنشا تسيفرلىق تەحنولوگيالار سالاسىندا الەمدىك كوشباسشىلاردىڭ قاتارىندا ەكەنىن اتاپ ءوتىپ, يزرايلدىك كومپانيالاردى بەلسەندى ىنتىماقتاستىققا شاقىردى.
ءوز كەزەگىندە يزرايل ءسىم باسشىسى ءوزارا قىزىعۋشىلىق تۋدىراتىن بارلىق باعىت بويىنشا ىنتىماقتاستىقتى كەڭەيتۋگە دايىن ەكەنىن راستاپ, ەكىجاقتى ەكونوميكالىق جانە مادەني-گۋمانيتارلىق بايلانىستاردى نىعايتۋدىڭ ماڭىزدىلىعىن اتاپ ءوتتى. ساياسي كونسۋلتاتسيالاردىڭ 12-راۋندىنىڭ قورىتىندىسى بويىنشا ديپلوماتيالىق كادرلاردى دايارلاۋ مەن قوعامدىق ديپلوماتيا سالاسىنداعى ىنتىماقتاستىق تۋرالى مەموراندۋمدار, سونداي-اق تۋريستىك الماسۋلاردى دامىتۋ ماقساتىندا ۇلتتىق پاسپورت يەلەرىن ۆيزالىق تالاپتاردان بوساتۋ جونىندەگى ەلىمىزدىڭ ۇكىمەتى مەن يزرايل ۇكىمەتى اراسىنداعى كەلىسىمگە نيەتتىلىگى تۋرالى مەموراندۋمعا قول قويىلدى.
ساپار اياسىندا ەكى ەلدىڭ ىسكەر توپتارىنىڭ قاتىسۋىمەن بيزنەس-فورۋم ۇيىمداستىرىلىپ, B2B جانە B2G فورماتتارىندا كەزدەسۋلەر ءوتتى. جوعارى تەحنولوگيالى اۋىل شارۋاشىلىعى, سۋ رەسۋرستارىن باسقارۋ جانە تسيفرلىق تەحنولوگيالار سياقتى باسىم سالالاردا بىرلەسكەن جوبالاردى ىسكە اسىرۋ پەرسپەكتيۆالارى تالقىلاندى.
