بۇل قويىلىم – سوعىس پەن تاعدىر, ءۇمىت پەن جوعالتۋدىڭ اراسىنداعى ادامدىق درامانى نازىك پسيحولوگيالىق يىرىمدەر ارقىلى بەينەلەيتىن ساحنالىق تۋىندى. ايتماتوۆ پروزاسىنا ءتان ىشكى تىنىشتىق پەن جان ايقايى سپەكتاكل بويىنان ايقىن سەزىلدى. اسىرەسە انانىڭ تاعدىرى, كۇتۋ مەن سەنىمنىڭ اراسىنداعى كۇي كورەرمەندى بەيجاي قالدىرمادى.
قويىلىم رەجيسسەرى عوفۋر ماردونوۆتىڭ كوركەمدىك شەشىمى مەن ساحنالىق ويلاۋ كوكجيەگى, ينستسەنيروۆكا اۆتورى ساردور حامروەۆتىڭ دراماتۋرگيالىق شەشىمى ارقىلى شىعارما مازمۇنى زامان تالابىنا ساي جاڭاشا تىنىس الىپ, ادام تاعدىرى, سوعىس قاسىرەتى, انانىڭ ءۇمىتى مەن رۋح كۇشى اسەرلى اشىلدى.
عوفۋر ماردونوۆ درامانىڭ فيلوسوفيالىق سالماعىن سىرتقى ەففەكتىلەرمەن ەمەس, اكتەرلىك ءانسامبلدىڭ تۇتاستىعى مەن ىشكى دراماتيزم ارقىلى ساراپتاۋعا دەن قويعان. تەاتر ارتىستەرى دە سپەكتاكلدە جەكە دارالىققا ەمەس, ورتاق وي مەن سەزىمدى جەتكىزۋگە ۇمتىلدى. ساحناداعى ءاربىر قوزعالىس, ۇنسىزدىك پەن ءۇزىلىس – كەيىپكەر جانىنداعى تولقىنىستىڭ كورىنىسى. اكتەرلىك ءانسامبلدىڭ تۇتاستىعى مەن كاسىبي شەبەرلىگى قويىلىمنىڭ كوركەمدىك قۋاتىن ارتتىرىپ, كورەرمەن ىقىلاسىنا بولەندى. بۇل – ۇجىم ىزدەنىسىنىڭ باستى كوركەمدىك جەتىستىگى.
ءيا, «ەرتە قايتقان تىرنالار» – ساحنادان كوتەرىلگەن ساعىنىشتىڭ, ءۇمىتتىڭ, ادامدىق ءتوزىمنىڭ ءرامىزى. ال كاتتاقورعان دراما تەاترى اتالعان تۋىندى ارقىلى ءوز ونەرىنىڭ بيىك دەڭگەيىن, شىعارماشىلىق مۇمكىندىگىن ايقىن كورسەتە الدى.
استانا كورەرمەنى سپەكتاكلدى زور ىقىلاسپەن قابىلدادى. قويىلىم باۋىرلاس حالىقتار اراسىنداعى رۋحاني بايلانىس پەن تەاترداعى شىعارماشىلىق تاجىريبە الماسۋدىڭ ايقىن مىسالى رەتىندە باعالاندى. ال ايتۋلى ونەر ساپارى ەكى ەل اراسىنداعى مادەني قارىم-قاتىناستى نىعايتىپ قانا قويماي, قازاق پەن وزبەك كورەرمەنىنە ايتماتوۆ الەمىنىڭ بىردەي تۇسىنىكتى ەكەنىن تاعى ءبىر مارتە دالەلدەدى.
