فوتو: shefit.m.ru
ەسكە سالايىق, 2025 جىلدىڭ جەلتوقسانىندا مينيسترلىك وقۋشىلاردىڭ وقۋ جۇكتەمەسىن ازايتۋ ماقساتىندا بىرقاتار پاندەردى بىرىكتىرۋ مۇمكىندىگىن قاراستىرعان ەدى. اتاپ ايتقاندا, الگەبرا مەن گەومەتريانى «ماتەماتيكا» پانىنە, فيزيكا, حيميا جانە بيولوگيانى «جاراتىلىستانۋ عىلىمدارىنا», ال دۇنيەجۇزى تاريحى مەن قۇقىق نەگىزدەرىن «الەۋمەتتىك عىلىمعا» بىرىكتىرۋ ۇسىنىلعان بولاتىن.
الايدا بۇل باستاما جان-جاقتى سارالانىپ, ءبىلىم بەرۋ قاۋىمداستىعىمەن كەڭىنەن تالقىلانعان سوڭ, ازىرگە جۇزەگە اسىرىلمايتىن بولدى.
«2025 جىلى القالى جيىندا ءۇش ءپاندى – فيزيكا, حيميا, بيولوگيانى «جاراتىلىستانۋ عىلىمدارىنا», الگەبرا مەن گەومەتريانى «ماتەماتيكاعا», دۇنيەجۇزى تاريحى مەن قۇقىق نەگىزدەرىن «الەۋمەتتىك عىلىمعا» بىرىكتىرۋ قاجەت دەگەن شەشىم قابىلدانعان ەدى. الايدا بۇل رەفورمانى توقتاتتىق. ءبىز ىرگەلى عىلىمدار بولەك وقىتىلۋى ءتيىس دەپ ەسەپتەيمىز», دەدى جۇلدىز سۇلەيمەنوۆا.
ءمينيستردىڭ ايتۋىنشا, بۇل ماسەلە مۇعالىمدەرمەن دە تالقىلانعان. پەداگوگتەر ىرگەلى پاندەردىڭ جەكە-جەكە وقىتىلۋى وقۋشىلاردىڭ بازالىق ءبىلىمىن قالىپتاستىرۋدا ماڭىزدى ەكەنىن اتاپ وتكەن.
وسىلايشا, مينيسترلىك قازىرگى كەزەڭدە مەكتەپ باعدارلاماسىنىڭ تۇراقتىلىعىن ساقتاۋعا جانە نەگىزگى پاندەردىڭ مازمۇنىن تەرەڭدەتىپ وقىتۋعا باسىمدىق بەرىپ وتىر.
