سۇرانىس قۇرىلىمىندا بۇرىنعىداي الەۋمەتتىك, بازالىق سالالار جەتەكشى ورىنعا يە. مىسالى, وتكەن ايدا بوس جۇمىس ورنى ءبىلىم سالاسىندا كوپ تىركەلدى. ناقتىلاساق, جۇمىس بەرۋشىلەر 23,3 مىڭ ورىن ۇسىنسا, بۇل جالپى كولەمنىڭ 21,3%-ىن قۇرايدى. وزگە قىزمەت تۇرلەرىنە تيەسىلى كورسەتكىش وسىعان جۋىق بولدى – 23,2 مىڭ بوس ورىن (21,2%). سول سەكىلدى اۋىل, ورمان, بالىق شارۋاشىلىعىندا دا جوعارى سۇرانىس ساقتالىپ, 18,7 مىڭ بوس جۇمىس ورنى جاريالانعان (17,1%). وسى ءۇش باعىت جەلتوقساندا جاريالانعان بارلىق بوس ورىنداردىڭ شامامەن 60%-ىن قامتىعان. سونداي-اق دەنساۋلىق جانە الەۋمەتتىك سالادا (7,2 مىڭ بوس ورىن), وڭدەۋشى ونەركاسىپتە (6,2 مىڭ), كوتەرمە جانە بولشەك ساۋدادا (6,1 مىڭ), قۇرىلىس سالاسىندا (3,8 مىڭ بوس ورىن) دا سۇرانىس ساقتالعان. بۇل دەگەنىڭىز, جىلدىڭ سوڭىنا قاراي دا جۇمىس بەرۋشىلەر ەكونوميكانىڭ نەگىزگى سالالارى ءۇشىن قىزمەتكەرلەردى بەلسەندى تۇردە ىزدەگەنىن كورسەتەدى.
جۇمىس ىزدەۋشىلەرگە توقتالساق, كەيىنگى ايلاردا الەۋمەتتىك جانە كەڭسە جۇمىسىمەن بايلانىستى ماماندىق يەلەرى ەرەكشە بەلسەندى بولدى. ەڭ ءجيى جاريالانعان تۇيىندەمەلەر ەسەپشىلەرگە (1 463), زاڭگەرلەرگە (1 132), مەيىربيكەلەرگە (1 181) تيەسىلى. گەندەرلىك تۇرعىدان العاندا, جۇمىس ىزدەۋشىلەردىڭ بەلسەندىلىگى شامالاس دەڭگەيدە قالىپتاسقان. تۇيىندەمەلەردىڭ 52,1%-ىن ايەلدەر, 47,9%-ىن ەرلەر ورنالاستىرعان. ايەلدەر كوبىنە ءبىلىم, دەنساۋلىق, بۋحگالتەريا سالالارىندا جۇمىس ىزدەسە, ەر ادامدار تەحنيكالىق, باسقارۋشىلىق باعىتتارعا كوبىرەك قىزىعۋشىلىق تانىتىپتى.
ەسكەرەتىن جايت, جاستار بارلىق جۇمىس ىزدەۋشىلەردىڭ 40,8%-ىن قۇراعان. ونىڭ ىشىندە 24 جاسقا دەيىنگى جاستار – 15,2%. 35-44 جاس ارالىعىنداعى ازاماتتار – 29,9%, 45-54 جاس ساناتى – 19,1%, 55 جاستان اسقانداردىڭ ۇلەسى – 10,2%.
جالاقى دەڭگەيى بويىنشا بوس جۇمىس ورىندارى اراسىندا ەڭ جوعارى ۇسىنىستار ءوندىرىس باسشىسى (شامامەن 1,8 ملن تەڭگە), كەنىش ديرەكتورى (شامامەن 1 ملن تەڭگە), ينجەنەر-حيميك (شامامەن 1 ملن تەڭگە) لاۋازىمدارىنا قاتىستى تىركەلگەن. جۇمىس ىزدەۋشىلەر تاراپىنان ەڭ جوعارى جالاقىنى اگرونوم-ەنتومولوگتەر (شامامەن 3,4 ملن تەڭگە), ستيۋاردەسسالار (شامامەن 3,3 ملن تەڭگە), كومپيۋتەرلىك جابدىقتى مونتاجداۋشىلار (شامامەن
2,7 ملن تەڭگە) سۇراعان.
كەيىنگى كەزدەرى ەلەكتروندىق ەڭبەك بيرجاسىندا بوس جۇمىس ورىندارى كوبەيىپ, جۇمىس ىزدەۋشىلەر اسا بەلسەندىلىك تانىتپاعان. ساراپشىلار مۇنى جىل ايرىعىنا ءتان قۇبىلىس دەپ سانايدى. سەبەبى جۇمىس بەرۋشىلەر قىستا كادر ىزدەۋدى جالعاستىرسا, جۇمىس ىزدەۋشىلەردىڭ كوبى جۇمىسقا ورنالاسۋ جوسپارىن جاڭا جىلدىڭ باسىنا قالدىرادى. دەمەك بۇل جاعداي ماۋسىمدىق سيپاتقا يە. قاڭتاردان كەيىن جۇمىس ىزدەۋشىلەردىڭ بەلسەندىلىگى ارتىپ, ەڭبەك نارىعىندا اناعۇرلىم تەڭگەرىمدى احۋال قالىپتاسۋى مۇمكىن.
