حالىقارالىق ساحنادا ۇسىنىلعان كونتسەرتتىك باعدارلاما كورەرمەندى ۇلتتىق ونەردىڭ تەرەڭىنە جەتەلەدى. بەلگىلى حورەوگراف, ساحنا مادەنيەتىندە وزىندىك قولتاڭباسى بار انەل ماراباەۆا ورىنداعان «اققۋ» ءبيى نازىكتىك پەن سۇلۋلىقتىڭ رامىزىندەي اسەر قالدىردى. قوزعالىس پەن سەزىمنىڭ ۇيلەسىمى ارقىلى كورەرمەن جۇرەگىنە جول تاپقان تۋىندى قازاق بي ونەرىنىڭ بيىك دەڭگەيىن تانىتتى.
ال وپەرا ءانشىسى ايگەرىم التىنبەكتىڭ ورىنداۋىنداعى «القوڭىر» ءانى زالدى تەربەپ, دالانىڭ كەڭ تىنىسىن, ۇلتتىق بولمىستىڭ سىرلى اۋەزىن كارى كۇرلىق تورىندە اۋەلەتتى. ءاننىڭ اسەم يىرىمدەرى مەن ورىنداۋشىنىڭ كاسىبي شەبەرلىگى شەتەلدىك تىڭدارماندى بەيجاي قالدىرماي, قازاق ۆوكال ونەرىنە دەگەن زور قىزىعۋشىلىق تۋعىزدى. سونىمەن قاتار «Temirlan & Yernat» توبى ورىنداعان «Alem» كۇيى ءداستۇرلى كۇي ونەرىن زاماناۋي ستيلمەن ساباقتاستىرىپ, كونتسەرتكە ەرەكشە سەرپىن بەردى.
«تۇركى اپتالىعى» تۇركى مەملەكەتتەرى ۇيىمىنىڭ (تمۇ) باستاماسىمەن وتكىزىلىپ, ۇيىمعا مۇشە ەلدەردىڭ مادەني-گۋمانيتارلىق ىنتىماقتاستىعىن تەرەڭدەتە ءتۇستى. اپتا بويى ۇيىمداستىرىلعان كونتسەرتتەر مەن مادەني باعدارلامالار ارقىلى تۇركى حالىقتارىنىڭ ورتاق تاريحى, باي مۋزىكالىق مۇراسى مەن بي ونەرى كەڭىنەن ناسيحاتتالدى. اپتالىق شەڭبەرىندە وتكەن گالا-كونتسەرتكە ازەربايجان, قازاقستان, قىرعىزستان, تۇركيا, وزبەكستان ەلدەرىنىڭ شىعارماشىلىق ۇجىمدارى قاتىسىپ, ءار حالىقتىڭ وزىندىك بولمىسىن, ونەردەگى ەرەكشەلىگىن كورسەتتى. ورتاق ساحنادا توعىسقان بۇل ونەر مەرەكەسى تۇركى جۇرتىنىڭ بىرلىگى مەن مادەني جاقىندىعىن ايقىن اڭعارتىپ, ۆەنا جۇرتشىلىعى مەن قالا قوناقتارىنا ۇمىتىلماس رۋحاني اسەر سىيلادى.
