تاعى دا استان ۋلانۋ ما؟

ءبىر انىعى جيىرمادان استام ءجاسوسپىرىم اۋداندىق كوپبەيىندى اۋرۋحاناعا تۇسكەنى راستالدى. قىزىلوردالىق جاسوسپىرىمدەر مەركىدەگى «تۇران» دەمالىس ايماعىنان اۋرۋحاناعا جەت­كىزىلگەن. ولار مۇندا وقۋ-جات­تىعۋ جيىنىن وتكىزۋ ءۇشىن كەلگەن ەكەن.

«2026 جىلعى 21 قاڭتار كۇنى ساعات 22:40 شاماسىندا مەركى اۋداندىق كوپبەيىندى ورتالىق اۋرۋحاناسىنا «تۇران» دەمالىس ورنىنان قىزىلوردا وبلىسىنان اۋدانعا كۇرەس تۇرىنەن وقۋ-جاتتىعۋ جيىنىنا كەلگەن 12-17 جاس ارالىعىنداعى 22 كامەلەتكە تولماعان ءجاسوسپىرىم جەتكىزىلدى. ولاردىڭ 21-ءى بويىنشا الدىن الا دياگنوز – ەتيولوگياسى انىقتالماعان گاستروەنتەريت. بالالاردىڭ بىرەۋى اياق جاراقاتى بويىنشا دارىگەر كومەگىنە جۇگىنگەن.

اۋرۋدىڭ سەبەبىن انىقتاۋ ماقساتىندا ناۋقاستار مەن تاعام ونىمدەرىنەن زەرت­­حانالىق ساراپتامالار الىنعان, قورىتىندىسى ءالى جاريا ەتىلگەن جوق. اتالعان جاعداي بويىنشا وبلىستىق سانيتارلىق-ەپيدەميولوگيالىق باقىلاۋ دەپارتامەنتى ءتيىستى تەكسەرۋ جۇمىستارىن جۇرگىزىپ جاتىر. سونىمەن قاتار بۇل دەرەك 2026 جىلعى 21 قاڭتاردا مەركى اۋداندىق پوليتسيا بولىمىندە تىركەلىپ, قۇزىرلى ورگاننىڭ تەكسەرۋ قورىتىندىسى نەگىزىندە ءتيىستى ۇدەرىستىك شەشىم قا­بىل­داناتىن بولادى.

وبلىس اكىمى ەربول قارا­شوكەەۆتىڭ تاپسىرماسىنا سايكەس وقيعا ورنىنا وبلىس اكىمىنىڭ ورىنباسارلارى اي­جان ەسماعامبەتوۆا مەن سەرىك سالەموۆ بارىپ, جەدەل شتاب وتىرىسىن وتكىزدى. بالالار مەديتسينالىق باقىلاۋعا الىن­عان, ءتيىستى ورگاندار تاراپىنان بارلىق قاجەتتى شارالار قابىلدانىپ جاتىر.

دەمالىس ورنىندا بارلىعى 103 جاس سپورتشى مەن 13 جات­تىقتىرۋشى تۇرادى. اۋرۋ­حاناعا جۇگىنگەن ناۋقاس­تاردىڭ جاعدايى جەڭىل دارە­جەدە, دەنساۋلىقتارى قالىپتى, دارىگەرلەردىڭ تۇراقتى باقى­لاۋىندا. دەمالىس ور­نىنداعى باسقا بالالارعا مە­ديتسينالىق تەكسەرۋ جۇرگى­زىلدى,  ولاردان اۋرۋ بەلگىلە­رى انىقتالعان جوق, پروفيلاك­تيكالىق شارالار جالعاسىپ جاتىر», دەلىنگەن رەسمي اقپاراتتا.

وزگە دە جاۋاپتى تۇلعالار مەن قۇزىرلى ورگاندار اتالعان جاعداي بويىنشا ءتيىستى جۇمىس جۇرگىزىلىپ جاتقانىن تىلگە تيەك ەتىپ وتىر. الداعى ۋاقىتتا قايدان اعاتتىق كەتكەنى تولىققاندى انىقتالا جاتار. دەسە دە كەيىنگى جىلدارى جامبىل وبلىسىندا مۇنداي وقيعانىڭ ءجيى تىركەلە باستاعانى كىمدى دە بولسىن تولعاندىرماي قويمايدى.

جامبىل وبلىسى