جاستار جالىنىنىڭ جارقىلى

جاستار قاشاندا جاڭاشىل, ىلگەرى كۇندەردەن ۇلەسىن الۋدان ءۇمىتتى, باستاماشىل بولىپ كەلەدى. بۇعان جاستاردىڭ شىعارماشىلىق تۇرعىدان وركەندەۋىنە جاعداي جاساپ, دارىندى جاستاردى انىقتاپ, وبلىستىڭ مادەني-قوعامدىق ومىرىنە بەلسەنە ارالاسۋىنا ىقپال ەتۋدى كوزدەيتىن «جاستار جالىنى-2015» شىعارماشىلىق جوباسى اناعۇرلىم سەرپىن بەرىپ كەلەدى. وبلىستاعى تالانتتى جاس­تاردىڭ جاڭا بەلەستەردى باعىن­دىرۋعا دەگەن ىنتا-جىگەرلەرى بيىل دا ەرەكشە. جوباعا 1000-عا جۋىق شىعارماشىل جاستار قاتىسقان. تاحاۋي احتانوۆ اتىن­داعى وبلىستىق دراما تەاترىنىڭ كونتسەرت زالىندا وتكەن «جاستار جالىنى-2015» شىعارماشىلىق جوباسىنىڭ قورىتىندى گالا-كونتسەرتى وسىنى اڭعارتتى. گالا-كونتسەرتتى قىسقاشا ءسوز سويلەپ اشقان وبلىستىق جاس­تار ساياساتى ماسەلەلەرى باس­قارماسىنىڭ باسشىسى داريعا يسماعامبەتوۆا بيىلعى «جاستار جالىنى-2015» جوباسىنىڭ ەلباسى نۇرسۇلتان ءابىش ۇلى نازارباەۆتىڭ «100 ناقتى قادام» ۇلت جوسپارى نەگىزىندە قازاقستان حالقى اسسامبلەياسىنىڭ جانە قازاقستان رەسپۋبليكاسى كون­ستيتۋتسياسىنىڭ 20 جىلدىعى, قازاق حاندىعىنىڭ 550 جىلدىعى, ۇلى جەڭىستىڭ 70 جىلدىعى اياسىندا شىعارماشىل جاستاردى بىرىكتىرىپ وتىرعانىن جەتكىزدى. – جاستار – ەلىمىزدىڭ ەرتەڭى. ولاردىڭ قوعام دامۋىنا ەركىن ارالاسۋى ءۇشىن ەلىمىزدە تولىق جاعداي جاسالعان. ەلباسى نۇرسۇلتان نازارباەۆ جاستارعا قاشاندا سەنىم ارتىپ, قولداپ كەلەدى. قازىر ەلىمىزدە جاستار ماسەلەلەرىن شەشۋگە باعىتتالعان ءساتتى قادامدار جەتەرلىك. سونىڭ ءبىرى وسى –«جاستار جالىنى-2015» جوباسى دەر ەدىم. بۇل جوبا ءبىزدىڭ وڭىردە ويداعىداي جۇزەگە استى, قانشاما جاس تالانتتار مەن باستاماشىل جاستاردىڭ ءوزىن كورسەتۋلەرىنە جول اشىلدى, – دەدى ول. شىعارماشىلىق جوبا اياسىندا وتكەن «شەكسىز شىعار­ماشىلىق» وبلىستىق بايقاۋىندا اقتوبەلىك ايا سپامبەتوۆا, «ءتۇرىمىز باسقا, تىلەگىمىز ءبىر» بايقاۋىندا مارتوكتىك رەگينا پاشبەكوۆا, «مەنىڭ ماماندىعىم – مەنىڭ ماقتانىشىم» بايقاۋىن­دا ششالقارلىق ارايلىم جانا­مان, «نامىستى جاستار» باي­قاۋىندا ويىلدىق ەربولات ەسەنبەك, «Street workout» وبلىس­تىق بايقاۋىندا اقتوبەلىك يسلام سابىروۆ جەڭىمپاز بولدى. ال, «ءبىز اقتوبەنىڭ تالانتتارىمىز» وبلىستىق بايقاۋىندا ون اتالىم بويىنشا وتىزعا جۋىق جاس جۇلدەگەر اتاندى. گالا-كونتسەرت بارىسىندا وب­لىستىق جاستار ساياساتى ماسە­لەلەرى باسقارماسىنىڭ باسشىسى د.يسماعامبەتوۆا جوبا اياسىندا وتكەن بايقاۋ جەڭىمپازدارى مەن جۇلدەگەرلەرىن ءى, ءىى, ءىىى دارەجەلى ديپلومدارمەن جانە باعالى سىيلىقتارمەن ماراپاتتادى. – مەن ويىل حالىق تەا­ترىنىڭ رەجيسسەرى بولىپ جۇمىس ىستەيمىن. وسىنداعى «جاس تالاپ» دراما ۇيىرمەسىنىڭ توعىز مۇشەسىنىڭ كۇشىمەن «نامىستى جاستار» تەاتر جانرى بويىنشا بايقاۋعا قاتىسىپ, وندا مۇحتار اۋەزوۆ پەن ءالجاپپار ابىشەۆتىڭ «نامىس گۆاردياسى» پەساسىنان كورىنىس قويدىق. بۇگىن بايقاۋدان ءبىرىنشى ورىن الىپ, قۋانىپ تۇرمىز. بۇل ءبىزدى جاڭا تابىستارعا جەتەلەيدى, – دەيدى ويىل حالىق تەاترىنىڭ رەجيسسەرى ەربولات ەسەنبەك ۇلى. سالتاناتتى شارا جەڭىم­پازدار مەن جۇلدەگەرلەر ورىن­داعان اسەم انمەن, كۇمبىرلەگەن كۇيمەن جانە مىڭ بۇرالعان بيمەن بەدەرلەندى. ساتىبالدى ءساۋىرباي, «ەگەمەن قازاقستان». اقتوبە وبلىسى.