سۋرەت: facebook.com/olzhas.shariyazdanov
جاركەنت مەشىتى مەن الماتىداعى ۆوزنەسەنسك كافەدرالدى سوبورى – حالقىمىزدىڭ مادەني ارالۋاندىعى مەن ءوزارا تاتۋلىعىن ايشىقتايتىن بىرەگەي ساۋلەت ەسكەرتكىشتەرى. بيىل مادەنيەت جانە اقپارات مينيسترلىگىنە قاراستى «قازقايتاجاڭارتۋ» رمك جاركەنت مەشىتىنە عىلىمي رەستاۆراتسيا جۇمىستارىن جۇرگىزۋدى جوسپارلاپ وتىر.
سونداي-اق مەملەكەت باسشىسى قاراتاۋ پەتروگليفتەرىنە, قىزىلوردا وڭىرىندەگى ساۋىسقاندىق پەن تۇركىستان وبلىسىنداعى ارپاوزەنىنەن تابىلعان جالپى سانى 17 مىڭعا جۋىق پەتروگليفكە ەرەكشە نازار اۋداردى. ءتورت مىڭ جىلدىق تاريحى بار تاڭبالى تاستار حالقىمىزدىڭ رۋحاني تامىرىنىڭ تەرەڭدە جاتقانىن دالەلدەيدى. پرەزيدەنت وسى سىندى قۇندى تاريحي ەسكەرتكىشتەر مەن ۇلتتىق داستۇرلەردىڭ يۋنەسكو-نىڭ بۇكىلالەمدىك مۇرالار تىزىمىنە ەنگىزىلۋىنە ابدەن لايىق ەكەنىن ايتىپ, قۇزىرلى ورگاندارعا ناقتى تاپسىرما جۇكتەدى.
بۇل تۇرعىدا اتالعان مەكەمە 50 جىلدان استام ۋاقىت بويى ەل اۋماعىنداعى تاريحي-مادەني ەسكەرتكىشتەردى ساقتاۋ مەن قايتا جاڭعىرتۋ ىسىنە قىزمەت ەتىپ كەلەدى. وسىنى نەگىزگە الا وتىرىپ, كاسىبي بىلىكتىلىكتى ۇشتاستىرىپ, الداعى ۋاقىتتا اتالعان نىسانداردى يۋنەسكو تىزىمىنە ەنگىزۋگە اتسالىسۋعا دايىنبىز.
ويتكەنى مەكەمە ەلىمىزدەگى قوجا احمەت ياساۋي كەسەنەسى سىندى بىرقاتار نىساندى يۋنەسكو تالاپتارىنا ساي رەستاۆراتسيالاۋ, عىلىمي زەرتتەۋ جانە زەردەلەۋ جۇمىستارىن جۇرگىزۋ بويىنشا بىرەگەي تاجىريبە جيناقتاعان.
ۇجىم مەملەكەت باسشىسىنىڭ قۇرىلتايدا اتاپ وتكەن تاريحي-مادەني مۇرالاردى ساقتاۋ, قالپىنا كەلتىرۋ جانە عىلىمي تۇرعىدا زەرتتەۋ جونىندەگى باستامالارىن ىسكە اسىرۋ باعىتىندا جۇيەلى جۇمىس جۇرگىزىپ كەلەدى. اتالعان ەسكەرتكىشتەردى قورعاۋ – تەك وتكەنگە تاعزىم عانا ەمەس, بولاشاق ۇرپاق الدىنداعى ورتاق جاۋاپكەرشىلىگىمىز.
ولجاس شاريازدانوۆ,
«قازقايتاجاڭارتۋ» رمك باس ديرەكتورى, تاريح عىلىمدارىنىڭ كانديداتى
