مامانداردىڭ ايتۋىنشا, «Fizmat Al Olympiad» دوداسى – جاساندى ينتەللەكت, باعدارلامالاۋ جانە دەرەكتەردى تالداۋ سالاسىنداعى ءبىلىم مەن تاجىريبەلىك داعدىنى دارىپتەيتىن ءىرى سايىستاردىڭ ءبىرى. وسى جىلى حالىقارالىق بايقاۋعا جەتى مەملەكەتتەن كەلگەن ۇزدىك كوماندالار قاتىسىپ, ءوزارا كىل مىقتىنى انىقتادى.
قاتىسۋشىلار كەلتىرگەن دەرەككە جۇگىنسەك, بايقاۋدىڭ ىرىكتەۋ كەزەڭىنىڭ ءوزى تارتىستى وتكەن كورىنەدى. ءبىلىم دوداسىنا قاتىسۋعا نيەت بىلدىرگەن ۇمىتكەرلەردىڭ ىشىنەن بار بولعانى 150 وقۋشى عانا كەلەسى كەزەڭگە جولداما العان. ال قورىتىندى كەزەڭدە باق سىناعان ەلۋ كوماندانىڭ قاي-قايسىسى بولسىن, ءوز جوبلارىن شەگەلەپ كەلگەن كىل مىقتى ۇجىمدار ساناتىنا جاتادى. ولاردىڭ قاتارىنا ەنگەن تارازدىق ءبىلىم الۋشىلار دا حالىقارالىق وليمپياداعا ۇلكەن دايىندىقپەن كەلگەنىن دالەلدەي ءبىلدى.
الماتى قالاسىنداعى رەسپۋبليكالىق فيزيكا-ماتەماتيكا مەكتەبىنىڭ بازاسىندا ۇيىمداستىرىلعان فينالدىق كەزەڭدە كىل مىقتىلار جينالعانى انىق. مۇندا ءبىلىم دوداسىنا قاتىسۋشىلار پراكتيكالىق تاپسىرمالاردى ورىندادى. ناقتىراق ايتساق, جاساندى ينتەللەكت مودەلىن قۇرۋ, دەرەكتەردى وڭدەۋ جانە وڭتايلى شەشىم شىعارۋ سەكىلدى كۇردەلى مىندەتتەردى شەشۋگە دەن قويدى.
«حالىقارالىق دەڭگەيدە وتكەن ءبىلىم باسەكەسى قاتىسۋشىلار ءۇشىن ۇلكەن تاجىريبە الاڭىنا اينالعانى انىق. ءوزىمىزدىڭ وسى كۇنگە دەيىن جيعان ءبىلىمىمىزدى ءبىر تەكسەرىپ الۋعا مۇمكىندىك تۋدى. وزگە ەلدەن كەلگەن وقۋشىلارمەن باسەكەگە ءتۇسۋ – زور جاۋاپكەرشىلىك. سول جاۋاپكەرشىلىك جۇگىن ايقىن سەزىندىك.
دايىندىق ۇدەرىسى كەزىندە ءبىرشاما قيىندىق تۋىنداعان ەدى. كەيبىر تاپسىرمالاردىڭ سوعان ساي قيىن بولعانى راس. الايدا كوماندا رەتىندە جۇدىرىقتاي جۇمىلىپ, بارلىق كەزەڭدە كۇردەلى تاپسىرمانى بىرلەسىپ شەشۋگە كۇش سالدىق. بەكەم بىرلىگىمىز اۋىز تولتىرىپ ايتارلىقتاي جەتىستىككە جەتۋىمىزگە سەبەپ بولعان سەكىلدى. بىلىكتى ۇستازدارىمىز مەن ارداقتى اتا-انالارىمىزدىڭ دەمەۋى مەن قولداۋى دا ءبىزدى قاناتتاندىردى», دەدى نۇراسىل سەرىكوۆ.
تاراز
