جيىندى اشقان ايدا بالاەۆا ۇلتتىق قۇرىلتايدىڭ قوعام ءۇشىن ماڭىزى زور, تۇراقتى ءارى جۇيەلى ديالوگ الاڭىنا اينالعانىن اتاپ ءوتىپ, وندا ەل دامۋىنىڭ ۇزاقمەرزىمدى باعىت-باعدارى ايقىندالىپ, وزەكتى الەۋمەتتىك ماسەلەلەر كەڭىنەن تالقىلاناتىنىن جەتكىزدى.
«ۇلتتىق قۇرىلتاي اياسىندا ايتىلعان بارلىق ۇسىنىس پەن پىكىر مەملەكەت باسشىسى مەن مەملەكەتتىك ورگانداردىڭ ەرەكشە باقىلاۋىندا. مادەنيەت جانە اقپارات مينيسترلىگى قۇرىلتاي مۇشەلەرى ۇسىنعان باستامالاردى ىسكە اسىرۋ جوسپارىنىڭ ورىندالۋىنا تۇراقتى تۇردە مونيتورينگ جۇرگىزىپ كەلەدى. الدىڭعى ءتورت وتىرىستا اسا ماڭىزدى ماسەلەلەر كوتەرىلىپ, اۋقىمدى جۇمىس اتقارىلدى. اتاپ ايتقاندا, زاڭنامانى جەتىلدىرۋ ماقساتىندا 26 زاڭ قابىلداندى. سونىمەن قاتار 10 زاڭ جوباسىنا, سونداي-اق پرەزيدەنت جارلىقتارى مەن كەشەندى دامۋ جوسپارلارىنا وزگەرىستەر ەنگىزۋ بويىنشا جۇمىستار جۇرگىزىلۋدە», دەدى پرەمەر-ءمينيستردىڭ ورىنباسارى.
سەكتسيا وتىرىسىنا قاتىسۋشىلار ءوز ۇسىنىستارى مەن باستامالارىن ورتاعا سالدى. تالقىلاۋدىڭ نەگىزگى وزەگىن مادەنيەتتى دامىتۋ, كرەاتيۆتى يندۋستريالاردى دامىتۋ, الەۋمەتتىك سالانى جاقسارتۋ جانە وتباسى قۇندىلىقتارىن نىعايتۋ ماسەلەلەرى قۇرادى.
سونداي-اق بالالار كونتەنتىن دامىتۋ مەن انيماتسيا يندۋسترياسىن وركەندەتۋ تاقىرىبى كوتەرىلدى. وسىعان بايلانىستى ايدا بالاەۆا مۋلتفيلم وندىرىسىنە ارنايى توقتالىپ, بۇل باعىتتىڭ ماڭىزدىلىعىن ەرەكشە اتاپ ءوتتى.
«پرەزيدەنت جولداۋىندا بەرىلگەن تاپسىرماعا سايكەس, مينيسترلىك جانىنان كرەاتيۆتى يندۋستريالاردى قولداۋ قورى قۇرىلدى. قازىرگى ۋاقىتتا ونىڭ ماتەريالدىق-تەحنيكالىق بازاسى قالىپتاستىرىلۋدا, ءارى قور قۇرىلىمىندا انيماتسياعا ارنالعان جەكە باعىت قاراستىرىلادى. مەنىڭ ويىمشا, مۇندا ساننان بۇرىن ساپاعا ءمان بەرۋ ماڭىزدى. كونتەنتتىڭ بالا پسيحولوگياسىنا ىقپالىن, جاس ەرەكشەلىكتەرىن جانە تاربيەلىك اسەرىن مىندەتتى تۇردە ەسكەرۋ قاجەت. قوردىڭ تولىققاندى جۇمىسى باستالعاننان كەيىن انيماتسيا يندۋسترياسى تىڭ سەرپىن الىپ, قارقىندى دامي تۇسەدى دەپ سەنەمىن», دەپ اتاپ ءوتتى مادەنيەت جانە اقپارات ءمينيسترى.
باسقا دا ماسەلەلەردى تالقىلاۋ بارىسىندا قاتىسۋشىلار مەن ساراپشىلار ۇلتتىق ءداستۇردى ساقتاۋ جانە «كىتاپ وقيتىن ۇلت» قالىپتاستىرۋ – قازاقستاندىق قوعامدى جاڭعىرتۋدىڭ ماڭىزدى قۇرامداس بولىگى ەكەنىن باسا ايتتى. وسىعان وراي ايدا بالاەۆا اۋدارۋعا جانە باسىپ شىعارۋعا ۇسىنىلاتىن كىتاپتار تىزبەسىن ايقىندايتىن ارنايى كوميسسيا قۇرۋدى ۇسىندى. سونىمەن بىرگە زاماناۋي جاس اۆتورلاردىڭ شىعارمالارىن ەل كىتاپحانالارىنىڭ قورىنا جۇيەلى تۇردە ەنگىزۋ قاجەتتىگىنە نازار اۋداردى.
كەشە ء«بىلىم جانە عىلىم», «ازاماتتىق قوعام» جانە «ەكونوميكالىق دامۋ» باعىتتارى بويىنشا تاعى ءۇش سەكتسيادا تالقىلاۋلار ءوتتى. ەكى كۇن بويى مەملەكەتتىك ساياساتتىڭ وزەكتى ماسەلەلەرى تالقىلاناتىن بولادى.
بۇگىن مەملەكەت باسشىسىنىڭ قاتىسۋىمەن V ۇلتتىق قۇرىلتايدىڭ پلەنارلىق وتىرىسى وتەدى. ءىس-شاراعا ەلىمىزدىڭ بارلىق وڭىرىنەن دەلەگات رەتىندە كەلگەن ۇلتتىق قۇرىلتايدىڭ 110 مۇشەسى قاتىسادى.
