وتاندىق ونىمدەر الەمدىك نارىققا تانىستىرىلدى

Grüne Woche كورمەسى 1926 جىلدان بەرى وتكىزىلىپ كەلەدى. وندا الەمنىڭ تۇكپىر-تۇكپىرىنەن كەلگەن ەلدەر وزدەرىن­دە وندىرىلگەن اۋىل شارۋاشىلىعى ونىم­دەرىن ۇسىنادى. سونىڭ اياسىندا وتاندىق وندىرۋشىلەر تاجىريبە الماسۋعا, وزگەنىڭ ءونىمىن سىناپ كورۋگە, تىكەلەي ىسكەرلىك بايلانىستار ورناتۋعا, ەۋروپالىق نارىق تالاپتارىن تەرەڭ تۇسىنۋگە مۇمكىندىك الادى.

ۆەدومستۆونىڭ دەرەگىنشە, 16–25 قاڭتار ارالىعىندا وتەتىن كورمە كەزىندە مينيستر ارمان شاققاليەۆ باستاعان دەلەگاتسيا «جاسىل اپتا» اياسىنداعى اگرارلىق ساياسات, بيزنەس پەن حالىقارالىق ۇيىمدار وكىلدەرىن بىرىكتىرگەن نەگىزگى ءىس-شارالارعا قاتىسقان.

كورمەدەگى باستى وقيعانىڭ ءبىرى – قازاقستاننىڭ ۇلتتىق پاۆيلونىنىڭ اشىلۋى بولدى. پاۆيلون ىسكەرلىك ديا­لوگ الاڭى رەتىندە قىزمەت اتقارىپ, ەكسپورتتىق الەۋەتتى تانىستىرۋعا, ونەر­كاسىپتىك كووپەراتسيانىڭ كەلەشەگىن تالقىلاۋعا مۇمكىندىك بەردى.

ەكسپوزيتسيادا وتاندىق اۋىل شارۋا­شىلىعى ونىمدەرىن ءوندىرۋ, زاماناۋي اگروتەحنولوگيالاردى ەنگىزۋ جانە اگروجۇيەلەردى دامىتۋ باعىتىندا قولعا الىنعان جۇمىستار كەڭىنەن تانىستىرىلدى. «پاۆيلون گەرمانيا جانە باسقا دا حالىقارالىق سەرىكتەستەر تاراپىنان جوعارى قىزىعۋشىلىق تۋدىرىپ, ونىمدەرىمىز بەن بىرلەسكەن جوبالارعا دەگەن سۇرانىستىڭ ارتىپ كەلە جاتقانىن دالەلدەدى», دەيدى مينيسترلىك وكىلدەرى.

GFFA اياسىندا ارمان شاققاليەۆ بىرقاتار حالىقارالىق ارىپتەستەرمەن ەكىجاقتى كەزدەسۋلەر وتكىزدى. اتاپ ايت­قاندا, گەرمانيانىڭ ازىق-ت ۇلىك, اۋىل شا­رۋا­شىلىعى جانە وڭىرلىك سايكەستىك جونىن­دەگى فەدەرالدىق ءمينيسترى الويس راينەرمەن, گەرمانيانىڭ ەكونوميكا جانە ەنەرگەتيكا فەدەرالدىق مينيستر­­لىگى­­نىڭ ستاتس-حاتشىسى توماس شتەفەنمەن, نەمىس ەكونوميكاسىنىڭ شىعىس كومي­تەتى­نىڭ اتقارۋشى ديرەكتورى ميحاەل حارمسپەن, سونداي-اق دۇنيەجۇزىلىك ساۋ­دا ۇيىمى باس ديرەكتورىنىڭ ورىنباسارى جان-ماري پاۋگاممەن كەلىسسوزدەر جۇرگىزدى. تاراپتار ساۋدانى كەڭەيتۋ, كەدەرگىلەردى ازايتۋ, ازىق-ت ۇلىك جەتكىزۋ تىزبەكتەرىنىڭ تۇراقتىلىعى مەن ءوزارا نارىقتارداعى بايلانىستاردى كۇشەيتۋ ماسەلەلەرىن تالقىلادى.

كەلىسسوزدەردىڭ جەكە بلوگى اگرارلىق ىنتىماقتاستىق پەن تەحنولوگيالىق ارىپتەستىكتى دامىتۋعا ارنالدى. وتاندىق دەلەگاتسيا پاكىستاننىڭ ۇلتتىق ازىق-ت ۇلىك قاۋىپسىزدىگى جانە زەرتتەۋلەر جونىندەگى فەدەرالدىق ءمينيسترى رانا تانۆير حۋسسەينمەن, گەرمانيانىڭ اۋىل شارۋاشىلىعى فەدەرالدىق مينيستر­لىگىنىڭ مەملەكەتتىك حاتشىسى ماركۋس شيكپەن, نەمىس اگروبيزنەس اليانسىنىڭ ديرەكتورى پەر برودەرزەنمەن, باسقا دا لاۋازىمدى تۇلعالارمەن مازمۇندى كەلىسىمدەر جاسادى. جۇزدەسۋ بارىسىندا ءوندىرىستى وركەندەتۋ, اۋىل شارۋاشىلىعى تەحنيكاسىن جاڭعىرتۋ, نەمىس ساپا ستاندارتتارىن ەنگىزۋ, تۇقىم شارۋاشىلىعىن دامىتۋ مەن سۋ ۇنەمدەۋ ماسەلەسى باستى نازاردا بولدى.

ەلىمىزدىڭ دەلەگاتسياسى نەمىس اگروبيزنەس اليانسى ۇيىمداستىرعان سالالىق پىكىرتالاستارعا دا بەلسەندى قاتىستى. ونىڭ ىشىندە سۋدى ىسىراپسىز پايدالانۋ مەن يننوۆاتسيالىق اگروتەحنولوگيالارعا ارنالعان پانەلدىك سەسسياعا ءۇن قوستى.

ءىس-شارالار بارىسىندا قازاقستان مەن گەرمانيا اراسىنداعى ساۋدا-ەكونوميكالىق بايلانىستاردىڭ نىعايىپ كەلە جاتقانى اتالىپ ءوتتى. 2025 جىلدىڭ قاڭتار-قاراشا ايلارىنىڭ قورىتىندىسى بويىنشا ەكى ەل اراسىنداعى تاۋار اينالىمى 3,91 ملرد دوللاردى قۇرادى. قازاقستاننىڭ گەرمانياعا ەكسپورتى 7,9 پايىزعا ءوسىپ, 1,17 ملرد دوللارعا جەتتى. بۇل نەمىس نارىعىنىڭ وتاندىق جەتكىزۋشىلەر مەن جەرگىلىكتى ونىمدەرگە دەگەن قىزىعۋشىلىعىن كورسەتەدى.