«Astana Musical» مەملەكەتتىك ميۋزيكل تەاترىنىڭ كوركەمدىك جەتەكشىسى ەسلام ءنۇرتازيننىڭ رەجيسسەرلىك ساراپتاۋىندا قويىلعان سپەكتاكلدىڭ باستى ەرەكشەلىگى – ۇلتتىق مۋزىكا مەن الەمدىك ءان مادەنيەتىنىڭ ءبىر ساحنادا توعىسۋى. قويىلىمدا قازاق ەستراداسىنىڭ التىن قورىنا ەنگەن ءشامشى قالداياقوۆ پەن ەسكەندىر حاسانعاليەۆتىڭ اندەرى, اڭىزعا اينالعان «دوس-مۇقاسان» ءانسامبلىنىڭ شىعارمالارى, سونداي-اق حح عاسىر مۋزىكاسىنا تىڭ سەرپىن اكەلگەن «The Beatles» توبىنىڭ تانىمال كومپوزيتسيالارى ورىندالدى. ايتۋلى اندەر قويىلىمنىڭ دراماتۋرگيالىق جەلىسىن بايىتىپ, كورەرمەنگە ەرەكشە ەموتسيالىق اسەر سىيلادى.
ليبرەتتو اۆتورى – قازاقستاننىڭ ەڭبەك سىڭىرگەن قايراتكەرى باقىت قايىربەكوۆ, اۋدارماشى, دراماتۋرگ – ءانناس باعدات. ال سپەكتاكلدىڭ مۋزىكاسىن جازعان – تانىمال ديريجەر, قازاقستاننىڭ ەڭبەك سىڭىرگەن قايراتكەرى ارتۋر ورەنبۋرگسكي.
«دوستار سەرتى» ميۋزيكلى ەلىمىزدىڭ ءار وڭىرىنەن كەلگەن ءتورت جاس جىگىتتىڭ ونەر جولىنداعى تاعدىرىن ارقاۋ ەتەدى. كونسەرۆاتورياعا وقۋعا ءتۇسۋ ءۇشىن ۇلكەن قالاعا جينالعان جاس تالاپكەرلەردى ورتاق ارمان مەن مۋزىكاعا دەگەن سۇيىسپەنشىلىك بىرىكتىرەدى. قويىلىمدا ولاردىڭ اراسىنداعى شىنايى دوستىق, ومىرلىك تاڭداۋ, كاسىبي باسەكە مەن ادامگەرشىلىك قۇندىلىقتار ساحنالىق تىلمەن اسەرلى جەتكىزدى. اۆتورلار ارقىلى دوستىققا ادالدىق, ءبىر-بىرىنە سەنىم ارتۋدىڭ ماڭىزى ايقىن كورسەتىلدى. 2016 جىلدىڭ 16 قازانىندا وتكەن پرەمەراسىنان بەرى قويىلىم تەاتر ساحناسىنان تۇسپەي, تۇراقتى كورەرمەنىن قالىپتاستىردى.
سپەكتاكلدىڭ ساحنالىق بەزەندىرىلۋى مەن حورەوگرافيالىق شەشىمدەرى دە كورەرمەن نازارىن اۋدارماي قويمايدى. زاماناۋي ستسەنوگرافيا, جاندى وركەستردىڭ سۇيەمەلدەۋى جانە اكتەرلەردىڭ كاسىبي ويىنى قويىلىمنىڭ كوركەمدىك دەڭگەيىن ارتتىرا ءتۇستى. اسىرەسە جاستارعا ارنالعان تاربيەلىك ءمانى زور تۋىندى رەتىندە «دوستار سەرتى» بۇگىنگى كۇننىڭ وزەكتى ماسەلەلەرىمەن ۇندەسىپ جاتىر.
تەاتر ۇجىمى ميۋزيكلدىڭ كورەرمەنگە رۋحاني سەرپىلىس بەرىپ, ونەرگە دەگەن قىزىعۋشىلىقتى ارتتىرۋعا باعىتتالعانىن اتاپ ءوتتى. ال قويىلىمدى تاماشالاعان كوپشىلىك قاۋىم «دوستار سەرتىن» تەك مۋزىكالىق قويىلىم عانا ەمەس, رۋحاني اسەر سىيلايتىن, وي سالاتىن سپەكتاكل رەتىندە قابىلدادى. ءاربىر ءان مەن ساحنالىق كورىنىس زالداعى كورەرمەندى بەيجاي قالدىرماي, شىنايى ەموتسياعا بولەدى.
ايتا كەتۋ كەرەك, ميۋزيكل جىل بويى «Astana Musical» تەاترىنىڭ ساحناسىندا تۇراقتى تۇردە قويىلادى. ونەرسۇيەر قاۋىم ءۇشىن بۇل – دوستىقتىڭ قادىرىن, ونەردىڭ قۇدىرەتىن سەزىنۋگە تاپتىرماس مۇمكىندىك. «دوستار سەرتى» ميۋزيكلى ءالى تالاي كورەرمەننىڭ جۇرەگىنەن ورىن الىپ, قازاق مۋزىكالىق تەاترىنىڭ جارقىن جەتىستىكتەرىنىڭ بىرىنە اينالارى ءسوزسىز.
