سۋرەت: gov.kz
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, مەملەكەت باسشىسىنىڭ تاپسىرماسىنا وراي, 2023 جىلدان باستاپ بەس جىل ىشىندە ەڭ تومەنگى بازالىق زەينەتاقىنى ەڭ تومەنگى كۇنكورىس دەڭگەيىنىڭ 70%-ىنا دەيىن, ەڭ جوعارعى زەينەتاقى مولشەرىن 120%-عا دەيىن جىل سايىن كەزەڭ-كەزەڭىمەن ارتتىرۋ جۇزەگە اسىرىلىپ جاتىر.
ايتالىق, بيىلعى 1 قاڭتاردان باستاپ بازالىق زەينەتاقىنىڭ ەڭ تومەنگى مولشەرى 35 596 تەڭگەگە (ەڭ تومەنگى كۇنكورىس دەڭگەيىنىڭ 70%-ى), ەڭ جوعارى مولشەرى ەڭ تومەنگى كۇنكورىس دەڭگەيىنىڭ 110%-ىنان 118%-ىنا دەيىن ارتىپ, 60 005 تەڭگەگە جەتتى. 2019 جىلى زەينەتكەرلىك دەمالىسقا شىققان 70 جاستاعى زەينەتكەردىڭ بيۋدجەتتەن تولەنەتىن زەينەتاقىسىنىڭ مولشەرى 2025 جىلى 171 588 تەڭگە بولدى, ونىڭ ىشىندە بازالىق زەينەتاقى تولەمى – 50 851 تەڭگە, ىنتىماقتى زەينەتاقى – 120 737 تەڭگە. 2026 جىلعى 1 قاڭتاردان زەينەتاقىنىڭ جالپى سوماسى 192 816 تەڭگەگە دەيىن ۇلعايادى, ونىڭ ىشىندە بازالىق زەينەتاقى – 60 005, ىنتىماقتى زەينەتاقى – 132 811 تەڭگەگە جەتەدى. بۇل سومالارعا بجزق تولەمدەرى كىرمەيدى.
1 قاڭتاردان باستاپ مەملەكەتتىك جاردەماقىلاردىڭ دا مولشەرى ارتادى. مىسالى 1, 2, 3 بالا تۋعاندا بەرىلەتىن جاردەماقى ءبىر رەتتىك 149 416 تەڭگەدەن 164 350 تەڭگەگە دەيىن, 4, ودان دا كوپ بالا تۋعاندارعا بەرىلىپ كەلگەن 247 716 تەڭگە سوماسى 272 475 تەڭگەگە دەيىن ۇلعايادى. كوپبالالى وتباسىلارعا بەرىلەتىن جاردەماقى دا 10 %-عا ارتتى. ءتورت بالاسى بار وتباسىلارعا 63 030 تەڭگەدەن 69 330 تەڭگەگە دەيىن, 10 بالاسى بارلارعا 157 280 تەڭگەدەن 173 000 تەڭگەگە دەيىن كوبەيدى. سونىمەن قاتار I توپتاعى مۇگەدەكتىگى بار ادامدارعا ارنالعان جاردەماقى 101 702 تەڭگەدەن 111 872 تەڭگەگە دەيىن, II توپتاعىلارعا – 81 362 تەڭگەدەن 89 498 تەڭگەگە دەيىن, III توپتاعىلارعا 55 474 تەڭگەدەن 61 021 تەڭگەگە دەيىن ۇلعايادى.
اسىراۋشىسىنان, ەڭبەك ەتۋ قابىلەتىنەن ايرىلعان جاندارعا مەملەكەتتىك الەۋمەتتىك ساقتاندىرۋ قورىنان (ماسق) بەرىلەتىن تولەمدەر دە 10%-عا ارتتى. بۇل تولەمدەر مىندەتتى الەۋمەتتىك ساقتاندىرۋ جۇيەسىنە قاتىسۋشىلارعا بيۋدجەتتەن تولەنەتىن مەملەكەتتىك جاردەماقىلارعا قوسا بەرىلەدى. تولەم سوماسى كەيىنگى 2 جىلدا ماسق-عا الەۋمەتتىك اۋدارىمدار جۇرگىزىلگەن ورتاشا ايلىق تابىسقا, ەڭبەك ەتۋ قابىلەتىنەن ايىرىلۋ كوەففيتسيەنتتەرىنە, اسىراۋىنداعى ادامدار سانىنا, مىندەتتى الەۋمەتتىك ساقتاندىرۋ جۇيەسىنە قاتىسۋ وتىلىنە, تابىستى الماستىرۋعا بايلانىستى ەسەپتەلەدى.
