فوتو: 24.kz بەينەسىنەن سكرينشوت
ۇلتتىق ستەندكە قازاق ادەبيەتىنىڭ كلاسسيكالىق جانە زاماناۋي ۇلگىلەرى, سونداي-اق ەلدىڭ تاريحى مەن مادەنيەتىن تانىتاتىن باسىلىمدار قويىلدى. ۇيىمداستىرۋشىلاردىڭ ايتۋىنشا, كورمەگە باسپاگەرلەر مەن اۋدارماشىلار عانا ەمەس, ءۇندىستاننىڭ جەتەكشى ۋنيۆەرسيتەتتەرىندە وقيتىن ستۋدەنتتەر دە ەرەكشە قىزىعۋشىلىق تانىتقان.
تاريح عىلىمدارىنىڭ دوكتورى ساتتار ءماجيتوۆتىڭ ايتۋىنشا, قازاق تاريحىنا دەگەن سۇرانىس ايرىقشا بايقالعان.
«بۇگىنگى دەليدەگى كورمە ۇندىستاندىق ستۋدەنتتەر تاراپىنان ۇلكەن قىزىعۋشىلىق تۋدىردى. اسىرەسە دەلي ۋنيۆەرسيتەتى, دجاۆاحارلال نەرۋ ۋنيۆەرسيتەتى, گاندي ۋنيۆەرسيتەتى سەكىلدى جوعارى وقۋ ورىندارىنىڭ وكىلدەرىنەن كوپ سۇراق قويىلدى. ولاردىڭ باسىم بولىگى قازاقستان تاريحىنا قاتىستى بولدى. كورمەدە ەل تاريحىنا ارنالعان كىتاپتار, قازاق تىلىندەگى بەس تومدىق «قازاقستان تاريحى», قازاقستاننىڭ ماتەريالدىق ەمەس مادەني مۇراسى تۋرالى باسىلىم, سونداي-اق مىرزا حايدار ءدۋلاتيدىڭ ەڭبەكتەرى ۇسىنىلدى», دەيدى ول.
ۇندىستانداعى حالىقارالىق كىتاپ جارمەڭكەسى جارتى عاسىردان استام ۋاقىتتان بەرى وتكىزىلىپ كەلەدى جانە ازياداعى ەڭ ءىرى ادەبي الاڭداردىڭ ءبىرى سانالادى. سونىمەن قاتار بۇل ەل الەمدىك كىتاپ نارىعى بويىنشا الدىڭعى ۇشتىكتە تۇر. وسى سەبەپتى مۇنداي الاڭعا شىعۋ قازاق ادەبيەتىن حالىقارالىق كەڭىستىككە تانىتۋعا جول اشادى.
«24KZ» جاريالاعانداي, فيلولوگ اينۇر احمەتوۆا سوڭعى جىلدارى قازاق ادەبيەتىنىڭ اعىلشىن ءتىلدى اۋديتورياعا جۇيەلى تۇردە تانىستىرىلىپ كەلە جاتقانىن اتاپ ءوتتى:
«سوڭعى جىلدارى ءبىز كەمبريدج ۋنيۆەرسيتەتى شىعارعان ەكى انتولوگيانى ۇسىنىپ ءجۇرمىز. ولارعا حح-ءححى عاسىرداعى قازاق اۆتورلارىنىڭ شىعارمالارى ەندى. ءبىرى پروزاعا, ەكىنشىسى پوەزياعا ارنالعان».
جازۋشى الىشەر راحات بولسا كورمەدە قازاق ادەبيەتىنىڭ بىرنەشە تىلدە ۇسىنىلعانىن ەرەكشە ماڭىزدى قادام دەپ باعالادى.
نيۋ-دەليدەگى حالىقارالىق كىتاپ جارمەڭكەسى 18 قاڭتارعا دەيىن جالعاسادى. قازاقستان ەكسپوزيتسياسىن ازىرلەۋگە مادەنيەت جانە اقپارات مينيسترلىگى, ۇلتتىق كىتاپحانا جانە قازاقستاننىڭ ۇندىستانداعى ەلشىلىگى اتسالىستى. ۇيىمداستىرۋشىلاردىڭ پىكىرىنشە, مۇنداي جوبالار شەتەلدىك وقىرماندى قازاق ادەبيەتىمەن تانىستىرىپ, ەلدەر اراسىنداعى مادەني بايلانىستاردى نىعايتادى.
