كەڭەس داۋىرىندە تۇتىنۋشىلار وداعىنىڭ اۆتوكولىك گاراجى رەتىندە بوي كوتەرگەن بۇل عيماراتتىڭ جالپى اۋدانى – 448 شارشى مەتر. ءورت ءسوندىرۋ قىزمەتىنە ارناپ سالىنباعاندىقتان, قىزمەتتىك تەحنيكالاردىڭ كەيبىرى گاراجعا سىيمايدى.
سول سەبەپتى, قىسى-جازى دالادا, اشىق اسپان استىندا تۇرادى. جاڭبىر جاۋسا, قار ەرىسە عيمارات توبەسىنەن سۋ سورعالايدى. كەتەۋى كەتكەن نىساندى جاماپ-جاسقاعانمەن, پايدا جوق. بىرىنشىدەن ابدەن توزعان, جوندەۋ شىعىنى شاش-ەتەكتەن. ەكىنشىدەن, تيپتىك عيمارات بولماعاندىقتان ءورت سوندىرۋشىلەرگە ءارتۇرلى قولايسىزدىق تۋعىزادى.
«قازىرگى ەسكى عيماراتتى ماماندار تەكسەردى, «اپاتتىق جاعدايعا تاياپ تۇر, ەشقانداي جوندەۋ جۇمىسى كومەكتەسپەيدى. جاڭادان سالعان تيىمدىرەك بولادى ەكەن. جوباسى دايىن, شامامەن 1,5 ملرد تەڭگەگە شىقتى. جاڭا ءورت ءسوندىرۋ بەكەتى سالىنسا توتەنشە جاعداي كەزىندە كورسەتىلەتىن كومەكتىڭ ءبارىن قامتۋعا مۇمكىندىك تۋادى», دەدى تارباعاتاي اۋدانىنىڭ اكىمى دارحان جورگەكباەۆ.
وبلىس ورتالىعىنان شەتكەرى جاتقان شەكارالىق ايماق ءۇشىن بۇل نىساننىڭ قانشالىقتى ماڭىزدى ەكەنىن ەسكەرگەن ءوڭىر باسشىسى جاڭا ءورت ءسوندىرۋ بەكەتىن سالۋعا قولداۋ كورسەتەتىنىن ايتتى.
«جاعدايدى كوزىممەن كوردىم. شىنىمەن دە عيمارات ەسكىرگەن, توزىپ تۇر ەكەن. جاڭاسىن سالۋ كەرەك. ەڭ ءبىرىنشى كەزەكتە ادامداردىڭ ءومىرى مەن قاۋىپسىزدىگىن قامتاماسىز ەتىپ, قورشاعان ورتانى ساقتاۋىمىز قاجەت. بۇل ورايدا ءورت ءسوندىرۋ بەكەتىنىڭ اتقاراتىن ءرولى جوعارى», دەدى وبلىس اكىمى نۇرىمبەت ساقتاعانوۆ.
