وبلىس اكىمى نۇرلىبەك نالىباەۆ جىل الماسار شاقتاعى جاڭالىقتارعا, قۇرىلىس, ونىڭ ىشىندە تۇرعىن ءۇي قۇرىلىسى سالاسىنداعى كورسەتكىشتەرگە توقتالىپ, جاڭا پاتەر يەلەرىن قۇتتىقتادى.
– ءوتىپ بارا جاتقان جىل ەلىمىز ءۇشىن دە, ءوڭىرىمىز ءۇشىن دە بىرلىك پەن بەرەكەنىڭ, تۇراقتىلىق پەن تاتۋلىقتىڭ, جاسامپازدىق پەن جارقىن ىستەردىڭ جىلى بولدى. ايماق نەگىزگى ماكروەكونوميكالىق كورسەتكىشتەر بويىنشا رەسپۋبليكادا العاشقى ورىنداردان كورىندى. جالپى, وڭىرلىك ءونىم كولەمى جىل قورىتىندىسىندا 3 ترلن 700 ملرد تەڭگەگە جەتىپ, 6,5%-دىق ءوسىم قامتاماسىز ەتىلدى. وبلىس بيۋدجەتى 851 ملرد 300 ملن تەڭگەگە جەتىپ, 2021 جىلدان بەرى 246%-عا ءوستى. ونىڭ 56%-ى الەۋمەتتىك سالاعا باعىتتالىپ وتىر. دامۋ بيۋدجەتىنىڭ كولەمى بيىل 207 ملرد تەڭگەگە جەتىپ, 2021 جىلمەن سالىستىرعاندا 4,4 ەسەگە ارتتى. وڭىرىمىزدە قولايلى ينۆەستيتسيالىق كليمات قالىپتاسىپ, جاڭا ءىرى ينۆەستيتسيالىق جوبالار جۇزەگە اسىپ كەلەدى. تۇرعىنداردىڭ ءومىر ءسۇرۋ ساپاسىن جاقسارتۋ ماقساتىندا باسپانامەن قامتۋ, ينفراقۇرىلىمدى قايتا جاڭعىرتۋعا قاتىستى قاجەتتى شارالار قابىلداندى. ايماقتا 3 جىل ىشىندە 200-گە جۋىق الەۋمەتتىك نىسان سالىنۋى وسى ءسوزىمىزدىڭ دالەلى. ۇزاق جىل پاتەر كەزەگىن كۇتكەن سىزدەر دە بۇگىن مەملەكەت قولداۋىمەن باسپاناعا قول جەتكىزىپ وتىرسىزدار. قونىستارىڭىز قۇتتى بولسىن, – دەدى ن.نالىباەۆ.
بىلتىردان بەرى قالادا زاماناۋي جاڭا ديزاينمەن جەتى, توعىز, ون ەكى قاباتتى تۇرعىن ۇيلەر بوي كوتەرىپ كەلەدى. جىل توعىسىندا قولدانىسقا بەرىلىپ وتىرعان مىنا ءۇي دە تىرشىلىگى كۇننەن-كۇنگە جاندانىپ كەلە جاتقان سول جاعالاۋداعى كورىكتى عيماراتتاردىڭ ءبىرى.
جالپى كەيىنگى جىلدارى تۇرعىن ءۇي كەزەگىندە تۇرعان ازاماتتارعا 5 مىڭنان اسا پاتەر تابىستالدى. كەيىنگى ءۇش جىلدا العاش رەت بارلىق اۋداندا 1 800-گە جۋىق جاڭا پاتەر ەل يگىلىگىنە بەرىلدى. بيىل 3 600 پاتەرلىك تۇرعىن ءۇي سالۋعا بيۋدجەتتەن 58 ملرد 785 ملن تەڭگە ءبولىنىپ وتىر.
قىزىلوردا
