قۇرىلىس جۇمىستارىن باستاۋعا 1955 گەكتار جەر تەلىمى ءبولىندى. قازىرگى تاڭدا ونىڭ 700 گەكتارىنا مال ازىقتىق داقىلدار ەگۋ ءۇشىن جەر دايىندالىپ جاتىر. مۇندا تامشىلاتىپ جانە جاڭبىرلاتىپ سۋارۋ تەحنولوگياسى قولدانىلادى.
ينۆەستجوبا 2030 جىلعا دەيىن جۇزەگە اسادى دەپ كۇتىلەدى. تارتىلاتىن ينۆەستيتسيا كولەمى – 15 ملرد تەڭگەدەن استام. جوبا جۇزەگە اسسا, 100 جاڭا جۇمىس ورنى قۇرىلادى. فەرمانىڭ جىلدىق قۋاتتىلىعى 13 ملن ليتر ءسۇت وندىرۋگە جەتكىلىكتى بولادى.
جوبا اياسىندا ەكى نەگىزگى تەحنولوگيالىق ۇدەرىس كوزدەلگەن. ءبىرىنشى ۇدەرىس مال ازىقتىق داقىلداردى ءوسىرۋ بولسا, ەكىنشىسى – تاۋارلى ءسۇت ءوندىرۋ.
قوناەۆ قالاسىنىڭ اكىمى اسحات بەردىحانوۆ حالىققا ينۆەستجوبانى تانىستىرۋ ماقساتىندا جيىن وتكىزدى.
ء«وندىرىس ورىندارىن اشۋ, حالىقتى جۇمىسپەن قامتۋ – قوناەۆ قالاسى اكىمدىگىنىڭ باستى باعدارلارىنىڭ ءبىرى. زاۋىت سالىنۋىن جان-جاقتى قولداۋىمىز قاجەت. كاسىپورىننىڭ بوي كوتەرۋى اۋىل-ايماقتارداعى جۇرتشىلىقتىڭ ءال-اۋقاتىنا, قالا ەكونوميكاسىنا تىكەلەي اسەر ەتەدى. الداعى ۋاقىتتا قالادا 40-تان استام ينۆەستجوبا جۇزەگە اسپاق», دەدى شاھار باسشىسى.
ايتا كەتەيىك, بىلتىر قوناەۆ قالاسىنا 100 ملرد تەڭگەدەن استام ينۆەستيتسيا تارتىلدى.
