فوتو: Getty Images
«ستراسبۋرگ» كلۋبىنىڭ باپكەرى ليام روسەنور باسقا كومانداعا باس باپكەر بولىپ تاعايىندالۋعا ءبىر تابان جاقىندادى. بۇل اقپاراتتى جۋرناليست فابريتسيو رومانو تاراتتى.
قىزمەتىنەن بوساتىلعان ەنتسو مارەسكانىڭ ورنىنا ءدال وسى اعىلشىن مامانى نەگىزگى ۇمىتكەر رەتىندە قاراستىرىلعانى ايتىلدى.
سپورت ءجۋرناليسىنىڭ مالىمەتىنشە, روسەنور لوندوندىق كلۋبتىڭ باس باپكەرى رەتىندەگى مىندەتىن اتقارۋعا ءىس جۇزىندە دايىن.
دەرەككوزدەرگە سۇيەنسەك, روسەنور قازىر لوندوندا ءجۇر. ول مۇندا ەڭبەك شارتىنا قول قويۋ نيەتىمەن كەلگەن. جاڭا كلۋبتاعى جۇمىس ونى كوپتەن كۇتىپ وتىرعانى اتاپ ءوتىلدى.
سونداي-اق باپكەردى كلۋب باسشىلىعىمەن كەزدەسۋ كۇتىپ تۇرعانى بەلگىلى بولدى. بۇل جۇزدەسۋ ءبىر كۇن ىشىندە ءوتۋى ءتيىس. ەگەر تاراپتار كەلىسىمگە كەلسە, اپتانىڭ سوڭىنا قاراي «چەلسيدە» جاڭا باس باپكەر پايدا بولۋى مۇمكىن.
ايتا كەتەيىك, الماتىلىق «قايرات» فۋتبول كلۋبىنىڭ 16 جاستاعى فۋتبولشىسى داستان ساتباەۆ لوندوننىڭ «چەلسي» كلۋبىمەن كەلىسىمشارتقا وتىردى. جاس فۋتبولشى كامەلەتتىك جاسقا تولعان سوڭ, 2026 جىلدىڭ جازىندا رەسمي تۇردە اعىلشىن كلۋبىنا اۋىسادى. وعان دەيىن داستان ساتپاەۆ «قايرات» ساپىندا ونەر كورسەتە بەرەدى.
