سۋرەتتى تۇسىرگەن – ەرلان ومار, «ەQ»
پرەزيدەنتتىڭ ايتۋىنشا, ەل الدىندا تۇرعان مىندەتتەر اۋقىمدى ءارى جاۋاپتى.
«بيىل كوپ جۇمىس ىستەۋىمىز قاجەت. ساياسي جاڭعىرۋدىڭ جاڭا كەزەڭى باستالىپ, ەكونوميكالىق رەفورمالار جالعاسىن تابادى», دەدى قاسىم-جومارت توقاەۆ.
مەملەكەت باسشىسى قازاقستاننىڭ جاڭعىرۋ جولىنا ءبىرجولا ءتۇسۋى قوعامنىڭ بولمىسى مەن بەت-بەينەسىن تۇبەگەيلى وزگەرتۋدى تالاپ ەتەتىنىن اتاپ ءوتتى.
«ەلىمىز جاڭعىرۋ جولىنا ءبىرجولا ءتۇسىپ, قوعامىمىزدىڭ بولمىسى مەن بەت-بەينەسىن تۇبەگەيلى وزگەرتۋگە ءتيىس. ازاماتتارىمىز جاڭا داۋىرگە بەيىمدەلۋى قاجەت. بۇل – وڭاي شارۋا ەمەس. بىراق, حالقىمىز, سونىڭ ىشىندە جاستارىمىز المايتىن اسۋ جوق. بۇعان كامىل سەنەمىن», دەدى پرەزيدەنت.
سۇحبات بارىسىندا قاسىم-جومارت توقاەۆ بيىلعى جىلدى تسيفرلاندىرۋ جانە جاساندى ينتەللەكت جىلى دەپ جاريالاعانىن ەسكە سالدى. ونىڭ ايتۋىنشا, بۇل – ەل ءۇشىن تاريحي مۇمكىندىك.
«تۇبەگەيلى تسيفرلىق وزگەرىستەر مەن جاساندى ينتەللەكتىنى ەنگىزۋ ەكونوميكانىڭ عانا ەمەس, ءبىلىم بەرۋ, دەنساۋلىق ساقتاۋ, مەملەكەتتىك باسقارۋ سياقتى بارلىق سالانىڭ دامۋىنا تىڭ سەرپىن بەرەدى», دەدى مەملەكەت باسشىسى.
پرەزيدەنتتىڭ ايتۋىنشا, تاۋەلسىزدىگىمىزدىڭ 35 جىلدىعى – ەلىمىز ءۇشىن ايتۋلى داتا ءارى وسىعان دەيىن ءجۇرىپ وتكەن جولىمىزدى وي ەلەگىنەن وتكىزىپ, بولاشاققا جوسپار قۇراتىن ءسات.
«تاۋەلسىزدىكتىڭ مەرەيلى بەلەسىن اس تا توك ناۋقانشىلدىققا اينالدىرماۋ كەرەك, بۇل قازاقستاننىڭ ءوسىپ-وركەندەۋىنىڭ سيمۆولى بولۋعا ءتيىس», دەدى ول.
سونىمەن قاتار, مەملەكەت باسشىسى «تازا قازاقستان» جالپىحالىقتىق اكتسياسىنا ەرەكشە توقتالدى.
مەن پرەزيدەنت رەتىندە «تازا قازاقستان» اكتسياسىن الداعى ۋاقىتتا دا ەرەكشە نازارىمدا ۇستايمىن. بۇل جۇمىستىڭ ءمان-ماڭىزى وتە زور. سەبەبى, «تازا قازاقستان» جۇرتتى ۇنەمشىل ءارى اقپەيىل بولۋعا, داڭعازالىقتان ارىلۋعا, ۇنەمى ىزدەنىپ, العا ۇمتىلۋعا, ورتاق جاۋاپكەرشىلىكتى ۇمىتپاۋعا, ەلگە جاناشىرلىق تانىتىپ, قايىرىمدىلىق جاساۋعا ۇندەيدى. ءبىزدىڭ باستامامىزبەن بىرىككەن ۇلتتار ۇيىمى 2026 جىلدى حالىقارالىق ەرىكتىلەر جىلى دەپ جاريالادى. بۇل قادام «تازا قازاقستان» يدەياسىمەن تولىق ۇندەسەدى.
مەن وسى جالپىحالىقتىق قوزعالىستى ايرىقشا ماڭىزدى يدەولوگيالىق اكتسيا دەپ سانايمىن. ويتكەنى, تازالىق دەگەنىمىز – ماعىناسى تەرەڭ, مازمۇنى سان قىرلى ۇعىم. تازالىق ۇعىمى جان دۇنيەنىڭ دە, جەر دۇنيەنىڭ دە توقىراۋىن ەمەس, گۇلدەنۋىن, كىرشىكسىز تازا بولۋىن بىلدىرەدى. تۇپتەپ كەلگەندە, تازالىق ۇلت بولمىسىنىڭ وزەگىنە اينالۋعا ءتيىس», دەدى پرەزيدەنت.
توقاەۆ ەكس-پرەزيدەنتتىڭ ماسكەۋگە ساپارى تۋرالى: نە ايتىلعانى ماعان قىزىق ەمەس
