ونىڭ ايتۋىنشا, ەلىمىزدىڭ ءىرى اۋە توراپتارىندا بىرقاتار ينفراقۇرىلىمدىق جوبالاردى ىسكە اسىرۋ جوسپارلانعان. اتاپ ايتقاندا, استانا جانە شىمكەنت اۋەجايلارىندا ەكىنشى ۇشۋ-قونۋ جولاقتارىنىڭ قۇرىلىسى باستالادى. سونىمەن قاتار الماتى اۋەجايىنىڭ ىشكى رەيستەر تەرمينالى قايتا جاڭعىرتىلىپ, اقتاۋ اۋەجايىنىڭ پەررونىنا كۇردەلى جوندەۋ جۇرگىزىلەدى.
سونىمەن قاتار وڭىرلىك جوبالار دا قاتار ىسكە اسىرىلماق. ولاردىڭ قاتارىندا اتىراۋ اۋەجايىندا جاڭا تەرمينال سالۋ, پاۆلودار اەرودرومىن رەكونسترۋكتسيالاۋ, كۋرورتتىق ايماقتارداعى كاتونقاراعاي, زايسان جانە كەندىرلى اۋەجايلارىنىڭ قۇرىلىسىن اياقتاۋ, سونداي-اق ارقالىق اۋەجايىن قالپىنا كەلتىرۋ بار.
سالتانات تومپيەۆا 2026 جىلدىڭ سوڭىنا دەيىن قازاقستاندىق اۋە كومپانيالارى 9 جاڭا ۇشاق ساتىپ الۋدى جوسپارلاپ وتىرعانىن ايتتى. بۇل اۋە كەمەلەرى پاركىنىڭ جالپى سانىن شامامەن 118 بىرلىككە دەيىن جەتكىزىپ, اۋە تاسىمالىنىڭ وتكىزۋ قابىلەتىن ارتتىرۋعا مۇمكىندىك بەرەدى. ايماقتاردىڭ كولىك قولجەتىمدىلىگىن قامتاماسىز ەتۋ جانە ءتۋريزمدى دامىتۋ ماقساتىندا 23 الەۋمەتتىك ماڭىزى بار اۋە باعىتى بويىنشا سۋبسيديالاۋ باعدارلاماسى دا جالعاسىن تابادى.
بۇدان بولەك, 2026 جىلى حالىقارالىق اۋە قاتىناسىن دامىتۋ جۇمىستارى دا كۇشەيتىلەدى. جاڭا حالىقارالىق باعىتتاردى اشۋ جانە بۇرىن توقتاتىلعان رەيستەردى قايتا جانداندىرۋ, سونداي-اق قولدانىستاعى باعىتتار بويىنشا رەيستەر جيىلىگىن ارتتىرۋ كوزدەلىپ وتىر. مارشرۋتتىق جەلىنى ورتالىق ازيا مەن تمد ەلدەرىنە, سونداي-اق تاياۋ شىعىس, ەۋروپا جانە ازيا مەملەكەتتەرىنە كەڭەيتۋ جوسپارلانعان. اتاپ ايتقاندا, ۆەنا, توكيو, ريم, ابۋ-دابي, ەر-رياد, داممام, لارناكا, اممان, سيان, شانحاي, ۋرۋمچي, كاشگار, ۆارشاۆا جانە وزگە دە باعىتتار بار.
جوسپارلانعان جوبالار قازاقستاننىڭ حالىقارالىق اۆياتسيالىق بايلانىستارىن كەڭەيتىپ, ەلدىڭ وڭىرلىك جانە ترانزيتتىك حاب رەتىندەگى ءرولىن كۇشەيتۋگە باعىتتالعان.
