فوتو: dimashnews.com
«Stranger» اتاۋىنىڭ بىرنەشە ماعىناسى
اعىلشىن تىلىنەن اۋدارعاندا «Stranger» اتاۋى بىرنەشە ماعىنانى بىلدىرەدى, ءارى ولاردىڭ بارلىعى ءۇش قۇرلىقتى قامتىپ, 13 ەلدە كورسەتىلگەن بۇل اۋقىمدى شوۋعا مازمۇندىق تۇرعىدان تولىق سايكەس كەلەدى.
تۋرعا اتاۋ بولعان ءان ماتىنىنە سۇيەنسەك, «جاھانكەز» اتاۋى ەڭ ءدال ءارى ماعىنالىق تۇرعىدان ورنىقتى نۇسقا ەكەنى انىق.
سونىمەن قاتار, شەتەلدىك كوپتەگەن بۇقارالىق اقپارات قۇرالدارى بۇل اتاۋدى «بەيتانىس» دەپ ءتۇسىندىرىپ ءجۇر. سەبەبى تۋر اياسىندا ديماش بىرقاتار ەلدەرگە العاش رەت باردى.
ديماشتىڭ ءوز سوزدەرىن ەسكە الساق, الىس تەڭىزدەر مەن مۇحيتتاردىڭ ار جاعىنداعى بۇل ساپارلاردىڭ نەگىزگى ماقساتى – تۋعان ەلىنىڭ مادەنيەتىن مۇمكىندىگىنشە كەڭ اۋديتورياعا تانىستىرۋ ەكەنى ايقىندالادى.
كونتسەرتتەردى ۇيىمداستىرۋ جۇمىستارى
شەتەلدىك كونتسەرتتەردى ۇيىمداستىرۋ جۇمىستارى كونتسەرت وتەتىن ۋاقىتتان 7–9 اي بۇرىن باستالادى. بۇل رەتتە قابىلداۋشى ەلدىڭ زاڭنامالىق تالاپتارى مەن مەنتاليتەتتىك ەرەكشەلىكتەرى ەسكەرىلەدى. گاسترولدىك قۇرام قازاقستاننان, يسپانيادان, رەسەيدەن, كۋبادان, گەرمانيادان جانە قىتايدان اتتاناتىن مۋزىكانتتاردان, كونتسەرت اكىمشىلەرىنەن, تەحنيكالىق پەرسونالدان تۇرادى. بۇلار – ءوز ءىسىنىڭ كاسىبي, تاجىريبەدەن وتكەن ماماندارى. ال كونتسەرت وتەتىن ەلدىڭ وزىندە پروموۋتەرلەر مەن كونتسەرت الاڭى قىزمەتكەرلەرى قوسىلىپ, شامامەن 200 ادامنان قۇرالعان ءبىرتۇتاس كوماندا قالىپتاسادى.
كونتسەرتتەن كەيىن جازىلعان پىكىرلەردىڭ بىرىندە: «ديماشتىڭ مۇنى قالاي جۇزەگە اسىراتىنى تۇسىنىكسىز, بىراق ءاربىر جاڭا كونتسەرتى – جاڭا ءبىر ءومىر سەكىلدى» دەلىنگەن. شىنىندا دا, شوۋداعى بەلگىلى ءبىر ءساتتى اتاپ وتسەڭىز, جانكۇيەرلەرى ونىڭ قاي قالادا, قاي كونتسەرتتە بولعانىن بىردەن ايتا الادى.
كونتسەرتتەرىندە كوپتەگەن تانىمال قوناقتار بولعان
ءۇش جىل ىشىندە ديماشتىڭ كونتسەرتتەرىندە كوپتەگەن تانىمال قوناقتار بولدى. قابىلداۋشى ەلدىڭ قۇرمەتتى قوناقتارى رەتىندە حالۋك لەۆەنت, سيتي نۋرحاليزا, بۋراك يەتەر ونەر كورسەتتى. نەيتان ۆانگپەن بىرگە ديماش العاش رەت ساحنادا دجەكي چاننىڭ «اۆانگارد» ءفيلمىنىڭ ساۋندترەگى – «Happy» ءانىن ۇسىندى. رەنات گايسينمەن بىرگە «قايران ەلىم» كومپوزيتسياسى ارقىلى كورەرمەندى كۇردەلى تاريحي ەستەلىكتەر الەمىنە جەتەلەدى. ال Madison Square Garden ساحناسىندا ۋولتەر افاناسەۆ «Love’s not over yet» ءانىن ورىنداپ, ارتىسكە سۇيەمەل جاسادى.
ديماشتىڭ اۆتورلىق اندەرى دە شىرقالدى
كوپتەگەن كونتسەرتتەردە كورەرمەندەر ديماشتىڭ اۆتورلىق اندەرىنىڭ پرەمەراسىنا كۋا بولدى: الماتىدا – «The Story of One Sky» جانە «El Amor En Ti», گونكونگتا – «When I’ve Got You» مەن «Smoke», استانادا – «Fire», نيۋ-يوركتە – «سامعاۋ» جانە «Living For The Game» تۋىندىلارى شىرقالدى.
سونداي-اق, ءارتىس كەيبىر قالالاردا جەرگىلىكتى تىڭدارمانداردى قابىلداۋشى ەلدىڭ تىلىندەگى اندەرمەن قۋانتتى: ەرەۆاندا – «سارەري وۆين مەرنەم», ىستامبۇلدا – «Gesi Bağlari», بارسەلونا مەن مەحيكودا – «Besame mucho».
ول جۇرەكتەردى اشادى
ءارتىستى ءتۇرلى قالالاردا بىرگە ارالاعان جانكۇيەرلەرى ديماش ەسىمىنىڭ وزدەرىنە ساپار بارىسىندا دا كومەكتەسكەنىن ايتادى: تاكسي جۇرگىزۋشىلەرى ءانشىنىڭ اتىن ەستي سالا قالاسى تۋرالى قۋانا اڭگىمەلەسسە, قوناقۇي يەلەرى قيىن ساتتە قولداۋ كورسەتە بىلگەن.
سونداي اسەرلى اڭگىمەلەردىڭ بىرىندە پراگادا قوناقۇيسىز قالۋ قاۋپى تۋعان ساتتە ديماشتىڭ ەسىمى كومەككە كەلگەنى تۋرالى اناسى مەن قىزىنىڭ ديالوگى كەلتىرىلەدى: «مىقتى ەكەن ءسىزدىڭ ديماشىڭىز, – دەدى قىزىم, – بارلىق ەسىكتى اشادى».«ول ەسىكتەردى ەمەس, ادامداردى, ولاردىڭ جۇرەكتەرىن اشادى, – دەدىم مەن, – ال ادامداردىڭ جۇرەگىن اشۋ – الدەقايدا قيىن نارسە».
جانكۇيەرلەر مەن ءارتىس اراسىنداعى تاعدىرلار مەن وقيعالاردان ورىلگەن مۇنداي بەرىك بايلانىس, ءسوزسىز, مىناداي سۇراققا بەرىلگەن جاۋاپپەن ايقىندالادى. ء«سىز جانكۇيەرلەرگە قانشالىقتى تاۋەلدىسىز؟» دەگەن ساۋالعا الەمگە ايگىلى ءانشى بىلاي دەگەن ەكەن.
«قاراپايىم تىلمەن ايتقاندا – ماكسيمالدى تۇردە. كەز كەلگەن ءارتىس ءۇشىن, سونىڭ ىشىندە مەن ءۇشىن دە, كورەرمەنسىز بۇل كاسىپتىڭ ءمانى جوق ەكەنىن تۇسىنەمىن. مەن نەوكلاسسيكا جانرىنداعى باعىتىمدى ساقتاي وتىرىپ, ءارتۇرلى ستيلدە, ءتۇرلى باعىتتا ءان ايتامىن. مۋزىكامنىڭ جاپپاي قالاي قابىلداناتىنىنا اسا قاتتى تاۋەلدى بولۋعا تىرىسپايمىن, سەبەبى ول بەلگىلى ءبىر دەڭگەيدە وزىندىك ەرەكشەلىگى بار مۋزىكا. بارشا كورەرمەنگە مەنى بارلىق ىستە قولداپ جۇرگەندەرى ءۇشىن العىس ايتامىن. مەنى سىزدەرمەن قاۋىشتىرعانى ءۇشىن اللاعا مىڭ شۇكىرشىلىك ايتامىن», دەيدى ديماش قۇدايبەرگەن.
2025 جىلى ديماش قىتاي, قىرعىزستان, ۆەتنام سياقتى ەلدەردە كونتسەرت بەرىپ, الماتى مەن اقتاۋدا جەرلەستەرىمەن كەزدەستى. سونداي-اق العاش رەت افريكا قۇرلىعىنا – مىسىر ەلىنە تابان تىرەدى. بۇل – الداعى جولدىڭ اشىق ەكەنىن, الدا تالاي تىڭ ءارى ماڭىزدى شارالاردىڭ تۇرعانىن بىلدىرەدى.
الەمدى باۋراعان داۋىس نەمەسە ءانشى ديماش قۇدايبەرگەننىڭ ومىرىندەگى تىلسىم وقيعالار حاقىندا
ديماش قۇدايبەرگەن 2025 جىلعى چەحيا حيت-شەرۋىنىڭ جەڭىمپازى اتاندى
ديماش قۇدايبەرگەن تۋرالى «شەكسىز مۋزىكا» اتتى كىتاپ جارىققا شىقتى
