فوتو: akorda.kz
«قازاقستان كورشىلەرمەن جانە بارلىق مۇددەلەس مەملەكەتتەرمەن دايەكتى تۇردە دوستىق قارىم-قاتىناس پەن جان-جاقتى ىنتىماقتاستىق ورناتىپ كەلەدى. ءبىزدىڭ ماقساتىمىز – ايقىن. ول – ەلدىڭ ەگەمەندىگىن نىعايتۋ, قازاقستاننىڭ قاۋىپسىزدىگى مەن الەۋمەتتىك-ەكونوميكالىق دامۋىن قامتاماسىز ەتەتىن مىندەتتەردى شەشۋ. ءاربىر سامميت, جوعارى دەڭگەيدەگى ءار كەزدەسۋ, بيزنەس-فورۋم ەلىمىزدىڭ حالىقارالىق بەدەلىن ارتتىرىپ, ەكونوميكالىق الەۋەتىن كۇشەيتەدى. قازىر بۇكىل الەمدە ينۆەستيتسيا ءۇشىن قىزۋ باسەكە ءجۇرىپ جاتىر. بىزگە بۇدان قالىس قالۋعا بولمايدى. ورتالىق ازياداعى جانە كاۆكاز ايماعىنداعى ەكونوميكاسى ەڭ ءىرى ەل سانالامىز. الايدا ۇكىمەتكە ساپالى ءوسىمدى قامتاماسىز ەتۋ مىندەتى جۇكتەلدى. ۇكىمەت پەن ۇلتتىق بانك ءوزارا كەلىسە وتىرىپ, قازىرگىدەي كۇردەلى, ءتىپتى, ەرەكشە جاعدايدا اكادەميالىقتان جانە اسىرەساقتىقتان ادا, ناقتى شەشىم قابىلداۋى قاجەت. تەك بيىلدىڭ وزىندە حالىقارالىق كەزدەسۋلەردىڭ ناتيجەسىندە جالپى قۇنى 70 ميلليارد دوللاردان اساتىن كوممەرتسيالىق كەلىسىمدەرگە قول قويىلدى. سونىڭ ارقاسىندا ەلىمىزدە زاماناۋي كاسىپورىندار اشىلىپ, ساپالى جۇمىس ورىندارى قۇرىلۋدا», دەدى پرەزيدەنت.
پرەزيدەنت ءوز سوزىندە ايماققا تارتىلعان ينۆەستيتسيانىڭ 60 پايىزدان استامى قازاقستانعا تيەسىلى ەكەنىنە نازار اۋداردى.
«ورتالىق ازيا پليۋس» فورماتىنا سۇرانىس ارتىپ كەلەدى. بيىل ايماق ەلدەرى ەۋروپا وداعىمەن, يتاليامەن, قىتايمەن, رەسەيمەن, اقش-پەن جانە جاپونيامەن بىرلەسكەن كەلىسسوزدەر جۇرگىزدى. ايماققا تارتىلعان ينۆەستيتسيانىڭ 60 پايىزدان استامى قازاقستانعا تيەسىلى. ينۆەستيتسيامەن بىرگە جاڭا تەحنولوگيا, ءبىلىم كەلەدى, بىرلەسكەن عىلىمي-تەحنيكالىق ورتالىقتار مەن شەتەلدىك جوعارى وقۋ ورىندارىنىڭ فيليالدارى اشىلادى. قازاقستان تاۋارلارى مەن وتاندىق بيزنەسكە كەز كەلگەن شەكارا اشىق. سوندىقتان بارشا شەتەلدىك سەرىكتەستەرمەن ءوزارا ءتيىمدى ىنتىماقتاستىق قۇرۋ – زامان تالابى, ءتىپتى, ومىرلىك قاجەتتىلىك. وسىلايشا, قازاق ەلى جاڭعىرۋدىڭ جاڭا كەزەڭىنە قادام باسىپ كەلەدى. ءبىز وسى باعىتتان تايماي, ءالى دە كوپ جۇمىس ىستەۋىمىز كەرەك», دەدى قاسىم-جومارت توقاەۆ.
