ەسكەرتكىش تاقتانىڭ اشىلۋ راسىمىنە دەنساۋلىق ساقتاۋ ءمينيسترى اقمارال ءالنازاروۆا مەن ۇلدانا مىرزۋاننىڭ اناسى ءساليما يشانقۇلقىزى, تۋىستارى جانە جەدەل مەديتسينالىق جاردەم ستانتسياسىنىڭ قىزمەتكەرلەرى قاتىستى.
«ۇلدانا قالدارحانقىزى 2017-2021 جىلدارى استانا قالاسىنداعى «دانالىق» كوللەدجىندە ەمدەۋ ءىسى ماماندىعى فەلدشەر بىلىكتىلىگى بويىنشا ءبىلىم الىپ, وقۋ ورنىن ۇزدىك ديپلوممەن بىتىرگەن. بۇگىن سول كوللەدجدە ۇلدانانىڭ اتىنداعى ارنايى اۋديتوريا اشىلادى. وقۋ بىتىرگەلى 4 جىل كولەمىندە ءومىرىنىڭ سوڭىنا دەيىن استانا قالالىق جەدەل مەديتسينالىق جاردەم ستانتسياسىندا ەڭبەك ەتتى. جاس بولسا دا, كاسىبي ادالدىعىمەن كوزگە تۇسكەن جانە شۇعىل جاعدايلاردا ءوز بەتىنشە شەشىم قابىلداي الاتىن بىلىكتى مامانعا اينالدى. ۇلدانا قالدارحانقىزىنىڭ تۋعان-تۋىستارىنا, اناسىنا, جاقىندارىنا, جۇبايىنا, جەدەل جاردەم قىزمەتكەرلەرى ۇجىمىنا قازاقستانداعى مەديتسينا سالاسىندا جۇمىس ىستەپ جۇرگەن 300 مىڭنان اسا قىزمەتكەردىڭ اتىنان, ءوز اتىمنان قايعىرىپ, كوڭىل ايتامىن», دەدى مينيستر.
سونىمەن قاتار مينيستر ۇلدانا مىزۋاننىڭ ەسىمى وتاندىق مەديتسينا تاريحىندا جازىلاتىنىن اتاپ ءوتتى.
ۇلدانا مىرزۋاننىڭ اناسى ءساليما يشانقۇلقىزى مارقۇم قىزىنا قۇرمەت كورسەتىلىپ جاتقانى ءۇشىن دەنساۋلىق ساقتاۋ ءمينيسترى مەن مەديتسينا سالاسىنىڭ قىزمەتكەرلەرىنە العىسىن ايتتى.
استانا قالالىق جەدەل مەديتسينالىق جاردەم ستانتسياسىنىڭ قىزمەتكەرلەرى ەسكەرتكىش تاقتا الدىنا گۇل شوقتارىن قويدى.
ەسكەرتكىش تاقتانىڭ اشىلۋىنان كەيىن جەدەل مەديتسينالىق جاردەم ستانتسياسى مەكەمەسىندە جايىلعان داستارقان باسىندا استانا قالاسىنداعى شەيح كۋنتا قاجى مەشىتىنىڭ باس يمامى بەكقوجا ومىرزاق مارقۇمنىڭ رۋحىنا ارناپ قۇران باعىشتادى.
ەستەرىڭىزگە سالا كەتەيىك, كاسىبي قىزمەتىن اتقارۋ بارىسىندا اۋىر جاراقات العان فەلدشەر ۇلدانا مىرزۋان 18 قاراشا كۇنى اۋرۋحانادا قايتىس بولعان ەدى.
سول كۇنى, 18 قاراشادا, قاسىم-جومارت توقاەۆ ۇلدانا مىرزۋاندى «ەرلىگى ءۇشىن» مەدالىمەن ناگرادتادى. استانا اكىمدىگى ونىڭ وتباسىنا جان-جاقتى كومەك كورسەتىلەتىنىن, ماتەريالدىق قولداۋ مەن بارلىق ءراسىم شىعىندارى وتەلەتىنىن مالىمدەدى.
ءماجىلىس كۋلۋارىندا دەنساۋلىق ساقتاۋ ءمينيسترى اقمارال النازاروۆا فەلدشەر ۇلدانا مىرزۋان وقىعان مەديتسينالىق كوللەدجدەگى دارىسحاناعا ونىڭ ەسىمىن بەرۋ جوسپارلانىپ وتىرعانىن حابارلاعان ەدى.
