ماڭعىستاۋدا ەكپەدەن زارداپ شەككەندەرگە استانادان دارىگەرلەر كەلدى

اقتاۋ. 23 ناۋرىز. ماڭعىستاۋ وبلىسىنا قىزىلشاعا قارسى ەكپەدەن زارداپ شەككەن جاسوسپىرىمدەردى قوسىمشا قاراۋ ءۇشىن استانادان ارنايى ءتورت دارىگەر كەلدى. بۇل تۋرالى egemen.kz ءتىلشىسى حابارلادى. ماڭعىستاۋ وبلىستىق دەنساۋلىق ساقتاۋ باسقارماسى باسشىسى ر.بەكتۋباەۆتىڭ ايتۋىنشا, جاڭاوزەندەگى 15 بالانىڭ دەنساۋلىعىن رەسپۋبليكالىق ورتالىقتاردان كەلگەن 6 مامان قاداعالاۋدا. استانادان كەلگەن 4 مامان وبلىس ورتالىعىنداعى اۋرۋحانادا جاتقان بەس ناۋقاستى قاراماق. سونداي-اق, ولار جاڭاوزەن قالاسىنا بارىپ, ەكپەدەن زارداپ شەككەن ناۋقاستارمەن جانە اتا-انالارمەن جۇمىس جۇرگىزبەك. ودان بولەك, قيىن جاعدايلاردا بالالاردى جىبەرەتىن كلينيكالاردى انىقتاماق. بۇگىندە استانا قالاسىنا جىبەرىلگەن 17 بالانىڭ 8-ءى اۋرۋحانادان شىعارىلعان. باسقارما باسشىسى سوڭعى كەزدەرى ەكپەدەن سوڭ ءجيى-ءجيى تالما ۇستاپ, اۋرۋحانادا قينالىپ جاتقان قىز بالا تۋرالى بەينەروليككە تۇسىنىك بەردى. «عالامتوردا ونى قىزدىڭ اعاسى تۇسىرگەندىگى تۋرالى ايتىلعان, بىراق ونى باسقا ايەل ادام تۇسىرگەن. قىزدىڭ ءوزى دە, اتا-اناسى دا بۇل بەينە روليكتىڭ تۇسىرىلۋىنە نارازى», دەيدى ول. گۇلايىم شىنتەمىرقىزى. دەرەك: egemen.kz. سۋرەت: puzkarapuz.ru.