سەنىڭ جالىنداعان ءومىرىڭ قاس-قاعىم ساتتىك بولعانى ما؟ نە دەسەم ەكەن؟ ءار نارسەگە يكەمدى قىزىل تىلگە نە بولعان؟ ءتىلىم كۇرمەلدى. توڭىرەگىم قاراۋىتىپ كەتتى. جان-جاعىما قاراسام ءبىر قۇيرىقتى جۇلدىز اعىپ بارا جاتتى. سول جۇلدىز سەنسىڭ بە, اسەكە, قۇداي-اۋ؟! ءجا, سەنى ىزدەپ سوڭعى دەمىمىز بىتكەنشە وسىلاي دەي بەرەتىن شىعارمىز, امال جوق.
ەكەۋمىز بايقادامنىڭ مەكتەبىندە 8-سىنىپتا بىرگە وقىعان تۇلەك ەدىك. كوپ حيكايانى ايتىپ كەرەگى نە؟ بۇكىل ءومىرىمىز بىرگە ءوتتى عوي. ءبارى كوز الدىمدا. ءبارى ەسىمدە.
سەن قازاقتىڭ تەاتر جانە كينو ونەرىندە ءبىر حالىقتىڭ عانا ۇلتتىق ماقتانىشى بولعان جوقسىڭ, الەمدىك دەڭگەيدەگى ۇلى تۇلعالاردىڭ ءبىرى عانا ەمەس, بىرەگەيى بولدىڭ. كوپ ايت, از ايت, سەنىڭ مىنا كەتىسىڭ ۇلى دالانى تىتىرەتكەن ۇلتتىڭ قايعىسىنا اينالدى, قابىرعامىزدى سوگىپ.
حالقىڭا سۇيىكتى بولعانعا نە جەتسىن؟ جالعىز مەن عانا ەمەس, ەلىڭ جوقتاپ وتىر. تاعى دا نە دەيىن, وكىنىشپەن بىتەتىن جازمىش ىسىنە داۋا جوق ەكەن. شۇكىرى سول – سەن ۇلت ماقتانىشى بولىپ قالا بەرەسىڭ!
ساعىنىشتى كوڭىلمەن جوقتاي جۇرەرمىز, اسەكە.
قوش بول, باۋىرىم!
پەيىشتە نۇرىڭ شالقىسىن!
ءىليا جاقانوۆ,
قازاقستاننىڭ ەڭبەك ەرى
