اتىراۋدا نۇرجان وركەشباەۆتىڭ ۇيلەنۋ تويى ءوتتى

اتىراۋ. 11 تامىز. اتىراۋ وبلىسىندا 9 جاسىندا 90-داعى قارياداي قارتايۋ سىرقاتىنا ۇشىراعان نۇرجان وركەشباەۆتىڭ ۇيلەنۋ تويى ءوتتى. بۇل تۋرالى egemen.kz ءتىلشىسى حابارلادى. 2000 جىلى قىزىلقوعا اۋدانىنىڭ مۇقىر اۋىلدىق وكرۋگىندە تۇراتىن نۇرجان وركەشباەۆتىڭ  ەرتە قارتايۋ سيندرومىنا ۇشىراعانى انىقتالدى. سودان بەرى ونىڭ تاعدىرى كوپشىلىكتىڭ كوز الدىندا ءوتىپ كەلەدى. وعان پروگەريا (تەرىنىڭ ەرتە قارتايۋى) سىرقاتى دەگەن دياگنوز قويىلعان سوڭ بىرنەشە رەت ەم قابىلدادى. 2011 جىلدىڭ اياعىندا «نيسسامەد» ەمحاناسىندا 2 كەزەڭنەن تۇراتىن كەشەندى كوسمەتولوگيالىق وپەراتسيا جاسالدى. جاقىندا, دالىرەك ايتقاندا, 7 تامىزدا نۇرجان وركەشباەۆ اسەمگۇل ەسىمدى ارۋعا ۇيلەنىپ, شاڭىراق كوتەردى. ۇيلەنۋ تويى نۇرجاننىڭ اتا-اناسى تۇراتىن مۇقىر اۋىلىندا ءوتتى. تويعا شاقىرىلعان 300-گە جۋىق قوناقتىڭ اراسىندا رەسەيلىك «پۋست گوۆوريات» باعادارلاماسىنىڭ جۇرگىزۋشىسى اندرەي مالاحوۆقا دا شاقىرۋ بيلەتى جىبەرىلگەن ەدى. ويتكەنى, بۇدان 4 جىلداي بۇرىن نۇرجان وركەشباەۆ اتالعان تەلەباعدارلاما حابارىنا قاتىستى. سول كەزدە باعدارلاما جۇرگىزۋشىسى اندرەي مالاحوۆ ونىڭ ۇيلەنۋ تويىنا كەلۋگە ۋادە بەرگەن بولاتىن. رەسەيلىك تەلەجۇرگىزۋشى قازاق بالاسىنىڭ تويىنا كەلە العان جوق. ءدال وسى ۋاقىتتا شەتەلدە دەمالىستا جۇرگەن ول جاس وتاۋ يەلەرىنە ارنايى سىيلىق جولدايتىنىن حابارلاپتى. جولداسبەك شوپەعۇل. دەرەك, سۋرەت: egemen.kz.