عالىمنىڭ ەسىمىن ەستە قالدىرۋ ماقساتىندا تۇلكىباس اۋدانىنىڭ اكىمدىگى مەن جاناشىر اعايىن تاراپىنان بىرقاتار اۋقىمدى شارالاردى جۇزەگە اسىرۋ دا قولعا الىنىپ جاتىر. سونداي يگى شارالاردىڭ قاتارىندا قازاق رۋحانياتىنىڭ ابىزى مەكەمتاس مىرزاحمەت ۇلىنا ارناپ, ءوزىنىڭ تۋعان جەرى تۇلكىباس اۋدانى, تۇركىباسى اۋىلىندا سالىنىپ جاتقان «شىلتوبە – مەكەمتاس بيىگى» تاعزىم كەشەنىنىڭ تەحنيكالىق اشىلۋ راسىمىنە قاتىستىق. ءبىز, دارحان مىڭباي باستاعان بىرقاتار ازامات ەڭ الدىمەن مەكەمتاستاي عۇلاما اعامىزدىڭ رۋحىنا ءمىناجات ەتىپ, تاعزىم كەشەنىنىڭ قۇرىلىس جۇمىستارىمەن تانىستىق. كەشەنگە جازىلعان سوزدەردە قاتە كەتپەۋىن قاداعالاپ, ءوز پىكىرىمىزدى ورتاعا سالدىق. سودان كەيىن اۋىل مەشىتىندە بەرىلگەن اسقا قاتىسقان قوناقتار قازاق ادەبيەتىنىڭ اسا كورنەكتى وكىلى, ۇلت رۋحانياتى ءۇشىن ەرەن ەڭبەك سىڭىرگەن عالىمنىڭ مول مۇراسىن ناسيحاتتاپ, ونى ەل-جۇرتقا كەڭىنەن تانىتاتىن مۋزەيدى اشۋ, جىل سايىن 16 جەلتوقساندا عىلىمي كونفەرەنتسيالار ۇيىمداستىرۋ, تاعى باسقا دا ماسەلەلەردى كوتەردى. جينالعان قاۋىم وسى ايتىلعان ۇسىنىستاردىڭ بارلىعىن دا ءبىر اۋىزدان قولدادى.
ايتپاقشى, اۋداننىڭ بەلسەندى ازاماتتارى تاعزىم كەشەنىنە قاتىستى ايتقان ءبىر-ەكى ەسكەرتۋلەرىمىزدى ورىندى دەپ قولداپ, ءبىر اپتادا تۇزەتىپ قويعانىنا ريزا بولدىق.
«جۇمىلا كوتەرگەن جۇك جەڭىل» دەگەندەي, مەكەمتاس اعانىڭ شاكىرتتەرى مەن اعايىنداردىڭ كۇشىمەن «شىلتوبە – مەكەمتاس بيىگى» تاعزىم كەشەنى بوي كوتەرىپ, وعان باراتىن جولدى دا تەگىستەپ, اسفالتتاپ قويىپتى. ءبىر سوزبەن ايتقاندا, الداعى ۋاقىتتا مۇندا كەلگەن ادامدار عۇلاما اعامىزعا ءمىناجات ەتىپ, م.مىرزاحمەت ۇلىنىڭ رۋحىنا قۇران باعىشتاپ, تاعزىم كەشەنىن كورىپ تاماشالاۋىنا تولىق مۇمكىندىك جاسالعان.
مەكەمتاس مىرزاحمەت ۇلى بۇكىل سانالى عۇمىرىن ابايتانۋ, ياساۋيتانۋ, باۋىرجانتانۋ, مۇحتارتانۋ مۇرالارىن زەردەلەۋگە, ولاردى حالىققا تانىتۋعا, وتاندىق ونوماستيكا, ادەبيەتتانۋ عىلىمدارىنىڭ كەرەگەسىن كەڭەيتۋگە ارناعان عۇلاما بولعانى بارىمىزگە بەلگىلى. ماكەڭ ۇزاق جىلدار بويى ۇلت رۋحانياتىنىڭ ىلگەرى باسۋىنا سۇبەلى ۇلەس قوسىپ, كوپتەگەن شاكىرت تاربيەلەدى. ۇزاق جىلعى قاجىرلى ىزدەنىستەرىنەن تۋعان قۇندى ەڭبەكتەرى بيلىك پەن وقىرمان تاراپىنان جوعارى باعاعا يە بولدى. ەلگە, ادەبيەت پەن عىلىمعا سىڭىرگەن سۇبەلى ەڭبەكتەرىن ەسكەرە وتىرىپ, بولاشاقتا جەلتوقسان ايىنداعى ءبىر كۇندى «مەكەمتاس كۇنى» دەپ بەلگىلەۋ ماسەلەسىن قاراستىرۋ جاعىن ۇكىمەتكە ۇسىنامىز. بۇل ۇسىنىستى زيالى قاۋىم وكىلدەرى دە قولدايدى دەگەن سەنىمىز مول.
قابىل دۇيسەنبي,
جۋرناليست, قوعام قايراتكەرى
