بۇل رەتتە اسكەردىڭ ماتەريالدىق-تەحنيكالىق بازاسىن كۇشەيتىپ, سوعىس تەحنيكالارىن تسيفرلىق مۇمكىندىكتەرمەن جەتىلدىرە ءتۇسۋ ءىسى – بولەك ماسەلە. ايتپاعىمىز – اسكەردەگى ادام كاپيتالىن دامىتىپ, سارباز قاۋىپسىزدىگىن قامتاماسىز ەتۋ. ال وسى ماسەلەنىڭ قالاي قولعا الىنىپ جاتقانىن جۋىردا قورعانىس مينيسترلىگىنىڭ الماتى قالاسىنا ارنايى ۇيىمداستىرعان ءباسپاسوز تۋرى بارىسىندا كوزىمىزبەن كوردىك.
الماتى ساپارىنان ۇققانىمىز, ەلىمىزدىڭ قارۋلى كۇشتەرىندە مەرزىمدى اسكەري قىزمەتتىڭ جاڭا فورماتى – «Sarbaz+» جوباسى ەنگىزىلىپ جاتىر. جوبا تسيفرلىق قۇزىرەتتەردى دامىتۋعا, ادام كاپيتالىن نىعايتۋعا ءارى جەكە قۇرامنىڭ قاۋىپسىزدىك دەڭگەيىن ارتتىرۋعا باعىتتالعان. بۇل تۋرالى ءسال كەيىنىرەك, الدىمەن اسكەرگە مامان دايارلايتىن وقۋ ورىندارىنا بارعان ساپارىمىزدى بايانداساق.
الدىمەن قورعانىس مينيسترلىگىنە قاراستى ەكى وقۋ ورنىنا ات ءىزىن سالدىق. ءبىزدى استانادان وڭتۇستىككە الىپ شىققان ارنايى اسكەري بورت الماتىعا قونعان بويدا بىردەن راديوەلەكترونيكا جانە بايلانىس اسكەري-ينجەنەرلىك ينستيتۋتىنا بەت الدىق. وندا ءبىزدى ينستيتۋت باستىعى گەنەرال-مايور نۇرتاس قاباقوۆ قارسى الىپ, وقۋ ورنىنىڭ مامان دايارلاۋداعى سوڭعى سونى جەتىستىكتەرىن تانىستىرىپ شىقتى. ينستيتۋت ارنايى مەملەكەتتىك تاپسىرىس اياسىندا ءدال قازىر «دەگەلەك» اتتى وتاندىق اسكەري ۇشقىشسىز ۇشۋ اپپاراتىن قۇراستىرىپ, سىناقتان وتكىزىپ جاتىر ەكەن. «دەگەلەكتىڭ» مۇمكىندىكتەرىن ەستىگەندە الەم جاپپاي قولدانا باستاعان وسىنداي زاماناۋي تەحنيكالارعا كوبىرەك ارقا سۇيەۋ كەرەكتىگى تۋرالى ويىمىزدى ءتىپتى قامشىلاي تۇستىك.
ينستيتۋتتىڭ بىرنەشە بولىمنەن تۇراتىن شەبەرحاناسى كىشىگىرىم فابريكا ما دەرسىڭ. مۇندا راديوتەحنيكالىق بۇيىمداردى قۇراستىرۋ, لازەرلىك كەسۋ جانە 3D باسىپ شىعارۋ, مودەلدەۋ جانە جوبالاۋ زەرتحانالارى مەن وقۋ-وندىرىستىك-تسەحىندا تىرشىلىك قايناپ جاتىر.
ينستيتۋتتاعى وزىق تاسىلدەردىڭ قاتارىنا جاتقىزاتىن تاعى ءبىر جەتىستىك – ەلەكتروندى اتۋ ترەناجەرلارى. مۇنىڭ ءبىرى تير بولسا, ەكىنشىسىندە ساربازدار كوماندالىق ۇرىس تاپسىرماسىن ورىندايدى. ياعني ۇلكەن مونيتور ارقىلى اۋە كۇشتەرىنە قارسى قورعانىس جۇيەسىمەن جۇمىس ىستەپ, ماشىقتانادى. گەنەرال-مايور ن.قاباقوۆتىڭ ايتۋىنشا, بۇل ءتاسىل قانشاما ۋاقىت پەن قارجىنى شىعىندايتىن ءداستۇرلى پوليگونعا بارىپ جاتتىققاننان ەش ايىرماشىلىعى جوق.
قورعانىس مينيسترلىگىنىڭ ب.مومىش ۇلى اتىنداعى اسكەري-سپورت كوللەدجىندە دە ايتۋعا تۇرارلىق جاڭالىق بارشىلىق. بىلتىر بۇرىنعى رەسپۋبليكالىق «جاس ۇلان» مەكتەبى بازاسىندا اسكەري-سپورتتىق كوللەدج بولىپ قايتا قۇرىلۋىنىڭ ارقاسىندا وقۋ ورنىنىڭ عيماراتى كۇردەلى جوندەۋدەن وتكىزىلگەن. وعان قوسا مۇمكىندىكتەرى دە كوبەيگەن. وقۋ كورپۋسى, كازارماسى, سپورتتىق بازاسى جاڭا جيھازدارمەن, ينۆەنتارلارمەن جابدىقتالىپتى. ال كوللەدجدىڭ ىشكى ارلەۋى سوڭعى ينتەرەر ۇلگىلەرىمەن قايتا جوندەلىپ, ادام تانىماستاي وزگەرگەن. سپورت زالى مەن ستاديونى دا بۇگىنگى سۇرانىسقا ساي قايتا جوندەلىپ, جابدىقتارى دا ارتا تۇسكەن.
قورعانىس مينيسترلىگىنىڭ بۇل اسكەري-سپورت كوللەدجى وسى وقۋ جىلىندا ءوزىنىڭ العاشقى كۋرسانتتارىن قابىلداپتى. ءباسپاسوز تۋرى بارىسىندا جۋرناليستەرگە كوللەدجدىڭ سپورتتىق جانە وقۋ ينفراقۇرىلىمى, سونداي-اق جاس اسكەري-پاتريوتتىق كادرلاردى دايارلاۋدىڭ جاڭارتىلعان مودەلى دە تانىستىرىلدى.
ال «Sarbaz+»-كە قايتا ورالساق, جوبانىڭ قاناتقاقتى الاڭى رەتىندە الماتى وبلىسىنداعى 78460 اسكەري ءبولىمى تاڭدالعان. «Sarbaz+» مەرزىمدى اسكەري قىزمەتكە دەگەن كوزقاراستى ترانسفورماتسيالاۋ اياسىندا جۇزەگە اسىرىلىپ, ساربازداردى دايارلاۋدىڭ نەعۇرلىم سانالى ءارى دامۋعا باعىتتالعان جۇيەسىن كوزدەيدى.
قورعانىس ۆيتسە-ءمينيسترى دارحان احمەديەۆتىڭ ايتۋىنشا, مۇنداعى نەگىزگى ماقسات – ساربازداردىڭ ءبىر جىلدىق اسكەري قىزمەتىن بارىنشا ءتيىمدى, مازمۇندى ءارى پايدالى وتكىزۋىنە جاعداي جاساۋ.
– جوبا اياسىندا اسكەري بولىمدە زاماناۋي ينفراقۇرىلىم قالىپتاستىرىلعان. اتاپ ايتقاندا, دروندار ارەناسى, بايلانىس كابينەتى جۇمىس ىستەيدى. سونىمەن قاتار ساربازدارعا جاتتىعۋ كەزىندە فيتنەس-براسلەتتەر بەرىلىپ, ولاردىڭ دەنساۋلىعى مەن فيزيكالىق بەلسەندىلىگى تۇراقتى باقىلاۋدا بولادى. ساربازدار سپورتپەن جۇيەلى تۇردە اينالىسادى: اپتاسىنا ءۇش رەت دجيۋ-دجيتسۋمەن جاتتىعادى. بۇعان قوسا ەلەكتروندى تير, فۋتبول الاڭى, ستريتبول جانە ۆوركاۋت الاڭدارى بار. ءبىر جىلدىق قىزمەت بارىسىندا ساربازدار اعىلشىن ءتىلىن مەڭگەرىپ شىعادى, شاحماتتان رازرياد الۋ مۇمكىندىگىنە يە بولادى, سپورتپەن كۇندەلىكتى شۇعىلدانىپ, دجيۋ-دجيتسۋدان سپورتتىق دارەجەگە قول جەتكىزە الادى. ياعني اسكەري قىزمەت تەك مىندەت اتقارۋ ەمەس, جەكە دامۋ كەزەڭى رەتىندە ۇيىمداستىرىلىپ وتىر, – دەيدى قورعانىس ءمينيسترىنىڭ ورىنباسارى.
د.احمەديەۆ «Sarbaz+» جوباسى ءبىر جىلدىق قاناتقاقتى جوبا ەكەنىن دە اتاپ ءوتتى. الداعى ۋاقىتتا بۇل جوبا باسقا اسكەري بولىمدەرگە دە كەزەڭ-كەزەڭىمەن ەنگىزىلمەك. الداعى كوكتەمگى شاقىرۋ كەزىندە تاعى ەكى اسكەري ءبولىمدى قوسۋ جوسپارلانىپ وتىر. كەيىن جىل سايىن ەكى-ءۇش, ودان دا كوپ اسكەري ءبولىم قامتىلىپ, جوبانىڭ اۋقىمى كەڭەيە تۇسەدى.
استانا – الماتى – استانا
