فەستيۆال قالانىڭ ەڭ شىعارماشىل, بەلسەندى جانە تالانتتى جوعارى وقۋ ورىندارىن بىرىكتىرىپ, قاراعاندىنى ستۋدەنتتىك ونەردىڭ, ەنەرگيا مەن تىڭ يدەيالاردىڭ ورتالىعىنا اينالدىردى.
فەستيۆالدىڭ اشىلۋى ناعىز مادەني وقيعاعا اينالدى. ءاربىر جوعارى وقۋ ورنى وزىنە ءتان ءستيلدى, مىنەزدى جانە شىعارماشىلىق بولمىستى ايقىندايتىن جەكە كونتسەرتتىك نومەر ۇسىندى.
ساحنا ستۋدەنتتىك جاستار مەن كاسىبي ارتىستەردىڭ جارقىن ونەرى توعىسقان, ۇلكەن دەڭگەيدەگى شوۋ الاڭىنا اينالدى.
اشىلۋ سالتاناتىنا قازاقستان ەستراداسىنىڭ جۇلدىزدارى – Dakelot, Zhenis جانە قايرات نۇرتاس ارنايى قاتىسىپ, فەستيۆال قوناقتارى مەن قاتىسۋشىلارىنا ەرەكشە سەرپىن سىيلادى. ولاردىڭ ونەر كورسەتۋى جاستار باستامالارىن قولداۋدىڭ ماڭىزىن ايقىنداپ, ءىس-شارانىڭ دەڭگەيىن ودان ءارى كوتەردى.
مۋزىكا, جارىق, كرەاتيۆتى قويىلىمدار فەستيۆالگە قۋاتتى باستاۋ بەرىپ, كەلەسى بايقاۋ كۇندەرىنىڭ جوعارى ديناميكاسىن ايقىندادى.
ەكى كۇن بويى قاتىسۋشىلار ۆوكالدىق شەبەرلىگىن, بي تەحنيكاسىن, اسپاپتىق ورىنداۋ دەڭگەيىن, ساحنالىق سويلەۋ مادەنيەتىن جانە كرەاتيۆتى ويلاۋ قابىلەتتەرىن كورسەتتى.
ءار نوميناتسيا ستۋدەنتتەردىڭ ءوز الەۋەتىن اشاتىن الاڭعا اينالىپ, قازىلار القاسى ۋنيۆەرسيتەت كوماندالارىنىڭ دايىندىق دەڭگەيى مەن ورىنداۋ ساپاسىن جوعارى باعالادى.
فەستيۆال قاراعاندى ستۋدەنتتەرىنىڭ كاسىبي ساحنالار مەن رەسپۋبليكالىق دەڭگەيگە لايىق كونتەنت جاساي الاتىنىن ايقىن دالەلدەدى.
فەستيۆالدىڭ جابىلۋ ءراسىمى دە ەرەكشە اسەرگە تولى ءوتتى. قاتىسۋشىلاردىڭ تولقىنىسى, شىنايى ەموتسيالار جانە جەڭىمپازداردى جاريالاۋ ءساتى ەستە قالارلىق بولدى. ۇيىمداستىرۋشىلار ءاربىر جوعارى وقۋ ورنى ستۋدەنتتىك شىعارماشىلىقتى دامىتۋعا وزىندىك ۇلەس قوسقانىن, ال ورىنداۋ دەڭگەيىنىڭ وتە جوعارى بولعانىن اتاپ ءوتتى.
حالىق حورەوگرافياسى اتالىمىندا قاراعاندى مەديتسينا ۋنيۆەرسيتەتىنىڭ «قاراكوز» شىعىس حالىق ءبيى ءانسامبلى 1 ورىن السا, زاماناۋي حورەوگرافيا بويىنشا قاراعاندى مەديتسينا ۋنيۆەرسيتەتىنىڭ «New Wave» زاماناۋي بي ستۋدياسى جەڭىمپاز اتاندى.
اسپاپتىق ورىنداۋشىلىق (سولو) بويىنشا ابىلقاس ساعىنوۆ اتىنداعى قاراعاندى تەحنيكالىق ۋنيۆەرسيتەتى ستۋدەنتى ارمان كاكىم, اسپاپتىق ورىنداۋشىلىق (انسامبل) بويىنشا قاراعاندى مەديتسينا ۋنيۆەرسيتەتى «Zhiger» قازاق ۇلتتىق اسپاپتار ءانسامبلى, حالىق ۆوكالى بويىنشا «Bolashaq» اكادەمياسى ستۋدەنتى ايىمجان مارالقىزى, ەسترادالىق ۆوكال بويىنشا ە.ا. بوكەتوۆ اتىنداعى قاراعاندى ۇلتتىق زەرتتەۋ ۋنيۆەرسيتەتى ستۋدەنتى انسات سمانوۆ, كونفەرانسە بويىنشا قاراعاندى مەديتسينا ۋنيۆەرسيتەتى ستۋدەنتتەرى شاپاعات قۇرمانعازى مەن ساپارحان ابدىعالي, «Stopناركومانيا» بەينەروليكتەرى بويىنشا قازتۇتىنۋوداعى قاراعاندى ۋنيۆەرسيتەتى كرەاتيۆتى ستۋدەنتتەر ليگاسى توپ جاردى.
قاتىسۋشىلار جۇلدەلەر مەن ديپلومداردان بولەك, باعا جەتپەس ساحنالىق تاجىريبە, جاڭا تانىستىقتار مەن الداعى جەتىستىكتەرگە موتيۆاتسيا الدى.
ۇيىمداستىرۋشىلار, سەرىكتەستەر مەن وقىتۋشىلار فەستيۆالدى جوعارى دەڭگەيدە وتكىزۋگە قوسقان ۇلەسى ءۇشىن العىسقا يە بولدى, ال قالا تۇرعىندارى ءىس-شارانىڭ اۋقىمى مەن ساپاسىن جوعارى باعالادى.
