بيىل جالپى قۇنى 31,6 ملرد تەڭگەنى قۇرايتىن جوبالار توپتاماسى جۇزەگە اسىرۋ ساتىسىندا. ۇلتتىق جوبانىڭ قارجىلىق تۇراقتىلىعى مەن اۋقىمىن كەڭەيتۋ ءۇشىن قاراجات تارتۋدىڭ ارتاراپتاندىرىلعان ستراتەگياسى ازىرلەندى.
اكىمدىكتەردىڭ وبليگاتسيالارىن ساتىپ الۋ تەتىگى ارقىلى «قتك» اق تاراپىنان 29,2 ملرد تەڭگە باعىتتالىپ, بىرقاتار وڭىردە 15 پيلوتتىق جوبا ىسكە قوسىلدى. سونىمەن قاتار دامۋ ينستيتۋتتارى مەن ەكىنشى دەڭگەيلى بانكتەر ارقىلى قارجىلاندىرۋ پىسىقتالىپ, نارىقتىق قارىز تارتۋ كوزدەلىپ وتىر.
ەنەرگەتيكالىق جانە كوممۋنالدىق رەسۋرستاردى ەسەپكە الۋ مەن مونيتورينگتەۋدىڭ زاماناۋي جۇيەلەرىن ەنگىزۋ جۇمىستارى جۇرگىزىلۋدە. بۇل باعىت 170 تابيعي مونوپوليا سۋبەكتىسىن قامتيدى جانە 2026–2029 جىلدارعا جوسپارلانعان. اتالعان كەزەڭدە شامامەن 8 ملن ەسەپتەۋ قۇرالى ورناتىلىپ, جاڭارتىلماق. سالالىق مينيسترلىكتەرگە جىل سوڭىنا دەيىن كوممۋنالدىق قىزمەتتەرگە ارنالعان ەسەپتەۋ قۇرالدارىنىڭ ستاندارتتارىن بەكىتۋ تاپسىرىلدى.
قانات بوزىمباەۆ ۇلتتىق جوبا اياسىندا وتاندىق تاۋارلار مەن قىزمەتتەردى پايدالانۋدى ىنتالاندىرۋ جانە EPC-مەردىگەرلەردىڭ دايىندىعى جونىندەگى ەسەپتەردى تىڭدادى. قازىرگى تاڭدا مەكس ساتىپ الۋ پلاتفورماسىندا 70-كە جۋىق الەۋەتتى جەتكىزۋشى تىركەلگەن. 2026 جىلعا ارنالعان كاسىپورىنداردىڭ قاجەتتىلىگى تالدانىپ, الەۋەتتى جەتكىزۋشىلەر ءتىزىمى قالىپتاستىرىلدى. ول جالپى قۇنى 439 ملرد تەڭگەدەن اساتىن 11 مىڭنان استام تاۋار پوزيتسياسىن قامتيدى.
ۆيتسە-پرەمەر كولىك مينيسترلىگى مەن قارجى مينيسترلىگىنە وتاندىق تاۋار وندىرۋشىلەر سەرۆيسىن ۇلتتىق جوبانىڭ meks.zakup.sk.kz ەلەكتروندى ساتىپ الۋ پلاتفورماسىمەن ىقپالداستىرۋدى تاپسىردى. سونداي-اق سالالىق ۆەدومستۆولارعا بارلىق EPC-مەردىگەرلەر مەن قىزمەت كورسەتۋشى الەۋەتتى جەتكىزۋشىلەردىڭ پلاتفورمادا تىركەلۋىن, ءارى ۇلتتىق جوباعا قاجەتتى تاۋار پوزيتسيالارى بويىنشا وتپ ءتىزىلىمىنىڭ تولىقتىرىلۋىن قامتاماسىز ەتۋ جۇكتەلدى.
قانات بوزىمباەۆ الەۋمەتتىك باعىتقا دا ەرەكشە نازار اۋدارىپ, اكىمدىكتەرگە تۇرعىن ءۇي كومەگىن كورسەتۋ تەتىكتەرىن حالىققا كەڭىنەن ءتۇسىندىرۋ جۇمىسىن كۇشەيتۋدى تاپسىردى. ال ەڭبەك جانە حالىقتى الەۋمەتتىك قورعاۋ مينيسترلىگىنە تۇرعىن ءۇي كومەگىن الۋ ۇدەرىسىن تولىق اۆتوماتتاندىرىپ, پرواكتيۆتى فورماتتا كورسەتۋ ءۇشىن ءوز اقپاراتتىق جۇيەلەرىن بىرىڭعاي ەسەپ ايىرىسۋ ورتالىقتارىنىڭ دەرەكقورىمەن ينتەگراتسيالاۋ مىندەتى جۇكتەلدى.
