ۇلتتىق ۇلاننىڭ 5573 اسكەري بولىمىندە قىزمەت اتقاراتىن ەفرەيتور الەكساندر نەتەسوۆ «اناشىم» ءانىن ورىنداپ, الەۋمەتتىك جەلى قولدانۋشىلارىنىڭ زور ىقىلاسىنا يە بولدى. TikTok پلاتفورماسىندا جاريالانعان بەينەروليكتى ءجۇز مىڭعا جۋىق ادام تاماشالاپ, سەگىز مىڭنان استام لايك پەن مىڭنان اسا جىلى پىكىر قالدىرعان. كورەرمەندەر ءاننىڭ جۇرەكتەن شىققان شىنايى سەزىمگە تولى ەكەنىن جازىپ, ورىنداۋشىعا العىسىن بىلدىرگەن.
الەكساندر نەتەسوۆ ۇلتتىق ۇلاننىڭ ءان-بي ءانسامبلى ەرلەر حورىنىڭ ءسوليسى ءارى كونتسەرتمەيستەرى. ونىڭ قازاق تىلىندەگى ورىنداۋىن جەلى قولدانۋشىلارى اسەرلى, تابيعي ءارى قازاق حالقىنىڭ مادەنيەتى مەن داستۇرىنە دەگەن تەرەڭ قۇرمەتتىڭ كورىنىسى دەپ باعالادى. كوپشىلىك «اناشىم» ءانىنىڭ ونىڭ ورىنداۋىندا ەرەكشە جان تەبىرەنتەرلىك سيپات العانىن اتاپ ءوتتى.
ءانشىنىڭ قازاق تىلىنە قىزىعۋشىلىعى بالا كەزىنەن قالىپتاسقان. ول رەسەيدىڭ كەمەروۆو قالاسىندا دۇنيەگە كەلىپ, ءتورت جاسىندا اناسىمەن بىرگە ونىڭ تۋعان جەرىنە قونىس اۋدارعان. بالالىق شاعى وتكەن شاعىن اۋىلدا كۇندەلىكتى قارىم-قاتىناس قازاق تىلىندە وربىگەن. سول ورتادا وسكەن الەكساندر اينالاسىنداعى ادامدارمەن ءبىر تىلدە سويلەسۋگە ۇمتىلىپ, مەملەكەتتىك ءتىلدى تابيعي تۇردە مەڭگەرگەن.
بۇگىندە قازاق ءتىلى ونىڭ شىعارماشىلىق جولىنىڭ اجىراماس بولىگىنە اينالعان. ۇلتتىق ۇلان ءانسامبلىنىڭ رەپەرتۋارىندا قازاق تىلىندەگى اندەر ايرىقشا ورىن الادى. سولاردىڭ ءبىرى ۇجىمنىڭ ۆيزيتتىك كارتوچكاسىنا اينالعان «تۋعان جەر» ءانى. بۇل تۋىندىمەن انسامبل ەلدىڭ جوعارى لاۋازىمدى تۇلعالارى مەن شەتەلدىك قوناقتار الدىندا ونەر كورسەتىپ, اقتوبە قالاسىندا وتكەن بايقاۋدا گران پري يەلەنگەن.
الەكساندر نەتەسوۆتىڭ ايتۋىنشا, ءتىلدى مەڭگەرۋ حالىقتىڭ بولمىسىن, مادەنيەتىن تەرەڭ تۇسىنۋگە جول اشادى. ول كۇندەلىكتى ومىردە قازاق تىلىندەگى اندەردى, ماقال-ماتەلدەر مەن تۇراقتى تىركەستەردى ءجيى قولدانادى. سونىمەن قاتار اعىلشىن ءتىلىن دە ەركىن مەڭگەرگەن اسكەري ونەرپاز ءتىل ۇيرەنۋ ادامنىڭ تانىم كوكجيەگىن كەڭەيتەتىنىنە سەنىمدى.
ۇلتتىق ۇلان ساپىنداعى قىزمەتى, مادەنيەتكە دەگەن قۇرمەتى جانە ۇزدىكسىز ىزدەنىسى الەكساندر نەتەسوۆتىڭ ونەر مەن ءتىل ارقىلى ادامداردى جاقىنداستىرا الاتىن تۇلعا ەكەنىن ايقىن كورسەتەدى
