مۇنىسى نەسى؟

كەلىسسىز مىنەز نەگىزسىز جاعدايعا اكەلىپ سوقتىردى. اقتاۋ قالاسىمەن وعان جاپسارلاس پريوزەرنىي اۋىلىن جالعايتىن جول بويىندا تاياۋدا وقىس وقيعا ورىن الدى. جول بويىندا قاتتى جىلدامدىقپەن جۇيتكىپ كەلە جاتقان «ۆاز-21110» كولىگىنەن بويجەتكەن سەكىرىپ كەتتى. كولىكتى دەرەۋ توقتاتقان جۇرگىزۋشى جىگىت قۇلاپ جاتقان قىزعا جۇگىرىپ كەلىپ كومەك كورسەتە باستادى. ياعني, قىزدىڭ ءتىرى, ءارى قاتتى جاراقاتى كورىنبەگەندىكتەن جالىنىپ-جالپايىپ ءجۇرىپ كوندىرىپ, كولىككە قايتا وتىرعىزىپ الىپ جايىنا كەتكەن. سول بەتىمەن ءجۇرىپ وتىرىپ, قىزدى ءوزىنىڭ جۇمىس ورنىنا – اقتاۋ قالاسىنداعى شاعىن اۋدانداردىڭ بىرىندەگى مەكتەپكە اكەلىپ تاس­تايدى. مەكتەپكە كەلگەن سوڭ قىزدىڭ ءوزى «جەدەل جاردەم» شاقىرتادى. دارىگەرلەر ماڭعىستاۋ وبلىستىق اۋرۋحاناسىنىڭ تراۆماتولوگيا بولىمىنە جاتقىزىلعان قىزدىڭ ءارتۇرلى دەنە جاراقاتتارىن العاندىعىن ايتتى. سويتسەك, وقيعا بىلاي ءوربىپتى. كولىكتەگى ەكەۋ ءوزارا كەلىسپەي, ارالارىندا ۇرىس-كەرىس تۋىندايدى, ءتىپتى سوڭى توبەلەسكە ۇلاسا جازدايدى. وسى ساتتە جولاۋشىلار جاعىنداعى الدىڭعى ورىندىقتا وتىرعان قىز جانجالدى توقتاتۋدىڭ جولى وسى دەدى مە, الدە مىنەزگە ەرىك بەردى مە, ايتەۋىر كولىكتىڭ ەسىگىن اشىپ, سەكىرىپ كەتەدى. ابىروي بولعاندا, قىز امان قالدى. سەكىرۋدىڭ ماشاقاتى بىلاي تۇرسىن, جازىم بولايىن دەسە, جان-جاقتان زاۋلاعان وزگە كولىكتەردىڭ استىندا قالۋ قاۋپى دە بولماي قالۋى عاجاپ ەمەس ەدى. ۇرىس-كەرىس, مىنەز سابىردان تايدىردى, بىراق قۇداي مىقتاپ ساقتادى... گۇلايىم شىنتەمىرقىزى, «ەگەمەن قازاقستان».   ماڭعىستاۋ وبلىسى.