ءيا, 1925 جىل – قازاق ونەرىنىڭ تاريحىنداعى ۇلى بەتبۇرىس كەزەڭ. بۇكىلالەمدىك جارمەڭكەنىڭ ساحناسىنا دومبىرا كۇمبىرىمەن قاتار كوتەرىلگەن امىرە قاشاۋباەۆتىڭ قايتالانباس ءۇنى ەۋروپا تىڭدارمانىن عانا ەمەس, بۇكىل الەمدى تاڭداي قاقتىرعان ەدى. ونىڭ شىرقاعان «بالقاديشاسى», «اعاش اياق», ء«ۇش دوسى» مەن سان ءتۇرلى حالىق اۋەنى – قازاق دالاسىنىڭ تاكاپپار مىنەزىن, كەڭ جۇرەگىن, ۇلانعايىر رۋحىن ايگىلەدى. ەندى, مىنە, سول تاريحي ءساتتىڭ قۇرمەتىنە ۇيىمداستىرىلاتىن كەش – تۇلعا تاعىلىمىن ۇلىقتاۋدىڭ ايقىن ۇلگىسى.
ء«ان اتاسى – امىرە» مۋزىكالىق كەشى – تەك كونتسەرت ەمەس, كوركەم قويىلىمعا اينالعان تەاترلىق تۋىندى. كورەرمەن امىرەنىڭ ءومىر جولىنان سىر شەرتەر ساحنالىق كورىنىستەردى تاماشالاپ, ءانشىنىڭ تۇلعالىق تابيعاتى مەن زامان تىنىسىن سەزىندى. زاماناۋي مۋزىكالىق وڭدەۋلەر مەن ءداستۇرلى ناقىش ءبىر ساحنادا توعىسىپ, قازاق رۋحانياتىنىڭ ۇزىلمەس ساباقتاستىعىن كورسەتتى.
«حالىق قازىناسى» ۇلتتىق ونەر ورتالىعىنىڭ ارتىستەرى كورەرمەن نازارىنا ءداستۇر مەن زاماناۋي ساحنا ونەرى ۇيلەسىم تاپقان مازمۇندى كونتسەرت ۇسىندى. اتاپ ايتساق, كەش باعدارلاماسىنا «قۇلاگەر», «قارقارالى», «دۋداراي», «بالقاديشا» سىندى حالقىمىزدىڭ جۇرەگىندە ساقتالعان اندەرمەن قاتار تاتتىمبەت, قۇرمانعازى, قازانعاپ كۇيلەرى ەنگىزىلگەن. ۇلتتىق مۋزىكاعا ءتان قايتالانباس ءۇن, دومبىرانىڭ تەرەڭ كۇمبىرى مەن ءداستۇرلى ۆوكالدىڭ اسقاق اۋەنى كورەرمەندى ءبىر ساتتە عاسىرلار ارناسىنا تارتىپ اكەتكەدەي اسەر سىيلادى.
ءانشى رۋحى اسقاقتاعان ايتۋلى كەشتە قازاقستاننىڭ ەڭبەك سىڭىرگەن قايراتكەرلەرى – قۇماربەك قالقاتاي, ەرلان رىسقالي, ەربولات شالدىبەكوۆ, ايگۇل ەلشىباەۆا, ارداق بالاجانوۆا, نۇربولات ارزاماس ۇلى, قايرات ايتباەۆ, ەلمۇرا جاڭابەرگەن سىندى مايتالماندار امىرە سالعان ءان مەكتەبىنىڭ بيىك ۇلگىسىن ايگىلەدى. سونىمەن قاتار ساحنا تورىندە ونەر كورسەتكەن «دارىن» مەملەكەتتىك جاستار سىيلىعىنىڭ لاۋرەاتتارى – اسقار مۇقيات, پەريزات تۇراروۆا, كۇنسۇلۋ تۇرىكپەن, اياۋلىم قاماجان, ۇلتتىق جانە حالىقارالىق بايقاۋلاردىڭ جۇلدەگەرلەرى ەدىل باسىعارا, ءاليحان دۇيسەنباي, باۋىرجان مۇحامەتباي, ۆەنەرا تابىس, اقەركە تاجىباەۆا, ءداريا بەكپەنبەت باستاعان ونەرلى جاستار دا تاعىلىمدى كەشتىڭ كوركىن قىزدىردى. ءبىر ساحنادا ءتۇرلى بۋىن, ءتۇرلى مەكتەپ, ءتۇرلى ورىنداۋشىنىڭ باس قوسۋى – ۇلتتىق ونەردىڭ ۇزىلمەس جالعاستىعىنىڭ ايعاعى.
ء«ان اتاسى – امىرە» – بۇگىنگى ۇرپاقتىڭ كەشەگىنى قۇرمەتتەۋىنە, ونەردىڭ ۇلى مەكتەبىنە تاعزىم ەتۋىنە ارنالعان كەش. بۇل – ۇلتتىق سانانى سەرپىلتەتىن, تامىرىمىزدى تانىتاتىن, حالىق ءانىنىڭ بيىك بولمىسىن دارىپتەيتىن رۋحاني مەرەكە. قازاق ءانىن العاش رەت الەمدىك دەڭگەيدە مويىنداتقان امىرە قاشاۋباەۆتىڭ ونەرى – تەك تاريح ەمەس, بۇگىنگى كۇننىڭ دە تىنىسى. ەلوردا تورىندەگى ايتۋلى كەش سول اسىل ونەردىڭ قايتا جاڭعىرۋىنا, جاس ۇرپاقتىڭ جۇرەگىندە ۇلتتىق اۋەننىڭ ماڭگى قالۋىنا ۇلەس قوسقانى ءسوزسىز.
