حالىقارالىق عالىمدار باس قوسقان كونفەرەنتسيادا كەلەلى ماسەلەر تالقىعا سالىنىپ, كونستيتۋتسيالىق رەفورمالار مەن زاڭنامالىق جاڭعىرتۋلار جوعارى دەڭگەيدە تالداندى. كونفەرەنتسيانى ۇيىمداستىرۋشىسى – NARXOZ ۋنيۆەرسيتەتىنىڭ قۇقىق جانە مەملەكەتتىك باسقارۋ مەكتەبى. اتالمىش كونفەرەنتسيانى – قۇقىق جانە مەملەكەتتىك باسقارۋ مەكتەبىنىڭ ديرەكتورى, زاڭ عىلىمدارىنىڭ دوكتورى, پروفەسسور تالعات سارسەنباەۆ جۇرگىزدى.
كونفەرەنتسياعا شەتەلدىك جەتەكشى عالىمدار دا قاتىستى. رەسەي فەدەراتسياسى ۇكىمەتى جانىنداعى زاڭناما جانە سالىستىرمالى قۇقىقتانۋ ينستيتۋتىنىڭ باس عىلىمي قىزمەتكەرى, رەسەي فەدەراتسياسىنىڭ ەڭبەك سىڭىرگەن عىلىم قايراتكەرى, زاڭ عىلىمدارىنىڭ دوكتورى, پروفەسسور ولەگ زايتسەۆ بايانداماسىندا كونستيتۋتسيالىق رەفورمالاردىڭ مەملەكەتتىڭ قىلمىستىق ساياساتىنا اسەرى قاراستىرىلىپ, قىلمىستىق نورمالاردىڭ پرەۆەنتيۆتىك سيپاتىنا باسىمدىق بەرۋ قاجەتتىگى اتاپ وتسە. قىرعىز ۇلتتىق ۋنيۆەرسيتەتىنىڭ (ج. بالاساعىن اتىنداعى) زاڭ فاكۋلتەتىنىڭ دەكانى, زاڭ عىلىمدارىنىڭ دوكتورى, پروفەسسور كىناتبەك سماناليەۆ «قۇقىقتىق مەملەكەتتى نىعايتۋدىڭ قۇرالى رەتىندەگى كونستيتۋتسيالىق رەفورمالار» تاقىرىبىندا بايانداما جاساپ, قىرعىزستانداعى كونستيتۋتسيالىق رەفورمالاردىڭ ناتيجەلەرىنە جان-جاقتى تالداۋ جۇرگىزدى.
كونفەرەنتسيا اياسىندا پارلامەنتتىك رەفورمانى جۇرگىزۋ ماسەلەلەرىنە ەرەكشە نازار اۋدارىلدى.
ءال-فارابي اتىنداعى قازاق ۇلتتىق ۋنيۆەرسيتەتىنىڭ ءبىرىنشى پرورەكتورى, زاڭ عىلىمدارىنىڭ دوكتورى, پروفەسسور ەركىن دۇيسەنوۆ ءوزىنىڭ بايانداماسىندا جۇرگىزىلىپ جاتقان پارلامەنتتىك رەفورما اياسىندا كونستيتۋتسيالىق نورمالارعا وزگەرىستەر مەن تولىقتىرۋلار ەنگىزۋ جونىندە ۇسىنىستار ايتىلدى.
ال زاڭ عىلىمىنىڭ دوكتورى, پروفەسسور الۋا يبراەۆانىڭ بايانداماسىندا قۇقىقتىق مەملەكەت قالىپتاستىرۋداعى قۇقىقتىق ءبىلىم مەن قۇقىقتىق مادەنيەتتىڭ ءرولى ايرىقشا اتالىپ ءوتتى. پروفەسسور ءوزىنىڭ بايانداماسىندا قۇقىقتىق ءبىلىم – بۇل قۇقىقتىق بىلىمدەردى مەڭگەرۋ جانە ولاردى تاجىريبەدە قولدانۋ داعدىلارىن قالىپتاستىرۋ جۇيەسى ەكەنىنە توقتالدى.
«قازاقستاندا ۇزدىكسىز قۇقىقتىق ءبىلىم بەرۋ جۇيەسى قالىپتاسقان: مەكتەپتىڭ 9–11 سىنىپتارىندا «قۇقىق نەگىزدەرى» ءپانى وقىتىلادى, جوعارى ءبىلىم بەرۋ جۇيەسىندە دە قۇقىقتىق ءبىلىم نەگىزدەرى قاراستىرىلعان. اسىرەسە, كاسىبي زاڭگەرلەردى دايارلاۋعا ايرىقشا كوڭىل ءبولىنۋى ءتيىس. جاقىندا 2025–2030 جىلدارعا ارنالعان قوعامدا «زاڭ جانە ءتارتىپ» يدەولوگياسىن ىلگەرىلەتۋ تۇجىرىمداماسى قابىلداندى. بۇل قۇجاتتا قۇقىقتىق مادەنيەتتى دامىتۋ ماسەلەلەرى ماڭىزدى ورىن الادى. پارلامەنتتىك رەفورمانى ىسكە اسىرۋ قوعامنىڭ بارلىق سالالارىندا قۇقىقتىق اعارتۋشىلىق جۇمىستى تۇراقتى جۇرگىزۋدى تالاپ ەتەد» دەيدى الۋا يبراەۆا.
قازاقستان رەسپۋبليكاسى ادىلەت مينيسترلىگىنە قاراستى زاڭناما جانە قۇقىقتىق اقپارات ينستيتۋتىنىڭ ديرەكتورى, زاڭ عىلىمدارىنىڭ دوكتورى, پروفەسسور ينديرا اۋباكيروۆا بايانداماسىندا «تسيفرلىق قازاقستان» ستراتەگيالىق باعىتى اياسىندا كونستيتۋتسيالىق قۇندىلىقتاردى زەردەلەۋگە ارنالدى.
قۇقىق جانە مەملەكەتتىك باسقارۋ مەكتەبىنىڭ پروفەسسورى, زاڭ عىلىمدارىنىڭ كانديداتى شولپان ماليكوۆا ء وز بايانداماسىندا «كونستيتۋتسيالىق كەپىلدىكتەردىڭ جانە زاڭنامالىق جاڭعىرتۋدىڭ وتباسىلىق-تۇرمىستىق زورلىق-زومبىلىققا قارسى ءىس-قيمىل سالاسىنداعى ءرولى» جونىندە قوزعادى.
تابيعي رەسۋرستاردى ۇتىمدى پايدالانۋدىڭ كونستيتۋتسيالىق كەپىلدىكتەرى NARXOZ ۋنيۆەرسيتەتىنىڭ قۇقىق جانە مەملەكەتتىك باسقارۋ مەكتەبىنىڭ پروفەسسورى, زاڭ عىلىمدارىنىڭ دوكتورى انور مۋكاشەۆا بايانداماسىندا قاراستىرىلىپ, قولدانىستاعى زاڭناماعا عىلىمي تالداۋ جاسالىپ, ۇسىنىستار بەرىلدى.
كونفەرەنتسيا عىلىمي قاۋىمداستىق تاراپىنان ۇلكەن قىزىعۋشىلىق تۋدىردى.
كونفەرەنتسيا سوڭىندا شارانى ۇيىمداستىرۋشى NARXOZ ۋنيۆەرسيتەتى قۇقىق جانە مەملەكەتتىك باسقارۋ مەكتەبىنىڭ ديرەكتورى, زاڭ عىلىمىنىڭ دوكتورى, پروفەسسور تالعات سارسەنباەۆ كونفەرەنتسياعا كەلۋشىلەرگە العىس ءبىلدىردى.
