داقپىرتى تەز تاراعان تەمىرجول وتكەلىندەگى وتكىر ماسەلە الەۋمەتتىك جەلىدە دە كەڭىنەن تالقىلاندى. 300 ميلليونعا جۋىق قاراجاتقا سالىنعان كوپىردىڭ جاي-كۇيى كىمدى دە بولسا الاڭداتسا كەرەك. جەرگىلىكتى جۇرت وتىز جىل بويى كۇتكەن اسپالى كوپىردىڭ جىل وتكەن سوڭ توز-توزى شىعا باستاۋى شىنىندا دا تاڭعالدىرماي قويمايدى. بۇل ماسەلە ءوز كەزەگىندە تۇرعىنداردىڭ اشۋىن تۋدىرىپ وتىر.
اۋدان ورتالىعى اسا اۋىلىندا 13 مىڭنان استام حالىق تۇرادى. تۇرعىندار وسى نىساننىڭ اياقتالۋىن اسىعا كۇتتى. الايدا جارناماسى جەر جارعان كوپىردىڭ ليفتىسىنە قاتىستى تۇرعىندار داۋى تولاستاعان ەمەس. ەكى مىڭعا جۋىق جۇرت شويىن جولدىڭ ارعى بەتىندە تۇراتىنىن, ولاردىڭ دەنى بەرگى بەتتەگى الەۋمەتتىك نىساندارعا ءجيى اعىلاتىنىن نازارعا الساق, جاعدايدىڭ ءماز ەمەستىگىن اڭعارۋ قيىنعا سوقپايدى. كوپىردەن وتەتىن حالىق الدىمەن 6 مەتر بيىككە كوتەرىلەدى, سونان سوڭ 40 مەتر جاياۋ جۇرۋگە ءتيىس. ليفت ىستەن شىقسا, باسپالداقپەن ءجۇرۋ كىمگە دە بولسىن قيىن سوعادى.
جۇرت كەلتىرگەن دەرەككە جۇگىنسەك, وتكەن جىلدىڭ بەل ورتاسىندا پايدالانۋعا بەرىلگەن كوپىردىڭ جارتى تونناعا دەيىن كوتەرۋگە ءتيىس جەدەلساتىسى كوپ ۋاقىت وتپەي ىستەن شىعىپتى. ابىروي بولعاندا ليفت ىشىندەگى توپ بالا امان قالعان. تاياۋدا ءبىر ازامات جاراقات الدى دەگەن اقپاراتتى قۇلاعىمىز شالدى. الەۋمەتتىك جەلىدە بەلگىلى كاسىپكەر جۇماسەيىت نۇرباەۆ تا وزەكتى ماسەلەگە جۇرت نازارىن اۋداردى. ماسەلەنىڭ انىق-قانىعىن ءبىلۋ ماقساتىندا جەرگىلىكتى اكىمدىكتەن رەسمي جاۋاپ سۇراعانبىز.
«اسا اۋىلىنداعى تەمىرجول ۇستىنەن وتەتىن جاياۋ جۇرگىنشىلەرگە ارنالعان اسپالى كوپىر 2024 جىلدىڭ ماۋسىمىندا پايدالانۋعا بەرىلگەن. قۇرىلىس جۇمىستارىن «د & ك» جشس جۇرگىزىپ, نىسانعا 5 جىلدىق كەپىلدىك بەرگەن. نىسان اسا اۋىلدىق وكرۋگى اكىمدىگىنىڭ تەڭگەرىمىندە. كوپىردە بىرقاتار اقاۋ انىقتالعان. بۇل جونىندە مەردىگەرگە ءتورت رەت حابارلاما جولداندى. 2025 جىلدىڭ 20 قازانىندا مەردىگەردى ساپاسىز جۇمىستى قايتا ورىنداۋعا مىندەتتەۋ, مەملەكەتتىك ساتىپ الۋدىڭ جوسىقسىز قاتىسۋشىسى رەتىندە تانۋ تۋرالى تالاپ ارىز سوتقا جولدانعان بولاتىن. سوت شەشىمىنە سايكەس, مەردىگەر كورسەتىلگەن كەمشىلىكتەردى رەتكە كەلتىرۋگە مىندەتتەلدى. اسپالى كوپىر قۇرىلىسىن جۇرگىزگەن مەردىگەر مەكەمە (د & ك جشس) كوپىردەگى جەدەلساتىدا انىقتالعان اقاۋلاردى جويۋ, ونىڭ تۇراقتى جۇمىس ىستەۋىن قامتاماسىز ەتۋ ماقساتىندا ءتيىستى جوندەۋ جۇمىستارىن قوسالقى مەردىگەرگە تاپسىرعان. قوسالقى مەردىگەر ۇيىم ءوز مامانىن اتالعان جەدەلساتىنى جوندەۋگە جىبەرگەن. جوندەۋ جۇمىستارى بارىسىندا مامان ەڭبەك جاراقاتىن العان. دەنساۋلىعىنا بايلانىستى شاعىمدى ازامات مەردىگەرگە نەمەسە قوسالقى مەردىگەرگە بىلدىرۋگە ءتيىس», دەپ جازىلعان جەرگىلىكتى اكىمدىكتىڭ رەسمي جاۋابىندا.
ادام جاراقات العان سوڭ جاستىڭ دا, جاسامىستىڭ دا تاۋەكەلگە بارمايتىنى انىق. ولار امالدىڭ جوقتىعىنان بيىك باسپالداقپەن كوتەرىلۋگە ءماجبۇر بولعان. وسىلايشا, جارناماسى جەر جارعان كوپىرىمىز جىل وتكەن سوڭ-اق جەرگىلىكتى حالىقتى قارا تەرگە مالشىنۋعا ماجبۇرلەگەنى كىمدى دە بولسىن قىنجىلتپاي قويمايدى.
جىل بۇرىن جارناماسى جەر جارعان اسپالى كوپىردىڭ اڭگىمەسى جەرگىلىكتى حالىق تاراپىنان از ۋاقىت ىشىندە سىنعا ۇشىرايدى دەپ كىم ويلاعان؟ اۋدان اكىمى ەرلان قىدىرالى ۇلى ءدال وسى تەمىرجول وتكەلىن ماقتانىشپەن ايتىپ, وبلىس اكىمى ەربول قاراشوكەەۆكە دە كورسەتكەن بولاتىن. اسپالى كوپىر اشىلعاندا ءوڭىر باسشىسى بالالاردىڭ قاۋىپسىزدىگى باستى نازاردا بولۋى كەرەكتىگىن تىلگە تيەك ەتكەنى دە ەسىمىزدە. سول كەزدە جەرگىلىكتى جۇرتپەن بىرگە ءبىز دە قۋانىپ, «اسا جۇرتى اڭساعان كوپىر» دەپ سۇيىنشىلەتىپ ەدىك. وكىنىشكە قاراي, قۋانىشىمىز كوپكە سوزىلمادى.
جەرگىلىكتى اتقارۋشى بيلىك وكىلدەرىنەن نىسانداعى ماسەلە ناقتى قانشا ۋاقىتتا شەشىمىن تاباتىنىن سۇراپ ەدىك. ساۋالىمىز جاۋاپسىز قالدى. نىساندى ۋاقىتىندا قالاي قابىلداپ العاندارىن دا تۇسىندىرگەن جوق. قالاي دەسەك تە قىرۋار قارجى جۇمسالعان كوپىردىڭ ءحالى مۇشكىل تارتقانى كىمدى دە بولسىن تولعاندىرماي قويمايدى. جەرگىلىكتى جۇرت قىزىعىن كورەدى دەگەن تەمىرجول وتكەلىندەگى ماسەلە تەزىرەك شەشىمىن تاپسا دەيمىز.
جامبىل وبلىسى,
جامبىل اۋدانى
