«تاتتىمبەتتەن باستاپ بەرىدەگى باۋبەك كۇيشىلەرگە دەيىنگى شەرتپە كۇي شەبەرلەرىنىڭ تۋىندىلارىن تەرەڭ تانىپ, ۇزدىك ورىنداۋشى وسى رىمحان ءابىلحان ۇلى ەدى» دەپ باستادى القالى جيىندى داۋلەسكەر كۇيشى جانعالي جۇزباەۆ. كۇلاش بايسەيىتوۆا اتىنداعى قازاق ۇلتتىق ونەر ۋنيۆەرسيتەتىندە ء«داستۇرلى مۋزىكالىق ونەر» فاكۋلتەتىنىڭ ۇيىمداستىرۋىمەن اكىم تارازي زالىندا وتكەن شارادا رىمحان ءابىلحان ۇلىنىڭ كۇيشىلىگى, تالىمگەرلىك قىرى, ادامدىق كەلبەتى ءبىرشاما اڭگىمەلەندى. كەزىندە ءوزى ەكراننان سويلەگەندە: «مۋزىكادان جوعارى تۇراتىن كۇي ونەرى – تىلمەن, اڭگىمەمەن ايتىپ جەتكىزە المايتىن ونەر. سوزبەن جەتكىزسەك, اڭگىمە بولىپ كەتەدى, پوەما, پوەزيا, پەسا بولىپ ادەبي جانرعا اينالىپ كەتەدى. سول ادەبي جانردىڭ كۇشى جەتپەيتىن, ءتىلى جەتپەيتىن, ادامنىڭ سەزىم قۇبىلىسىندا بولىپ جاتقان الاپات سەزىمدى, ىشىندەگى داۋىلداردى قازاق كۇي تىلىمەن جەتكىزىپ وتىرعان. مىسالى, «سالتانات» كۇيىندە اناسى قايتىس بولىپ, بالالاردىڭ اناسىن اڭساپ ىزدەگەنىندە – بۇكىل ادامزاتقا ءتان ماحاببات, شەكسىز سۇيىسپەنشىلىك تۇنىپ تۇر», دەپتى.
ەسكە الۋ كەشىندە الاشتانۋشى عالىم, جازۋشى تۇرسىن جۇرتباي كۇيشىمەن 20 جىل كورشى تۇرعانىن, كۇيشىلىگىمەن قاتار ادامدىق ار-ۇياتىنا كىرشىك تۇسىرمەي وتكەن تەكتىلىگى تۋراسىندا سويلەدى. مەملەكەتتىك سىيلىقتىڭ لاۋرەاتى, جازۋشى-دراماتۋرگ روزا مۇقانوۆا ناعىز كۇي قونعان ادام دەپ ەسكە الدى.
كەزىندەگى رەسپۋبليكالىق «كۇي-كەرۋەن» فەستيۆالىنىڭ «التىن دومبىرا» يەگەرى رىمحان ءابىلحان ۇلى 2015 جىلى لوندونداعى قازاق ارتىستەرىنىڭ فەستيۆالىندە ونەرىمەن ايگىلەنگەن. قازاق تەلەۆيزياسى مەن راديوسىنىڭ «التىن قورىندا» «كۇيشى رىمحان ءابىلحان ۇلى» اتتى حابار ساقتاۋلى.
«قازاقتىڭ كۇي ونەرىنە شەكسىز ۇلەس قوسقان, شەرتپە كۇيدىڭ حاس شەبەرى, تالىمگەر ۇستاز رىمحان ءابىلحان ۇلى «وتىرار سازى» فولكلورلىق ەتنوگرافيالىق حالىق اسپاپتار وركەسترىندە, ل.ن.گۋميلەۆ اتىنداعى ۋنيۆەرسيتەتتە جانە قازاق ۇلتتىق ونەر ۋنيۆەرسيتەتىندە كوپ جىل جەمىستى ەڭبەك ەتتى, ۇزدىك شاكىرتتەر دايارلادى. تاتتىمبەت, سۇگىر, تولەگەن, نۇرعيسا كۇيلەرىن ناسيحاتتادى. ۇستازدىق جولىنداعى جاۋاپكەرشىلىگى, ادامدىق بولمىسى قازاقتىڭ ءداستۇرلى كۇي ونەرىنە شىنايى بەرىلگەندىگى ءبىز ءۇشىن ۇلگى» دەدى اتالعان ۋنيۆەرسيتەتتىڭ دومبىرا كافەدراسىنىڭ مەڭگەرۋشىسى, قازاقستاننىڭ ەڭبەك سىڭىرگەن قايراتكەرى ابىلعازى احماديەۆ. سونداي-اق «استانا اقشامىنىڭ» ءجۋرناليسى امانعالي قالجانوۆ جۇرەكجاردى لەبىزىن بىلدىرسە, كۇيشىنىڭ جارى, بەلگىلى اقىن وڭايگۇل تۇرجان ۇيىمداستىرۋشىلار مەن قاتىسۋشىلارعا العىس ايتتى.
