جازۋشىنىڭ تۋىندىلارى ورىس, ۋكراين, وزبەك, تۇرىك, ساحا, قاراقالپاق تىلدەرىنە اۋدارىلعان. وزبەكستاندىق جازۋشى, فيلولوگيا عىلىمدارىنىڭ دوكتورى قازاقباي يۋلداشەۆ تۇركىستاندا وتكەن مارحابات بايعۇتتىڭ 80 جىلدىعىنا ارنالعان حالىقارالىق سيمپوزيۋمدا: «مارحابات بايعۇتتىڭ تۋىندىلارى وزبەك وقىرماندارىنا جاقسى تانىس. تۋىسقان ەكى ەلدىڭ ءبىر-بىرىنەن ىرگەسىن اجىراتپاۋلارىنا نەگىز بولاتىن وسىنداي دۇنيەلەر كوپ بولسا ەكەن. قازىر مەن مارحاباتتىڭ شىعارمالارىن اۋدارۋعا ءبىرجولاتا بەت بۇردىم», دەگەن بولاتىن. تاشكەنتتەگى تۇساۋكەسەر راسىمىندە «كيم وشدي ساۆدوسي» اتتى جاڭا جيناقتىڭ العىسوزىن جازعان قازاقباي يۋلداشەۆكە العىس بىلدىردىك. حالىقارالىق ءىس-شاراعا قازاق-وزبەك زيالى قاۋىمىنىڭ اراسىنا التىن كوپىر بولىپ جۇرگەن «يجودكور» ادەبي بىرلەستىگىنىڭ قۇرمەتتى توراعاسى ابديراحيم پراتوۆ پەن قازىرگى توراعا زاكيرجون مۋمينجونوۆ اتسالىسقانىن ايتا كەتەلىك. «يجودكور» ادەبي بىرلەستىگىنىڭ اتىنان وزبەكستان جازۋشىلار وداعىنىڭ توراعاسى, ايگىلى اقىن سيروجيددين ساييد باستاعان بىرنەشە وزبەكستاندىق قالامگەرگە «مارحابات بايعۇتتىڭ تۋعانىنا 80 جىل» جوباسىنا قولداۋ كورسەتكەندەرى ءۇشىن العىسحات پەن ازداعان سىي-سياپات تاپسىردىق.
ال مارحابات كوكەمنىڭ اياۋلى جارى قىزداركۇل پەرنەبايقىزىنىڭ سىيلىعى ءتىپتى ەرەكشە بولدى. ول ءوزى ءومىر بويى قاباعىن باعىپ وتكەن قالامگەردىڭ 7 تومدىق جيناعى مەن ءبىر دوربا شاعىلعان جاڭعاقتى تارتۋ ەتتى. جاڭعاق كلاسسيك جازۋشىنىڭ كىندىك قانى تامعان تاۋپىستەلىدەگى قارا شاڭىراعىنداعى ناسىر مەن شەرحان باۋىندا ءوسىپ تۇرعان ءونىم ەكەنىن ەستىگەن ەلدىڭ كوڭىلى تولقىدى, جۇرەگى تەبىرەندى. ماقاڭنىڭ قالامداستارى مەن تاعلىم-تاربيەسىن, قامقورلىعىن كورگەن تالاي شاكىرتتەرىنىڭ باسقوسۋىمەن كوپتەگەن ادەبي ءىس-شارالار وتكەن بۇل ءجونى بولەك, جوسىعى ەرەك باۋدىڭ كوشەتتەرىن ءبىر كەزدەرى قازاق-وزبەك ادەبيەتىنىڭ الىپتارى, ەكى ەلدىڭ رۋحانياتىنا اجىراماس بايلانىس ورناتقان شەرحان مۇرتازا مەن ناسىر فازىلوۆ ءوز قولدارىمەن ەككەنى تاسقا قاشالعان تاماشا تاريح, وشپەس ونەگە.
وزبەكستان جازۋشىلار وداعىندا وتكەن راسىمگە قاتىسقان اقىن-جازۋشىلار مەن جاستار, ستۋدەنتتەر دارىندى دراماتۋرگ, تاريحي تۋىندىلارىمەن دە تانىمال قالامگەر سايا قاسىمبەكتىڭ اسەرگە تولى اڭگىمەسىن سۇيسىنە تىڭدادى. قالامگەر تۇركى دۇنيەسىنىڭ بىرلىگىنە, رۋحاني بايلانىسىنا, ءوزارا ساباقتاستىعىنا توقتالدى. ەل ىنتىماعىن, دالا ديپلوماتياسىن, قازاقتىڭ توبە ءبيى, داڭقتى تولە بي تۋرالى تاريحي دەرەكپەن تامىرلاستىرا بايانداعانىنا كوپشىلىك ءتانتى. ال قازاقستان جازۋشىلار وداعىنىڭ تۇركىستان وبلىستىق وكىلدىگىنىڭ جەتەكشىسى, حالىقارالىق «الاش» سىيلىعىنىڭ لاۋرەاتى ايدار سەيدازىم وزبەكستان جازۋشىلار وداعىنىڭ ەڭسەلى عيماراتىندا ۇيىمداستىرىلعان مارحابات بايعۇتتىڭ وزبەك تىلىندەگى اڭگىمەلەر جيناعىنىڭ تۇساۋكەسەر ءراسىمى ادەبيەتكە دەگەن قۇرمەتتىڭ, مادەني بايلانىسقا دەگەن ادالدىقتىڭ جارقىن ۇلگىسى ىسپەتتى بولعانىن جەتكىزدى. باۋىرلاس ەلدىڭ جازۋشىلارى قازاق قالامگەرىنىڭ شىعارماشىلىعىنا تەرەڭ تالداۋ جاساعانىنا, ءبىرى ونىڭ قاراپايىم اۋىل ءومىرىن فيلوسوفيالىق تەرەڭدىكپەن سۋرەتتەۋىن تىلگە تيەك ەتكەنىنە, ەندى ءبىرى كوركەم ءتىلدىڭ تازالىعى مەن ادام مىنەزىن اشۋداعى شەبەرلىگىن ەرەكشە اتاپ وتكەنىنە جان-جاقتى توقتالدى.
سونداي-اق تاشكەنت تورىندەگى باسقوسۋدا زيالى قاۋىم «مارحابات بايعۇت اتىنداعى ادەبيەتشىلەر ءۇيىن اشۋ» تۋرالى باستامانىڭ وتە ورىندى ەكەنىن ايتىپ, جۇزەگە اسىرىلۋىنا تىلەكتەستىك ءبىلدىردى.
شىمكەنت – تاشكەنت – شىمكەنت
